الصديق وقت الضيق

أنا فاكرة إن ده كان درس في العربى في ابتدائي ودايما كل الناس تقول كده يقولوا لك إيه الصديق وقت الضيق لكن فين الصديق وقت الضيق ده

حد عارف؟

أكيد في ناس منكم عارفه لكن أنا ماعرفش

عمركوا جت عليكوا لحظة وقلتوا أنا دلوقتى محتاج صديق أنا دلوقتي محتاج حد أحس بالأمان وأنا بفضفض له وبتكلم معاه أحس إني وقت لما احتاج له هالاقيه

في ناس ها يقولوا لي صاحبي مامتك صاحبي أختك بس اكتشفت حاجة غريبة أوى إن مامتى هيا مامتى وأختي هيا أختي يعني العلاقة اللي بيني وبينهم هيا الأمومة والأخوة يعني اكتر من الصداقة يبقى ازاى بقول إن مامتى هيا صاحبتي وأختي هيا صاحبتي

هو يعني علشان العلاقات دي فقدت معناها عند ناس كتير يبقى خلاص الصداقة ممكن تتضمن الأخوة وبقى لما أوصف أختي بأنها صاحبتي ده حاجة أعلى من إني أقول إنها أختي

يعني علشان أوضح اكتر أنا مش محتاجة أقول على مامتى أو أختي ده أنا مصاحباها لأنه بالفعل في علاقة مش بتمنعنى من إني أنفذ اللي بيحصل في الصداقة وأقوى

بس ساعات الإنسان بيكون محتاج يكون له أصدقاء من بره البيت يعني حد غير أخواته ومامته

دي حاجة غلط ؟؟؟؟؟

الغريب بقى انك يبقى لك أصحاب فعلا بس مش لاقيهم

يعني مثلا أنت عندك مشاكل يا سلام تجنن بلد ومش هاينفع تحكى لهم

أما حاجة غريبة هو كل حاجة لازم تتحكى ساعات يعني بتبقى عائليات ناس عجيبة والله

المهم ما علينا

تيجي تتصل بحد فيهم اللي نايم واللي خرج واللي بيصيف يا سلام سلم واللي بياخد شاور بقى له ساعتين عادى يعني ما هي الدنيا حر بقى واللي مش فاضي لك رايح مشوار عادى برضه

بيني وبينكوا الواحد هو اللي قليل الذوق برضه بيتصل في الأوقات المش مناسبة ولا ايييييييييييه !!!!!!!!!!!!!!!!!!!!!!

بس مش هيا دي الصداقة أصلا انك تلاقى حد في الوقت اللي أنت محتاج له فيه مش في الوقت اللي هو فاضي علشان يبقى موجود علشان يبقى وقتها ينفع تحتاج له


حد فاهم حاجة :)
يللا ماااااااااا علينا

وليس للحديث بقية :)

صور التقطتها

قولوا لى رايكوا فى الصور دى

كنت باخدها كده وانا ماشية او فى العربية او وانا على السطوح عادى يعني فى اى حته ممكن اخد صورة

الدراسة ابتدت

طبعا رجعنا للدراسة وتصوروا بقيت في سنة تانية
حاجة انا طبعا مش مقتنعه بيها يعني ايه انا فى سنة تاية :)

انا لسه صغيرة على انى ابقى فى تانية فى الجامعة :)

اصلى وانا صغيرة كنت ببص للناس اللي في الجامعة دول على انهم ياااااه حلم بعيد حاجة كده انهم عواجيز اصلا :)

ما علينا

اللى عايزة اقوله ان كليتنا بنمتحن فيها كتير يعني اربع مرات فى السنة وكمان سنة تانية صعبة
فيعني
ممكن ابقى اغيب عنكوا اوقات بسبب الامتحانات او المذاكرة

فاستحملونى :)

وادعوا لى بجد محتاجة دعاكوا اوى
وادعوا لى ربنا يبلغنى رمضان

التواضع والغرور والاعتداد بالنفس

طبعا عن التواضع والغرور بيتهيألي مفيش طفل مش عارف إن التكبر حرام وأن من تواضع لله رفعه

لكن الفرق مش بين التواضع والغرور الفرق بين الغرور والاعتداد بالنفس

الاعتداد بالنفس إن حد يبقى عارف مميزاته كلها وعارف إنه من الأصل عنده مميزات ومش بيتغاضى عن عيوبه
ومعرفته لمميزاته دي مش بتخليه يتكبر على الناس أو يغتر بنفسه أو يحس بالعظمة مثلا
لا بس الاعتداد بالنفس ممكن نسميها ثقة في النفس وكمان في القرارات اللي بتاخدها بناءا على إحساسك بنفسك

الغرور بقى حد وثق في نفسه زيادة عن اللزوم أوى لحد لما حس بالعظمة
وممكن الغرور ده يكون من غير أساس أصلا يعني ساعات تلاقي حد مالوش أي لازمة في الدنيا كده ومغرور بنفسه عاااااااادي يعني !!!!!!!!!!!!!!!

الغريب مش الغرور والتواضع والاعتداد بالنفس

الغريب المفارقات اللي بتحصل نتيجة وجود اختلاف بين الناس وبعضها في العادات والتقاليد والبيئة والتربية اللي بتنتج عنها اختلافات أكيد في الأخلاق و السلوك والآداب العامة

يعني مثلا تلاقي إنسان أهل للاحترام كريم وكريم الأصل وعلى خلق ومتواضع المفارقة بقى في التواضع هنا مع حد تاني مغرور بدون الحاجات دي كلها يعني مغرور بإيه ماتفهموش والغريب لما حد كده يتكبر و يتغر على الإنسان المتواضع

والمتواضع عادى يعني مكمل التواضع للآخر لأنه محترم وأصيل

مش مفارقه غريبة ؟!

نيجي بقى للفرق بين التواضع والوضاعة

التواضع هو انك إنسان أهل للاحترام ومع ذلك بتتعامل مع الناس على قدر عقولهم وبيئاتهم وألسنتهم يعني بتعاملهم زى ما تحب الناس تعاملك بالأدب والأخلاق والرفق والمودة

الوضاعة بقى وده إن الإنسان يكون وضيع يعني دنيء يعني من الآخر حاجة كده وحشة أوى

كنت قريت إن الكبر على أهل الكبر صدقة مش عارفه ده صحيح ولا لا بس لما فكرت في الكلمة قلت ممكن لأنهم لما يحسوا أد إيه الكبر بيضايق هايبتدوا يفهموا فيبطلوا جايز الله اعلم

تفتكروا لما الإنسان يفضل على تواضعه مع حد متكبر والمتكبر ده يتهياله من تواضع اللي قدامه إن هو وضيع يعني إن صفاته لا تؤهله لأنه يكون زيه بيتهياله إن أي حد عنده الصفات دي لازم يكون زيه متكبر يعني مش ده غلط

مش المفروض بقى الإنسان المتواضع ده يبتدى يعتد بنفسه ويحسس أهل الكبر أد إيه هو جاااااااااااااااامد يعني بس هو اللي مش راضى يرسم نفسه عليهم علشان هو محترم
ولا انتوا رأيكوا إيه ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

خناقات ... خناقات

ليه لما بنيجي نتكلم مع حد مش بنسمع هو بيقول إيه ليه دايما مش بنسمع غير نفسنا

ليه لما بنيجي نتكلم مع حد مش بنسمع الكلام بس أهم حاجة نرد حتى لو على كلام ماتقالش حتى ولو على افتراض افترضنا إن اللي قدامنا ها يقوله وهو ما قالوش

هو يعني انتى كنتى دخلتي في نية الناس يا شيخة ده انتى غريبة

أي اتنين بيتخانقوا بيكون في أسباب لخناقهم لو قلنا مثلا واحد من الأسباب هو مشكلة

يعني مثلا واحد وزوجته اتخانقوا على أي حاجة أيا كانت بس هيا خناقة نتيجة مشكلة مطلوب منهم يحلوها
ماتفهموش ليه تلاقيهم هما الاتنين بيتخانقوا واهم حاجة إن واحد فيهم هما الاتنين يبقى بريء من التهمة الشنيعة المريعة الفظيعة دي ويكيل الاتهامات للطرف التانى ومش شايف غير نفسه في الحوار

طيب ليه مش فاهمين إن انتوا الاتنين مش في حرب ولو خليناها حرب يبقى انتوا في جبهة واحدة يبقى الصوت العالي لازمته إيه والكلام اللي مالوش لازمة فايدته إيه
ماااااااااا علينا

لو اتنين تانيين بيتخانقوا لو نتيجة مشكلة يبقى قلنا بهدوء وتتحل لو نتيجة إن حد في الاتنين أعصابة تعباانه مثلا أو مضغوط أو أيا كان وطبعا نتيجة كده هاتلاقيه بيقول اللي قدامه كلام ماقالوش يعني لو قال له طيب انت زعلان ليه دلوقتى يقول له يعني انت شايفنى مجنون ولا هيا تقول يعني انت شايفنى نكدية وما بصدق كده يعني

ليه اللي نفسيته تعبانه ده ما يروحش بكل بساطة ويحكي على اللي مضايقة ويفضفض ولو زى حالاتي يعني ومش بيعرف يفضفض يبقى يتنيل يترمى على جنب لحد ما أعصابة ترتاح ويبطل يجر في شكل الناس

مثلا يعني

طيب وليه الطرف التانى بدل ما أخينا ولا اختنا اللي أعصابهم تعبانه يترموا على جنب ليه الطرف التانى ما يحسش بألم الطرف الأول ويحاول يخفف عنه مش لازم يعني يعرف هو متضايق من إيه بس ممكن يحاول يحتويه لحد ما الأزمة تعدى وخلاص

ليه بقى لما يبقى في مشكلة بين أطراف متعددة وفى عامل مشترك زى بتاع الرياضة العامل المشترك ده إنسان وبني ادم والله بيحس وعنده شعور وكل مصيبته انه بيتكلم مع كل الناس اللي بيتكلموا مع بعض برضه بس بما إنهم مش بيسمعوا بعض بيروحوا للعامل المشترك الغلبان ويفضفضوا له كلهم كل الأطراف بقى ما هي هيصة

والعامل المشترك بقى مش بيعرف يفضفض هو التانى فأحسن حاجة يروح يرمي نفسه في البحر أنا بقول كده برضه أحسن واهو يريح ويستريح ولا انتوا رأيكوا إيه

طيب وليه لما يكون في مشكلة فيها عامل مشترك العامل المشترك وإحنا قلنا هو إيه قبل كده فاهم غلط وده نتيجة انه بيسمع لناس وبيسيب ناس طيب يا عامل يا مشترك خليك عادل زى ما بتسمع من ناس اسمع من ناسين بقى وريح العامل المشترك الاولانى بدل ما هو شوية وها ينتحر

وبعدين انت فاهم غلط والمشكلة انت تقدر تحلها بأنك تفهم صح ولما تفهم صح ها تعرف انت المفروض تعمل إيه يبقى ليه وجع القلب للعامل المشترك الاولانى


وبعدين يا عامل يا مشترك يا حبيبي انت قيمتك غالية أوى يعني انت من غيرك كل مسائل الفيزياء والرياضيات مش ها تتحل يعني المفروض الطلبة والمدرسين والعلماااااااء من قبلهم يكونوا هما عارفين قيمتك

يبقى إيه بقى


بقول إيه

بلا عوامل مشتركة بلا رياضة بلا فيزياء بلا زفت
يلا بلا وجع قلب اشوفكوا على خير من اعماك اعماك نهر النيل