فضفضه

مش عارفه انا هاكتب الكلام ده ليه بس صدقونى انا محتاجة اقوله

انا مش عارفه ابتدى منين بس هاكتب وابقوا اعذرونى بقى على عدم الترتيب

انا متضايقه اوى وتعبانه اوى من كل حاجة فى حياتى بجد عارفين لما توصلوا لدرجة انكوا مش عايزين تصحوا من النوم بس بتقوم من السرير علشان تصلى

حاسه ان كل حاجة فى حياتى غلط مش حياتي اللى هى انا يعني انا بس لا انا وحياتى دى يعني كل حاجة حواليه

قريت دلوقتى موضوع عند كاسبر بيقول ان احنا قاعدين ننتقد كل حاجة حوالينا ماهو احنا الناس دي واحنا المجتمع ده صحيح فعلا وهو عنده حق

واعذرونى بقيت دايما اتكلم عن مواضيع مدونات تانيه فى تدويناتى بس ده لانى بتاثر بالكلام اللى بيخرج من القلب وبيوصل لى

لما بفكر احنا امتنا دى هاتتصلح ازاى بحس انها حاجة شبه مستحيله بس الغريب انى متاكده انها هاتتغير ازاى ماعرفش

طول الوقت بنتكلم عن سلبيات وعيوب صحيح مش بننكر الايجابيات بس بجد فيه سلبيات كتير اوى ومشاكل كتير اوى

انا مشكلة من المشاكل دى اه والله هاقول لكوا حاجة اقروا تدوينة كل منا امه وهاتفهمونى هاتفهموا يعني ايه انا مشكلة من المشاكل دى

لما بفكر فى ان كل بنت فى مجتمعنا حاليا مافيش حاجة فى حياتها اسمها امة المسلمين بجد مفيش واحدة بتفكر فى فلسطين والعراق ولا البوسنه ولا حد لسه فاكر البوسنه اصلا الظاهر ان كل المسلمين بقى عندهم زهايمر مش انا بس

لما كنت اتكلم مع واحدة من اخواتى وهما ماشاء الله عندهم اولاد وكده بقول لهم ربوا اولادكم على حب الشهادة والجهاد فى سبيل الله واحدة فيهم قالت لى جهاد ايه قولى يطلع لعيب كورة :)

والتانية تقول لى شهادة ايه وانا هاربى الواد علشان يتهف فى عقله ويسافر فلسطين ويروح يموت وتروح قايله لى هو محمد جوزى عايز يربيه على كده اصل محمد ده طيب ويعرف ربنا :)

اما بقى صحباتى البنات بتوع ثانوى اللى هما ماتعدوش كونهم زميلات كان اهم حاجة عندهم يتكلموا عن كل الناس وعن اى حاجة كدب او صدق واللبس والماكياج والعرسان والكابلز وبس علشان كده ماكانش ليا اصحاب فى ثانوى وماكنتش بتكلم مع حد كانت لما واحدة تحب تيجي تفضفض لى وانصحها وخلاص اصلى كنت متدينة اياميها الله يرحم الذى مضى بقى

واما صديقاتى فى الجامعه فربنا يبارك فيهم محترمات ومتدينات الحمد لله بس عمرى ما هانسي المرة اللى كانوا هايضربونى فيها وقالوا لى والله لو ما بطلتى تتكلمى فى الموضوع ده هانسيبك ونمشي عارفين كنت بتكلم عن ايه عن فلسطين :) ما تزعلوش يا بنات بس ده حصل فعلا ماليش دعوة :)

اخويا بقى ربنا يخليه ليا يارب هو الوحيد اللى بحس ان عنيه بتبقى مبسوطة بيا بجد عارفين اخويا ده ظابط من اللى بتسالوا طول الوقت فى التاجات بيبقى احساسك ايه لما تشوف واحد منهم فى الشارع عارفين كان هايموت فى مرة او بمعنى اصح كان هايتشرح واكبر حته فيه كانت هاتبقى زى البفتيك كده ده للستات اللى بيعرفوا يطبخوا هايفهمونى وهو كان بيقبض على تاجر مخدرات بيحكي لى اللى حصل بيقول لى عارفة لما رجعت القسم كان كلهم مبسوطين ومش عارفه ايه اتارى اللى هو كان رايح يقبض عليه ده كان حاجة كده ماحدش عارف يجيبه وايه قبض عليه فى مولد والصعايدة بقى مايقبلوش حد يقرب لهم حتى ولو غلطان ماهم مش عارفين هايبقى بيتهيالهم ان ده ظابط ابن ....... وبيغلس على قريبهم وخلاص

ماهو ده ظابط من اللى بتسالوا عن احساس اللى بيشوفهم يعني هاحس بايه بجد السؤال ده بالذات ببقى مستنيه اجابة كل واحد عليه

ليه ازدواجية المعايير فى واحد رد وقال احنا صحيح بنلعن ..... بس اول ما بنتسرق بنجرى عليهم

ومش هاقول كلهم كويسين انا نفسي بخاف منهم وانا ماشيه فى الجامعه مش هاكدب ومن غير ما اعمل حاجة بس لمجرد انهم مستقدرين

اكوام المهملات اللى ماليه الشارع اللى مش عايزة اقول لكوا كنت مضطرة لحاجة من اتنين في مرة علشان اعرف اعدى الشارع يا اما العب اكروبات يا اما الف لفه طويله عريضه علشان اشوف ملف اعدى منه وطبعا لعبت اكروبات :) ماهو مش هاروح لاخر الشارع

الاعلانات اللى زى الزفت اللى ماليه التليفزيون بالذات واحد فيهم بيموتنى الاعلان بتاع ادينا بنفرفش ورانا ايه ورانا ايه ادينا بندردش ورانا ايه ورانا ايه قلت يا سلام لا ماوراناش حاجة ولا ورانا شباب مش لاقى شغل ولا بنات مش عارفه تتجوز علشان الشباب الفقرانه ولا ورانا حاجة خالص ولا ورانا ثانوسخه عامة (سورى فى اللفظ يعني بس انا مسمياها كده ) ولا ورانا تنسيق ولا حاجة خالص

كمان بفكر فى الحياة الزوجية فى مجتمعنا زى بهلولة وبهلول ومش عارفه بهلول مابقاش بيكتب ليه وزيهم كتير مش هما بس

اهل الجنة كتب عن التهديف كل حاجة وليها هدف حتى الزواج فى الاسلام دلوقتى صدقونى ومن على ارض الواقع بقول لكوا مفيش شاب بيتجوز فتاة وهدفهم كل هدفهم انهم يخرجوا اسرة مسلمة بجد والله انا اعرف ناس مخطوبين كتييييييييييييير ومفيش حد منهم سمعته جاب سيرة ربنا ولا ان هدفه يخلف طفل يربيه على طاعة الله ولا على الاسلام الحقيقى وهو فى اسلام مش حقيقى على الاسلام يعني معلش اصل فى اسلام تانى فى الاعلام بقى كلكوا عارفينه

عارفين انا دلوقتى لما ببص للدنيا كده وهاقول لكم تشبيه مقرف حبتين واعذرونى حد فيكم راح يصطاد قبل كده ومعاه علبه فيها الطعم انتوا طبعا عارفين الطعم ده ايه بلاش قرف يعني تخيلوا بقى بجد الدنيا شكلها زى العلبه دى حاجات عماله تتحرك بس من غير هدف يعععععععع عارفه بس محدش يقول الله يقرفك مش ناقصه اكتر من كده بقول لكوا اهو اصل هاخد كرسي واطلع اقعد على سطح البيت (اللى هو الروف يعني :) واقول ان شالله هما ان شالله هما :) )

انا اتخنقت من كل حاجة انا يوم 28 هايبقى عندى 18 سنه لو هانقول انى هاتحاسب عليهم يبقى داخله جهنم راكبة اير جيت سوبر سونيك ده انا بيتهيالى والله يا جماعة ما عملتش حاجة عدله فى حياتى لن اتالى على الله واقول مش هايغفر لى انا ظنى فى ربنا خير الحمد لله

انا زيي زي كل شاب وبنت دلوقتى ايه الفرق بيني وبينهم كلنا دماغنا فاضيه وعايشين حياتنا ومش بنفكر غير في نفسنا

هاقول لكم حاجة غريبه الفكرة دى بالذات بتيجي فى بالى وانا بصلى

وانا بصلى بسرح زى ناس كتير وبفكر فى حاجات دنيوية ساعات بيبقى نفسي اوى امد ايدي جوه دماغى اطلع منها الافكار دى علشان اعرف اصلى وفى الوقت ده بالذات بفتكر اهل سقر يقال انهم بيخبطوا رؤوسهم فى الصخر فى جهنم حتى تتفتت ولما تلتئم يرجعوا يعملوا كده تانى ببقى هاتجنن لمجرد فكرة انى ممكن ابقى فى سقر

انا عايزة اتغير عمرى فى حياتى ماكان عندى القدرة على انى اتغير بس الحمد لله ربنا بعت لى هدية على طبق الماس مش فضه هى اللى خلتنى اتغير الهدية دى كانت سبب في اني افتكر نفسي او مش نفسي افتكر قلبى اللى خرب ايام ماكان عامر صحيح الهدية دى بعدت بس ما خرجتش من قلبى ولا حياتى وان شاء الله ربنا يجمعنى بيها تانى

مش عارفه هل الكلام اللى انا قلته ده ينفع يتقال ولا لا كله كلام خاص جدا وشخصي جدا جدا بس صدقونى انا كنت محتاجة اقول الكلام ده اوى لانى بجد تعبت اوى اوى وصدقونى انا عايزة ارتاح حتى ولو هاموت بس ارتاح

مدونة تحكى حكاية انسان

كل مدونة تدخلها انت لا تقرا بها كلمات ولا سطور لكل مدونة هدف ولكل مدونة حكاية وكل مدونة هى انسان

دخلت عالم التدوين بالصدفة البحته ولم اكن اعلم ما التدوين ولا المدونات

عرفت التدوين بعد قرائتي لبعض التدوينات فى مدونة عبد الكريم نبيل والذى يطلق على نفسه الان اسم كريم ولا اعرف له من الكرم ولا النبالة نصيب ولا حول ولا قوة الا بالله عسي ان يهديه الله

بعد قرائتي لبعض تدويناته وكان منها ما اسماه وداعا شهر النفاق يومها قرأت تلك التدوينات وبعض التدوينات عن التنصير والفتيات المسلمات اللاتى يذهبن ليتنصرن وغيره الكثير يومها لم أستطع أن انام كانت ليلة مليئة بالكوابيس ... حقا ... كانت ليلة شاقه ومرهقة واحساس بالذنب فظيع وبكاء

ليلتها فكرت كم اننى لم افعل شيء لديني كم انا مقصرة كم لم اشكر نعمة الاسلام كم قصرت بذنوبى انا تنصرت تلك الفتيات بذنوبى انا الحد هؤلاء وارتدوا

لا اعرف ولكن احسست بالذنب لاننى لا استطيع ان افعل شيئا بعدها عرفت انه يمكننى ان تكون لى مدونة وبالفعل وقتها قمت بالغاء كل ايميلاتى القديمة وعملت ايميلات جديدة وعملت المدونة ونويت ان اتغير

ولكن ليس دائما التغير يكون للاحسن

شتان بين تلك الفتاة التى عرفت معنى الشوق لله وبين تلك الفتاة التى تسترجى قلبها للحضور فى الصلاة والله يهدي من يشاء

كل مدونة اتعرف عليها جديدا يجدنى اصحابها اعلق على مواضيع قديمة وليس كل مدونة ففى بعض الاحيان اكتفى بقراءة التدوينات دون تعليق ولكن كل مدونة جديدة اتعرف عليها اقرا كل التدوينات الموجودة بها واذا كانت طويلة اقسمها ولكن تقرا كلها حتما

لماذا؟

لان كل مدونة هى تاريخ انسان يسجل حياته على صفحات اليكترونية صحيح ان ليس كل المدونات خواطر او يوميات وليس كلها شخصية ولكن لتفهموننى عليكم قراءة ما بين السطور والكلمات حقا

فى بعض الاحيان وفى تدوينه بعيدة كل البعد عن وصفها شخصية يمكن ان ترى دموع انسان

اجد الناس يتسائلون هل التدوين مهم ؟ هل للمدونات اهمية؟ هل تشكل فارقا ؟

وانا اقول أجل, لماذا؟

لأن المدونات هى حقبة تاريخية تسجل الكثير من الأحداث التاريخية التدوين هو نقل للواقع نقل للتاريخ كل منا يكتب ويتكلم عن عدة من الأشياء ولكن هناك شيء مشترك بين كل المدونين الامل فكلنا اما دفعه امله او رغبته فى التغيير للتدوين حتى من فقد الامل فى نفسه دون متمنيا ان يكون سببا فى تغير الاخرين او حتى ان يتغير هو نفسه فمعظم الذين يدونون ينصحون انفسهم بكلامهم قبل غيرهم وانا من هؤلاء

وايضا فى كل مدونة اقرا الحكاية المكتوبة بين السطور ربما اذا ما قرأت تدوينة تتحدث عن جمال الحياة ربما تجد صاحبها يعتصر ألما وربما اذا قرات تدوينه تحكى عن الهدوء والراحة والجمال ترى فى نفس الكلمات الادخنة الموجودة فى الشوارع وتكاد تسمع ضجيج السيارات

مدونة عايزة أتجوز

لصاحبتها برايد

حقا لا يمكنك الا تضحك مهما حاولت واخبركم الحقيقة ان عيني تدمع حزنا فى نفس الوقت الذى اضحك فيه حتى اننى اسمع رنين ضحكتى فى جدران الغرفة ويكاد قلبى يعتصر الما على صاحبتها فى نفس الوقت وربما انبت نفسي على ضحكتى

مدونتى بهلولة وبهلول

زوجين مصريين تتجسد فيهما حقا خفة الدم المصرية فبكل بساطة وبلكنة مصرية صرف تجد الزوج والزوجة يجسدان بعض ايام حياتيهما معا وربما تجدهما يتحدثان عن مشاكل ومع ذلك ترى فيها ذكريات لم تكون فى وقتها سعيدة ولكن اصحابها عندما يتذكرانها يضحكان عليها ونتعلم نحن منهما الكثير

المدونة العزيزة على قلبى جدا رفقه عمر مدونتها العائشة فى الاحلام

كتبت تدوينات خاصة كثيرة جدا على حد قولها واقول لك وما العيب في ذلك السنا بشر وما نحن الا مجموعة من الخبرات والالام والاحزان ومشاكل وحتى لحظات سعيدة كلها تكسبنا قوة حتى اذا ما ظننا اننا ضعفاء ولكن عندما ياتى الوقت تخرج تلك القوة اليست هذه مدونتك فافعلى ما شئتى بها انت لا تضريننا اذا تحدثتي عن نفسك على العكس وانما كما تحدثين نفسك على صفحات مدونتك تجعلين كل من يقرا لك يتحدث الى نفسه ايضا ويراجعها فى كثير من الاشياء

لا اعرف ولكن اهنئك على جرأة ليست للكثير منا ان تفيدي غيرك بخبراتك الشخصية

كتب استاذى العزيز عصفور المدينة تدوينات رائعة عن الحب فى الله تجعلك تقدر تلك الكلمة و كلمة جزاكم الله خيرا ايضا ورد لها ذكرا بسيطا فى التدوينة ولكنها ادت معناها

كتب بينو فى مدونته عيون

ايضا تدوينة رائعة عن سماع الاغانى وخلافه والتى حقا اتمنى لو انقلها لكل شخص عزيز علي لانها بالفعل صادقة جدا حقا الغناء ينبت النفاق فى القلب فبعد ان كنت لا يمكن ان اخلف كلمة قلتها حتى ولو لم اعد فيها اخلفت وعدا

وابتعدوا عن الصحبة السيئة حقا فيمكن ان يكونوا سببا فى اكتساب ليس فقط صفات المنافقين ولكن اسوا من ذلك فاحذروا وتخيروا اخلائكم

وايضا تمسكوا بالصحبة الخيره وخاصة المتقين فمن هؤلاء تتعلم التقوى وترى اسوا ما فيك وتخرج احسن ما فيك ولكن احذروا ان تكونوا وبالا عليهم فان لم تنفعوا هؤلاء فلا تضروهم واحذروا ان تكونوا شياطين الانس التى تكون سببا فى ضلال من تحبون او حتى بعدهم عن طريق الحق ولو ليس الضلال وليس البعد فلا تكونوا سببا فى انحرافهم حتى ولو انحرافا بسيطا احذروا ان تكونوا شياطين

كتب الدكتور المحارب تدوينات كثيرة رائعة واخرها عن السياسة في الاسلام واصدقكم القول كنت اتمنى ان اعرف اى شيء عن هذا الامر خاصة الخلافة

اطلت عليكم ولربما مللتم ولا اعرف لماذا كتبت كل هذا الكلام ولكن احببت فقط ان اتحدث عن تلك المدونات وعن عالم التدوين واذا ما احببتم التدوين فاعلموا انكم لم تخطئوا فحقا نعم الكلام العظة والتذكير بالدين

وارجو ان تعذروننى فى اطالتى

نحن نكتب التاريخ

قول يا تاريخ كلمتك واحنا نقول كلمتنا

قول يا تاريخ ما خلاص عرفنا طريق عزتنا

قول يا تاريخ ما عرفنا تمن دمعتنا

دموعنا دى ألماس حجر صوان زى الرصاص

تجرح العدوان وقلوبنا ما تنداس

قول يا تاريخ ما خلاص عرفنا طريق عزتنا

قول يا تاريخ واحنا نقول كلمتنا

عزتنا فى الاسلام مالنا عزة فى غيره

مهما لفينا ودورنا العش مسيره لطيره

ونرجع لعشنا من تانى ونسيب دنيا فتن وأمانى

وهانسيب شهواتنا علشانك يا امتنا

سيبنا بقى يا تاريخ نقول كلمتنا

وقول كلمتك ده احنا خلاص

عرفنا طريق عزتنا

لماذا أسلم هؤلاء؟

لقد احترت فيما أكتبه عن هذا الكتاب حتى اننى اردت الا اكتب عنه اى شيء من كثرة حيرتى ولكن فى النهاية استقر بى الامر على ان اكتب عدة بوستات

عن بعض اسباب اسلام اليهود فى الكتاب واخر عن بعض اسباب اسلام النصارى واخر عن الرسائل التى احب هؤلاء المسلمين الجدد ارسالها الينا وبعض ملاحاظاتى

وبعد ان شرعت فى الكتابه وكتبت الكثير مسحته كله وسوف اكتب اكثر ما استفزنى من كلام المسلمين الجدد فى الكتاب

وملاحظاتى

كان من ضمن ما قاله "فيدور ايتان جفر نور " أو كما اطلق على نفسه بعد اسلامه "فارض رحمة الله "
فقد كان من السهل الإطلاع على كل الأديان فى أمريكا ما عدا الدين الإسلامى ويرجع ذلك إلى سببين

أولهما:إن الوسائل اليهودية هى التى تتحكم فى وسائل الإعلام من
صحافة وسينما ومسرح وكل شيء

وثانيهما:إنه أن تحول قسم دراسة بأكمله إلى الإسلام وتصادف أن جميع طلبته كانوا من السود والسواد هناك يساوى فى نظرهم الشيطان أو الموت والزنوج يمثلون مقدمة الثورة وكذلك دينهم يمثل دينا خطيرا باعتباره مقدمة الثورة

دى حاجة استفزتنى جدا لما قريتها ومش عارفة ليه حبيت انتوا كمان تقروها

وعلى فكرة معظم او تقريبا كل اللى اسلموا من الناس دي درسول مقارنة الاديان وكلهم قالوا انهم درسوا مقارنة الاديان

اربع سنين ماعدا الدين الاسلامى وفى واحد منهم قال لان المدرس بتاع الصف بتاعه كان يهودى

حاجة جت فى بالى لما قال كده قلت يعني اليهودى احب اليه ان صاحب ملته يتحول للبوذية ولا الهندوكية ولا يتحول

للاسلام بصراحة عجيبة

وإذا كان لى من حديث إلى إخوانى المسلمين فإننى أرجو لهم أن ينظروا إلى ما فى أيديهم من الدين الحق وأن يتمسكوا به ويحرصوا عليه دون أن ينظروا إلى الحياة المادية والسعادة المادية الزائلة التى يبعثها الشيطان و بدلا من أن يستمعوا ألى الموسيقى الجاز والروك اندرول عليهم ان يستمعوا الى صوت المؤذن وهو يناديهم "الله اكبر الله اكبر" "حى على الصلاة " "حى على الفلاح "

الشاب الفرنسي وصال محمد عبد الكريم
و أحب فى هذه المناسبة أن أوجه رجاء ونداء إلى جميع المسلمين وخاصة الذين يعيشون فى فرنسا والدول الأوروبية الأخرى بأن يتمسكوا بتعاليم دينهم وأن يكونوا خير دعاة لدينهم وذلك باتباع
أوامره والبعد عما نهى عنه الإسلام وأن يكونوا قدوة صالحة لعل الله يرحم عباده من تيار المادية و الإلحاد لأن الإسلام لا يحتاج إلا إلى التعريف به و وتوصيله بأمانة إلى أبناء هذه الشعوب وأعتقد بأنه الحل الوحيد لإنقاذ البشرية من

الضلال والهلاك وإنارة الطريق إليهم

الآنسة عائشة شمينوبيير الفرنسية
وأحب في هذه المناسبة أن أعلن فرحتى التى لا تقدر باعتناقى
الإسلام فأنا فخورة بانتمائي إلى هذا الدين واطلب من جميع
المسلمين ان يتعاونوا وان يتعاطفوا مع بعضهم بعضا وان يكونوا
خير مثل لأعظم دين

اللورد الانجليزى المليونير دوجلاس هاملتون
ما يقوله عن المسلمين
انه من الانانية وعدم الامانة على المسلمين الا يعرفوا الآخرين بالاسلام حتى يشاركوهم سعادتهم بتلك العقيدة التى يدين بها ملايين البشر

وكان هناك ايضا من تعجب من حال المسلمين الآن وقال ان الاسلام لا يوجد به ما يجعل المسلمين يرضون بحالهم تلك وان الاسلام دين يدعو الى الحرية والعزة وانه متعجب من ذل المسلمين ورفض ان يمثل المسلمون الان دين الاسلام لانهم لا يحدثون عن حاله

وانا اضم صوتى لصوت ذلك المسلم

وايضا لاحظت ان من اكثر الاسباب التى جعلتهم يعجبون بالاسلام هى الاخوة التى تربط بين المسلمين وبعضهم البعض فى كل مكان

والتى لم تعد موجودة للاسف سوى قليل جدا

دعوة لكل المدونين

المدون ده بيتهيالى لازم يكون حد بيحب حاجتين اوى علشان كده دون القراءة والكومبيوتر او بمعنى اصح النت وبما ان المدونين بيقروا كتير ووانا على مدونة اختى العزيزة رفقه عمر لما اتسالت عن احب كتاب ليها قالت كذا طيب حلو اوى

ليه بقى مش كل المدونين يعملوا لائحة يكتبوا فيها الكتب اللى قروها وحاسين انهم عايزين الناس تقراها بجد ليه لا ساعات كتير اوى بنبقى عايزين نقرا كتاب فى حاجة معينه ومش عارفين نلاقى اسم الكتاب اللى بيتكلم عن الحاجة اللى احنا عايزينها فايه المانع من اننا كل ما نقرا كتاب ويعجبنا ونحس انه كتاب محترم نضيفه

طيب وبعد ما نضيف الكتاب نعمل ايه نقول بقى اول حاجة الكتاب ده عن ايه ونظرتنا ليه ونقول حلو ولا لا واللى بيقرا الكتاب غيره او يعرف ان الكتاب ده مثلا مش صادق او صاحبه مش ثقه يعرفه بدل ما بنقعد نقرا كتب ونصدقها ونطلع مخدوعين في الاخر بجد بتحصل بالذات مع قلة العلم والثقافة والمعرفة

بجد مع اننا المفروض ان امتنا اكتر امة بتقدس العلم والرسول صلى الله عليه وسلم قال فيما معناه لانى جاهله طبعا ومش حافظة اطلبوا العلم ولو فى الصين مع ذلك بيقولوا ان الاحصائيات بتقول ان اقل نسبة للقراءة هيا عندنا

دوشتكوا صح


طيب
اقصر بقى علشان ما تكسروش الكمبيوترات

الكتاب ده كنت بدور على واحد غيره خالص اخر نسخة كانت لسه ماشية امبارح المهم
هو كتاب عن قصص اسلام ناس كان قساوسة ورهبان ونصاري ويهود ومجوسيين ووثنيين المهم كل واحد بيتقال ايه سبب اسلامه وبعض اقوال عن لسانه
بجد كتاب استممتعت بقراءتة طبعا مش كله انا لسه جايباه النهاردة مش هافترى يعني بس انا قريت حوالى 68 صفحة بس المهم هو كتاب حلو وابقوا قولوا لى رايكوا وان شاء الله ابقى اكتب لكم بعض حاجات من اللى فيه