وادع إلى سبيل ربك

زرت مدونة امرأة مثليه وبصراحه ندمت لأنى بجد يعني حسيت بشعور خليط من مش عايزة اقول قرف واستياء وحاجات كتير كده ملعبكه مش عارفه اوصفها

وبصراحة صعبت عليا مدونتى اوى واسمها واسمى من انهم يتحطوا فى تعليق عند حد كده

بس في الآخر لقيت ان البنت دى وكل اللى عندها زيها هايتعلقوا فى رقبتى يوم القيامة ويقولوا لي انتى شفتينا بنعصي ربنا وما قلتيش لينا ده حرام ليه وساعتها بقى ما هايصدقوا وهايتلككولى ما انتوا عارفين

وبعدين احنا امة وسطا نأمر بالمعروف وننهى عن المنكر وكل واحد ما عملش كده هايتسال وهايتحاسب يوم القيامة انه شاف منكر وما غيروش

وبصراحه انا صعبت عليا نفسي اتحاسب على ناس كده

المهم انا كنت يا مؤمنين عاملة كشكول كده اسمه خواطر ايمانية الكشكول ده ايه كل لما اقرأ آية من القرآن الكريم واحبها اوى وتاثر فيا وكده يعني اكتبها فيه

حبيت اغير الكشكول ده فطبعا بنقل كل القديم وقريت الآيات اللى كنت كاتباها وكل آية لقيتني بفسرها عليهم بجد قلت ياااااااااااه لو يقروا الآيات دى ويتدبروها كده فعلا هايفوقوا بس لو يتدبروها و قلت انا اقولها لهم يمكن اخد فيهم ثواب مع انى مش واثقه فى الموضوع ده بصراحه

المهم

انا ناوية باذن الله اكتب بوست للناس اللي كده مخصوص يعني وبما انه فى الغالب هايبقى طويل حبتين فممكن انزله على كذا جزء

انا هاعمل الموضوع ده ليه

اول حاجة

كل مذنب مش بيحب حد يشتمه يعني مثلا كان فيه واحد بيتبول فى المسجد النبوى فالرسول صلى الله عليه وسلم لما لقى الصحابة كلهم قايمين وبينهروه

قال لهم اتركوه ولا تذرموه طبعا انا مش حافظة نص الحديث

بس في الآخر الرسول صلى الله عليه وسلم فهم الراجل ان دى حاجة ماينفعش تتعمل فى المسجد

والله يا جماعه اللى يعرف الحديث يقوله وانا هابقى اشيل الكلام ده كله واحطه المهم ان الراجل فى الآخر قال ايه اللهم اغفر لى ومحمدا ولا تغفر لأحد سوانا

هو راجل على اده برضه بس اتعلم

الغاية من الكلام الكتير ده ايه

ان معظم الردود شتيمه والفاظ مش كويسه ابدا ماكنتش مصدقه نفسي وانا بقراها بصراحه بجد الفاظ فظيعه جدا

احنا يا جماعه ربنا قال فينا ايه المسلمين يعنى

بسم الله الرحمن الرحيم

وَمِمَّنْ خَلَقْنَا أُمَّةٌ يَهْدُونَ بِالْحَقِّ وَبِهِ يَعْدِلُونَ

سورة الأعراف الآية 181

يعني احنا بنهدى الناس وندعوهم بالقرآن الكريم وبالحسنى ولازم نفتكر ولو كنت فظا غليظ القلب لانفضوا من حولك

انا مش بدافع عن الناس دي ابدا ابدا ابدا

لا حول ولا قوة الا بالله لا انا بتكلم عن منهج دعوة انه الدعوة مش بالشتيمه

يعني نفترض مثلا واحد كافر رايح انت تدعوه للاسلام انت يا كافر يا ابن كذا يا فاسق يا يا يا انت تيجي دلوقتى حالا تسلم وتصلح نفسك والا تكون وتكون وتبقى وووو وتقعد تشتم فيه

طيب غنى بقى من هنا للصبح وشوف مين اللى هايعبرك ويهتدى على ايديك انت جاى تعمل عليا انا داعى للخير ومش عارفه ايه

ماهو ده رد فعل طبيعى ده الحيوان لما بيتشتم بيزعل وبتتحاسب على شتيمتك ليه فما بالك ببنى ادم

والمنهج ده انا قصدي عليه مع كل الناس مش دول بس حتى مع الملحدين وغيرهم من الناس اللى بتقول كلام يجيب كوابيس دي

فدى اول ملاحظة ان الناس بتدخل تشتم بس مش هانكر فيه كمان ردود كويسه جدا ولاحظت انه البنت دى مش بترد عليهم وبتتجاهلهم تماما وده من باب الهروب على فكرة

كمان لاحظت حاجة تانية ودى من فوائد انك تقرا من المواضيع القديمه كانت بترد فى التاج ولما اتسالت من احب ست اشخاص لقلبك كان كلهم ستات ماما واختى لاحظت انها ما قالتش اخويا ولا حتى بابا الله يرحمه

وده بقى دليل انها اتاذت منهم يعني كانوا بيعاملوها وحش او جايز بيضربوها قاسيين يعني مش لازم هيا يعني ممكن جدا يكون حد عزيز عليها او مش لازم حد يخصها ممكن اى واحدة من اللى زيها يكون ده سبب انحرافهم عن الفطرة

ملاحظة تانيه كانت كاتبه موضوع بتحمد ربنا اوى فيه على انها عرفت تفسير الآية بتاعت فعظوهن واهجروهن فى المضاجع واضربوهن فإن اطعنكم فلا تبغوا عليهن سبيلا

انا مش حافظة نص الآية وللاسف مش عارفه رقمها

بس المهم انها كانت بتقول عن انها دورت فى المعاجم ولقت ان كل معنى لاضربوهن هو البعد مش الضرب الضرب

ده حاجة تانيه لاحظتها من كلامها فده اللى خلانى اخمن مجرد تخمين خاضع للصواب والخطأ انها كانت بتتضرب

اتكلمت كتير اوى زهقتوا صح :)

معلش معلش استحملونى للآخر وماحدش يدعي عليا بقول لكوا اهو:)

نكمل بقى

كمان على مدونة كريم نبيل ولا كريم عامر ايا كان ربنا يهديه

برضه الردود عنده ايه شتيمه وتعفن فى السجن وانت اصلا حصل لك اللى تستاهله وكلام من كده

وحاجة تانيه لاحظتها عند الشخص ده ان ماكانش في حد بيعبره خالص قبل ما يتكلم عن الدين يعنى للاسف الناس قبل ما يلحد ماكانش في حد بيعبره ولا حد بيقول له حاسب انت كده ماشي غلط وهاتقع

كمن بنى بنيانه على جرف هار فانهار به فى النار يعني لما الحد للاسف ابتدت الناس ترد عليه وردود بشتيمه وكلام من كده

انتوا مش عارفين ان الشتيمه دى بترضى غرورهم لانها نوع من انواع الاهتمام اه بجد ما هما زى الاطفال مش بيقولوا لما الطفل يتصرف بطريقة مش كويسه تجاهلوه لانه حتى لو نهرته يعني زعقت له وكده ده بيترجم عنده اهتمام فللاسف انتوا بتحسسوهم انهم مهمين وحاجة من غيرما تقصدوا

طيب ليه يا جماعة تاخدوا ذنوب فى حاجة ماتستاهلش

لو هاترد فتدعوا الناس بالحكمة والموعظة الحسنة هو قيل ادعوا الناس بالشتيمه والتهزيق

احنا امتنا غايتها ايه ربنا هو اللى قال عننا يهدون بالحق احنا مش همنا ان الناس تسمع كلامنا فاللى مايسمعوش يتشتم لا احنا همنا ان الناس تهتدى

ولو ما اهتدوش فلا يضركم من ضل اذا اهتديتم

كمان انتوا عارفين قصة كعب بن مالك اللى تخلف عن غزوة العسرة لو حد ما يعرفهاش ابقوا قولوا لى وانا اكتبها لكم

المهم

الراجل ده لما رسول الله صلى الله عليه وسلم امر كل الناس انهم مايتكلموش ولا معاه ولا مع الاتنين التانيين جاءت له رساله من ملك غسان بيقول له ايه

أما بعد

فإنه قد بلغنا أن صاحبك قد جفاك ولم يجعلك الله بدار هوان ولا مضيعه فالحق بنا نواسك

يعني ايه هاتفهموا حالا

معظم الردود اللى عند البنت دى من ناس ملحدين وعلمانيين وليبراليين وامريكان بيشجعوها ويقولوا لها برافو انتى كده كويسه انتى بتعبرى عن رايك ومش عارفه ايه

الناس دول بيلموا سقط المتاع يعني ايه يعني البنت دى واللى زيها وقعوا من ركب المسلمين من قافلتهم للاسف لسه بيحملوا اسم مسلمين هما لا يحملون الدين ولا الملة فقط الاسم وتتعجب لما تلاقيها كاتبه ان شاء الله وربنا يسهل وكلام من كده يعني انتى بتطلقى على نفسك اسم مسلمة طيب اممال فين ياللا ربنا يهدي

ماهو الناس دول بقى اللى زى ملك غسان كل اللى بيعملوه ايه يشجعوا اللى زيها علشان فى الآخر يقولوا شوفوا المسلمين دول ايه شوفوا بيعملوا ايه

بجد دى اهداف خفية بجد لو تفكروا هاتلاقوا عندى حق

فاحنا مهمتنا اننا ندعوا الناس مش نشتمهم

مهمتنا اننا نصلح

الناس اللى بتشجعهم دول بيشجعوهم ليه لان البنت دى واللى زيها من المجاهرين والمجاهرين دول مش بيتغفر لهم لانهم بيجرأوا الناس على المعصية

يعني لو انا بنت بسمع اغانى وبعمل مايك اب وبلبس مش كويس وكده وعايزة ربنا يتوب عليا اجي بقى اشوف الكلام ده اروح قايله الله طيب ده انا كويسه يعني بالذمة انا ولا هي ده شوف هيا بتعمل ايه بقى ربنا هايسيبها ويحاسبنى مش عارفه ايه فالناس دي ممن يحبون ان تشيع الفاحشة فى الذين آمنوا

فنحرص يا اهل الدين انه لما البنت اللى دينها مش ثابت وايمانها ضعيف تدخل وتقرا عند واحدة زى دى كلام زى ده تلاقى فى الردود رد شافي يعنى تلاقى رد يقولها حاسبي ده غلط خدي بالك الشيطان بيزين لها عملها انتى مش تقعى فى الغلط انا بتكلم كانى بكلم طفله ها بس صدقونى الواحد وقت المعصية فعلا بيكون عقله ضايع خالص وبيكون فعلا طفل ومش عارف هو بيعمل ايه بيبقى ساير على غير هدى تايه محتاج ايد تتمد له فاحرصوا ان اللى هاتدخل تقرا الكلام ده تلاقى الايد دى

تاكدوا مليون فى الميه انها مش هاتبقى مهتمه بالموضوع اد اهتمامها بالردود

بس لما تشوف الردود هاتفكر فى ايه ان البنت دى بس بتعبر عن رايها وان دى حريتها الشخصية طيب فكروا كده معايا ليه

انا طبعا بتكلم عن البنات اللى تفكيرهم على ادهم (قدرهم يعني )

هاتشوف اللى انا شفته الا وهو شتيمه او ناس بتشجعها

انسانه طبيعيه هاتقعد تقرا شتيمه لا طبعا لانها اصلا الفاظ قاسيه وتجرح العين

اما غير كده هاتقرا ناس بتشجع ودى مصيبه

حتى الناس المعتدلين مش بيردوا ليه لانهم بيشفقوا على نفسهم من اللى هايسمعوه قصدى اللى هايقروه فى الرد عليهم او حتى زى حالاتى اشفقت على نفسي

فيا جماعة نختم بقى الحدوتة الطويله العريضة دى اللى زهقتكوا فيها بانه

اللى يدخل عند الناس دي مايشتمش يدعوا بالحكمة والموعظة الحسنة

فى ناس هاتقول لى طيب ما يعلقش خالص لا

احذر واحذرى

لو شفت منكر واضعف الايمان لم تامر بتغييره ولم تنهى عن المنكر وتامر بالمعروف حتى ولو بكلمة اتق الله

فهاتتحاسب وهاتتحاسبي عن كل بنت بتعصي الله ما نهيتيهاش وعن كل بنت ممكن تضل بسبب الكلام ده

إضافة

بعد قرائتى للردود على اخر تدوينة فى مدونة اهل الجنة

اخى العزيز لو كنت حضرتك بتزور مدونتى يعني

عندك واحد اسمه ابن حجر العسقلانى ليه ردود عندك كتير اذا كان أخطأ فخذه بالحسنى يعني قل له ده غلط والصح كذا هانقول هو بيسال غلط وبيتكلم غلط

حضرتك هو سأل بالطريقة اللى بيفكر بيها طيب طريقة تفكيره غلط يبقى نساعده انه يغيرها نساعده انه يفكر صح

نقول له الصح فين والغلط فين وده يتعمل وده ما يتعملش

مش ننهره ونقول له انت غلط او ايا كان

طيب الولد جه وقال يا جماعة انا بسال فى كذا وكذا يبقى واجبنا اننا نرد على اسالته مش اننا نقول له انت غلطان انك سالت طيب ماهو احنا كده نبقى بنقول له انت غلطان انك سالت ماتسالش تانى ونسيبه مع نفسه وشيطانه وزى ما يفكر يفكر

انا يا جماعة مش بتكلم عن ابن حجر العسقلانى بالتحديد لا انا بتكلم على وجه العموم

لما نلاقى حد ابتدي يخرج من الطريق الصح ننادى له

مش ربنا بيقول ان العبد لما بيبعد عنه يناديه من قريب ولله المثل الأعلى

واما عن اللى كان حاطط صورة جيفارا ده نسيت اسمه

الراجل ده اللى شكله يسارى باين ولا ليبرالى الراجل ده نقول فيه

ولا يضركم من ضل اذا اهتديتم بس كمان نرد عليه رد شافى مهما تطاول فى الحوار ومهما تلاعب بالالفاظ مهما عمل نرد احنا عليه زي ما ربنا امرنا مش نتنرفز ولا حاجة ليه

علشان لما واحد معلوماته الدينيه وثقافته مش اد كده ومش عارف ايه اللى بيحصل فى الدنيا يقرا كلامه يلاقى رد تانى من ديننا من كتابنا وسنتنا ورد علمى ورد واضح وصريح

يعنى بمعنى اصح تحجه

ليه علشان لما حد يقرا الكلام يبقى فاهم وعارف الشيء وضده والغلط والصح

يا جماعه اللى عامل مدونة وغرضه منها ولو حسنة واحدة فى ميزانه يصبر عاللى هايشوفه الصبر يا مدونين ويا مدونات الصبر

ده رسول الله صلى الله عليه وسلم كان بيرجم بالطوب من الاطفال لما كان فى الطائف ومع ذلك لم يتوقف عن الدعوة ولم يكن فظا ولا غليظ القلب

الصبر

اصبروا و صابروا ورابطوا

وادع الى سبيل ربك بالحكمة والموعظة الحسنة

ولو كنت فظا غليظ القلب لانفضو من حولك

وما دخل الرفق فى شيء الا زانه وما خرج منه الا شانه

الحلم يا جماعه الحلم

والصبر

انا بصراحة تعبت من الكتابة واكيد انتوا زهقتوا منى ومن المدونة ومن النت كله اصلا ودى بنت لكاكة وبتحب الكلام زى عنيها و

اى

ليه كده بس مين اللى طفى النور

اه يا دماغى بلاش طوب يا جماعة ربنا يخليكوا

رسالة الى عاص

47-

وَيَوْمَ نُسَيِّرُ الجِبَالَ وَتَرَى الأَرْضَ بَارِزَةً وَحَشَرْنَاهُمْ فَلَمْ نُغَادِرْ مِنْهُمْ أَحَداً



48-

وَعُرِضُوا عَلَى رَبِّكَ صَفاًّ لَّقَدْ جِئْتُمُونَا كَمَا خَلَقْنَاكُمْ أَوَّلَ مَرَّةٍ بَلْ زَعَمْتُمْ أَلَّن نَّجْعَلَ لَكُم مَّوْعِداً



49-

وَوُضِعَ الكِتَابُ فَتَرَى المُجْرِمِينَ مُشْفِقِينَ مِمَّا فِيهِ وَيَقُولُونَ يَا وَيْلَتَنَا مَا لِهَذَا الكِتَابِ لاَ يُغَادِرُ صَغِيرَةً وَلاَ كَبِيرَةً إِلاَّ أَحْصَاهَا وَوَجَدُوا مَا عَمِلُوا حَاضِراً وَلاَ يَظْلِمُ رَبُّكَ أَحَداً



50-

وَإِذْ قُلْنَا لِلْمَلائِكَةِ اسْجُدُوا لآدَمَ فَسَجَدُوا إِلاَّ إِبْلِيسَ كَانَ مِنَ الجِنِّ فَفَسَقَ عَنْ أَمْرِ رَبِّهِ أَفَتَتَّخِذُونَهُ وَذُرِّيَّتَهُ أَوْلِيَاءَ مِن دُونِي وَهُمْ لَكُمْ عَدُوٌّ بِئْسَ لِلظَّالِمِينَ بَدَلاً

60-

مَّا أَشْهَدتُّهُمْ خَلْقَ السَّمَوَاتِ وَالأَرْضِ وَلاَ خَلْقَ أَنفُسِهِمْ وَمَا كُنتُ مُتَّخِذَ المُضِلِّينَ عَضُداً

بالله عليكم ادعوا لها

يا جماعه بهلولة فى المستشفى فى انتظار انها تعمل عملية يوم

18/7/2007

لقيت بهلول هو اللى كاتب الموضوع على مدونتها
بالله عليكم ادعوا لها بالشفاء وربنا يرجعها بالسلامة لبيتها واولادها وزوجها

بسم الله الرحمن الرحيم
تحديث يا جماعة
الحمد لله
بهلولة عملت العملية وبقت كويسه الحمد لله
ربنا يتم شفائها على خير اللهم آمين
وترجعى لنا بالسلامة يا بهلولتى يا عسل كده يارب

فضفضه

مش عارفه انا هاكتب الكلام ده ليه بس صدقونى انا محتاجة اقوله

انا مش عارفه ابتدى منين بس هاكتب وابقوا اعذرونى بقى على عدم الترتيب

انا متضايقه اوى وتعبانه اوى من كل حاجة فى حياتى بجد عارفين لما توصلوا لدرجة انكوا مش عايزين تصحوا من النوم بس بتقوم من السرير علشان تصلى

حاسه ان كل حاجة فى حياتى غلط مش حياتي اللى هى انا يعني انا بس لا انا وحياتى دى يعني كل حاجة حواليه

قريت دلوقتى موضوع عند كاسبر بيقول ان احنا قاعدين ننتقد كل حاجة حوالينا ماهو احنا الناس دي واحنا المجتمع ده صحيح فعلا وهو عنده حق

واعذرونى بقيت دايما اتكلم عن مواضيع مدونات تانيه فى تدويناتى بس ده لانى بتاثر بالكلام اللى بيخرج من القلب وبيوصل لى

لما بفكر احنا امتنا دى هاتتصلح ازاى بحس انها حاجة شبه مستحيله بس الغريب انى متاكده انها هاتتغير ازاى ماعرفش

طول الوقت بنتكلم عن سلبيات وعيوب صحيح مش بننكر الايجابيات بس بجد فيه سلبيات كتير اوى ومشاكل كتير اوى

انا مشكلة من المشاكل دى اه والله هاقول لكوا حاجة اقروا تدوينة كل منا امه وهاتفهمونى هاتفهموا يعني ايه انا مشكلة من المشاكل دى

لما بفكر فى ان كل بنت فى مجتمعنا حاليا مافيش حاجة فى حياتها اسمها امة المسلمين بجد مفيش واحدة بتفكر فى فلسطين والعراق ولا البوسنه ولا حد لسه فاكر البوسنه اصلا الظاهر ان كل المسلمين بقى عندهم زهايمر مش انا بس

لما كنت اتكلم مع واحدة من اخواتى وهما ماشاء الله عندهم اولاد وكده بقول لهم ربوا اولادكم على حب الشهادة والجهاد فى سبيل الله واحدة فيهم قالت لى جهاد ايه قولى يطلع لعيب كورة :)

والتانية تقول لى شهادة ايه وانا هاربى الواد علشان يتهف فى عقله ويسافر فلسطين ويروح يموت وتروح قايله لى هو محمد جوزى عايز يربيه على كده اصل محمد ده طيب ويعرف ربنا :)

اما بقى صحباتى البنات بتوع ثانوى اللى هما ماتعدوش كونهم زميلات كان اهم حاجة عندهم يتكلموا عن كل الناس وعن اى حاجة كدب او صدق واللبس والماكياج والعرسان والكابلز وبس علشان كده ماكانش ليا اصحاب فى ثانوى وماكنتش بتكلم مع حد كانت لما واحدة تحب تيجي تفضفض لى وانصحها وخلاص اصلى كنت متدينة اياميها الله يرحم الذى مضى بقى

واما صديقاتى فى الجامعه فربنا يبارك فيهم محترمات ومتدينات الحمد لله بس عمرى ما هانسي المرة اللى كانوا هايضربونى فيها وقالوا لى والله لو ما بطلتى تتكلمى فى الموضوع ده هانسيبك ونمشي عارفين كنت بتكلم عن ايه عن فلسطين :) ما تزعلوش يا بنات بس ده حصل فعلا ماليش دعوة :)

اخويا بقى ربنا يخليه ليا يارب هو الوحيد اللى بحس ان عنيه بتبقى مبسوطة بيا بجد عارفين اخويا ده ظابط من اللى بتسالوا طول الوقت فى التاجات بيبقى احساسك ايه لما تشوف واحد منهم فى الشارع عارفين كان هايموت فى مرة او بمعنى اصح كان هايتشرح واكبر حته فيه كانت هاتبقى زى البفتيك كده ده للستات اللى بيعرفوا يطبخوا هايفهمونى وهو كان بيقبض على تاجر مخدرات بيحكي لى اللى حصل بيقول لى عارفة لما رجعت القسم كان كلهم مبسوطين ومش عارفه ايه اتارى اللى هو كان رايح يقبض عليه ده كان حاجة كده ماحدش عارف يجيبه وايه قبض عليه فى مولد والصعايدة بقى مايقبلوش حد يقرب لهم حتى ولو غلطان ماهم مش عارفين هايبقى بيتهيالهم ان ده ظابط ابن ....... وبيغلس على قريبهم وخلاص

ماهو ده ظابط من اللى بتسالوا عن احساس اللى بيشوفهم يعني هاحس بايه بجد السؤال ده بالذات ببقى مستنيه اجابة كل واحد عليه

ليه ازدواجية المعايير فى واحد رد وقال احنا صحيح بنلعن ..... بس اول ما بنتسرق بنجرى عليهم

ومش هاقول كلهم كويسين انا نفسي بخاف منهم وانا ماشيه فى الجامعه مش هاكدب ومن غير ما اعمل حاجة بس لمجرد انهم مستقدرين

اكوام المهملات اللى ماليه الشارع اللى مش عايزة اقول لكوا كنت مضطرة لحاجة من اتنين في مرة علشان اعرف اعدى الشارع يا اما العب اكروبات يا اما الف لفه طويله عريضه علشان اشوف ملف اعدى منه وطبعا لعبت اكروبات :) ماهو مش هاروح لاخر الشارع

الاعلانات اللى زى الزفت اللى ماليه التليفزيون بالذات واحد فيهم بيموتنى الاعلان بتاع ادينا بنفرفش ورانا ايه ورانا ايه ادينا بندردش ورانا ايه ورانا ايه قلت يا سلام لا ماوراناش حاجة ولا ورانا شباب مش لاقى شغل ولا بنات مش عارفه تتجوز علشان الشباب الفقرانه ولا ورانا حاجة خالص ولا ورانا ثانوسخه عامة (سورى فى اللفظ يعني بس انا مسمياها كده ) ولا ورانا تنسيق ولا حاجة خالص

كمان بفكر فى الحياة الزوجية فى مجتمعنا زى بهلولة وبهلول ومش عارفه بهلول مابقاش بيكتب ليه وزيهم كتير مش هما بس

اهل الجنة كتب عن التهديف كل حاجة وليها هدف حتى الزواج فى الاسلام دلوقتى صدقونى ومن على ارض الواقع بقول لكوا مفيش شاب بيتجوز فتاة وهدفهم كل هدفهم انهم يخرجوا اسرة مسلمة بجد والله انا اعرف ناس مخطوبين كتييييييييييييير ومفيش حد منهم سمعته جاب سيرة ربنا ولا ان هدفه يخلف طفل يربيه على طاعة الله ولا على الاسلام الحقيقى وهو فى اسلام مش حقيقى على الاسلام يعني معلش اصل فى اسلام تانى فى الاعلام بقى كلكوا عارفينه

عارفين انا دلوقتى لما ببص للدنيا كده وهاقول لكم تشبيه مقرف حبتين واعذرونى حد فيكم راح يصطاد قبل كده ومعاه علبه فيها الطعم انتوا طبعا عارفين الطعم ده ايه بلاش قرف يعني تخيلوا بقى بجد الدنيا شكلها زى العلبه دى حاجات عماله تتحرك بس من غير هدف يعععععععع عارفه بس محدش يقول الله يقرفك مش ناقصه اكتر من كده بقول لكوا اهو اصل هاخد كرسي واطلع اقعد على سطح البيت (اللى هو الروف يعني :) واقول ان شالله هما ان شالله هما :) )

انا اتخنقت من كل حاجة انا يوم 28 هايبقى عندى 18 سنه لو هانقول انى هاتحاسب عليهم يبقى داخله جهنم راكبة اير جيت سوبر سونيك ده انا بيتهيالى والله يا جماعة ما عملتش حاجة عدله فى حياتى لن اتالى على الله واقول مش هايغفر لى انا ظنى فى ربنا خير الحمد لله

انا زيي زي كل شاب وبنت دلوقتى ايه الفرق بيني وبينهم كلنا دماغنا فاضيه وعايشين حياتنا ومش بنفكر غير في نفسنا

هاقول لكم حاجة غريبه الفكرة دى بالذات بتيجي فى بالى وانا بصلى

وانا بصلى بسرح زى ناس كتير وبفكر فى حاجات دنيوية ساعات بيبقى نفسي اوى امد ايدي جوه دماغى اطلع منها الافكار دى علشان اعرف اصلى وفى الوقت ده بالذات بفتكر اهل سقر يقال انهم بيخبطوا رؤوسهم فى الصخر فى جهنم حتى تتفتت ولما تلتئم يرجعوا يعملوا كده تانى ببقى هاتجنن لمجرد فكرة انى ممكن ابقى فى سقر

انا عايزة اتغير عمرى فى حياتى ماكان عندى القدرة على انى اتغير بس الحمد لله ربنا بعت لى هدية على طبق الماس مش فضه هى اللى خلتنى اتغير الهدية دى كانت سبب في اني افتكر نفسي او مش نفسي افتكر قلبى اللى خرب ايام ماكان عامر صحيح الهدية دى بعدت بس ما خرجتش من قلبى ولا حياتى وان شاء الله ربنا يجمعنى بيها تانى

مش عارفه هل الكلام اللى انا قلته ده ينفع يتقال ولا لا كله كلام خاص جدا وشخصي جدا جدا بس صدقونى انا كنت محتاجة اقول الكلام ده اوى لانى بجد تعبت اوى اوى وصدقونى انا عايزة ارتاح حتى ولو هاموت بس ارتاح

مدونة تحكى حكاية انسان

كل مدونة تدخلها انت لا تقرا بها كلمات ولا سطور لكل مدونة هدف ولكل مدونة حكاية وكل مدونة هى انسان

دخلت عالم التدوين بالصدفة البحته ولم اكن اعلم ما التدوين ولا المدونات

عرفت التدوين بعد قرائتي لبعض التدوينات فى مدونة عبد الكريم نبيل والذى يطلق على نفسه الان اسم كريم ولا اعرف له من الكرم ولا النبالة نصيب ولا حول ولا قوة الا بالله عسي ان يهديه الله

بعد قرائتي لبعض تدويناته وكان منها ما اسماه وداعا شهر النفاق يومها قرأت تلك التدوينات وبعض التدوينات عن التنصير والفتيات المسلمات اللاتى يذهبن ليتنصرن وغيره الكثير يومها لم أستطع أن انام كانت ليلة مليئة بالكوابيس ... حقا ... كانت ليلة شاقه ومرهقة واحساس بالذنب فظيع وبكاء

ليلتها فكرت كم اننى لم افعل شيء لديني كم انا مقصرة كم لم اشكر نعمة الاسلام كم قصرت بذنوبى انا تنصرت تلك الفتيات بذنوبى انا الحد هؤلاء وارتدوا

لا اعرف ولكن احسست بالذنب لاننى لا استطيع ان افعل شيئا بعدها عرفت انه يمكننى ان تكون لى مدونة وبالفعل وقتها قمت بالغاء كل ايميلاتى القديمة وعملت ايميلات جديدة وعملت المدونة ونويت ان اتغير

ولكن ليس دائما التغير يكون للاحسن

شتان بين تلك الفتاة التى عرفت معنى الشوق لله وبين تلك الفتاة التى تسترجى قلبها للحضور فى الصلاة والله يهدي من يشاء

كل مدونة اتعرف عليها جديدا يجدنى اصحابها اعلق على مواضيع قديمة وليس كل مدونة ففى بعض الاحيان اكتفى بقراءة التدوينات دون تعليق ولكن كل مدونة جديدة اتعرف عليها اقرا كل التدوينات الموجودة بها واذا كانت طويلة اقسمها ولكن تقرا كلها حتما

لماذا؟

لان كل مدونة هى تاريخ انسان يسجل حياته على صفحات اليكترونية صحيح ان ليس كل المدونات خواطر او يوميات وليس كلها شخصية ولكن لتفهموننى عليكم قراءة ما بين السطور والكلمات حقا

فى بعض الاحيان وفى تدوينه بعيدة كل البعد عن وصفها شخصية يمكن ان ترى دموع انسان

اجد الناس يتسائلون هل التدوين مهم ؟ هل للمدونات اهمية؟ هل تشكل فارقا ؟

وانا اقول أجل, لماذا؟

لأن المدونات هى حقبة تاريخية تسجل الكثير من الأحداث التاريخية التدوين هو نقل للواقع نقل للتاريخ كل منا يكتب ويتكلم عن عدة من الأشياء ولكن هناك شيء مشترك بين كل المدونين الامل فكلنا اما دفعه امله او رغبته فى التغيير للتدوين حتى من فقد الامل فى نفسه دون متمنيا ان يكون سببا فى تغير الاخرين او حتى ان يتغير هو نفسه فمعظم الذين يدونون ينصحون انفسهم بكلامهم قبل غيرهم وانا من هؤلاء

وايضا فى كل مدونة اقرا الحكاية المكتوبة بين السطور ربما اذا ما قرأت تدوينة تتحدث عن جمال الحياة ربما تجد صاحبها يعتصر ألما وربما اذا قرات تدوينه تحكى عن الهدوء والراحة والجمال ترى فى نفس الكلمات الادخنة الموجودة فى الشوارع وتكاد تسمع ضجيج السيارات

مدونة عايزة أتجوز

لصاحبتها برايد

حقا لا يمكنك الا تضحك مهما حاولت واخبركم الحقيقة ان عيني تدمع حزنا فى نفس الوقت الذى اضحك فيه حتى اننى اسمع رنين ضحكتى فى جدران الغرفة ويكاد قلبى يعتصر الما على صاحبتها فى نفس الوقت وربما انبت نفسي على ضحكتى

مدونتى بهلولة وبهلول

زوجين مصريين تتجسد فيهما حقا خفة الدم المصرية فبكل بساطة وبلكنة مصرية صرف تجد الزوج والزوجة يجسدان بعض ايام حياتيهما معا وربما تجدهما يتحدثان عن مشاكل ومع ذلك ترى فيها ذكريات لم تكون فى وقتها سعيدة ولكن اصحابها عندما يتذكرانها يضحكان عليها ونتعلم نحن منهما الكثير

المدونة العزيزة على قلبى جدا رفقه عمر مدونتها العائشة فى الاحلام

كتبت تدوينات خاصة كثيرة جدا على حد قولها واقول لك وما العيب في ذلك السنا بشر وما نحن الا مجموعة من الخبرات والالام والاحزان ومشاكل وحتى لحظات سعيدة كلها تكسبنا قوة حتى اذا ما ظننا اننا ضعفاء ولكن عندما ياتى الوقت تخرج تلك القوة اليست هذه مدونتك فافعلى ما شئتى بها انت لا تضريننا اذا تحدثتي عن نفسك على العكس وانما كما تحدثين نفسك على صفحات مدونتك تجعلين كل من يقرا لك يتحدث الى نفسه ايضا ويراجعها فى كثير من الاشياء

لا اعرف ولكن اهنئك على جرأة ليست للكثير منا ان تفيدي غيرك بخبراتك الشخصية

كتب استاذى العزيز عصفور المدينة تدوينات رائعة عن الحب فى الله تجعلك تقدر تلك الكلمة و كلمة جزاكم الله خيرا ايضا ورد لها ذكرا بسيطا فى التدوينة ولكنها ادت معناها

كتب بينو فى مدونته عيون

ايضا تدوينة رائعة عن سماع الاغانى وخلافه والتى حقا اتمنى لو انقلها لكل شخص عزيز علي لانها بالفعل صادقة جدا حقا الغناء ينبت النفاق فى القلب فبعد ان كنت لا يمكن ان اخلف كلمة قلتها حتى ولو لم اعد فيها اخلفت وعدا

وابتعدوا عن الصحبة السيئة حقا فيمكن ان يكونوا سببا فى اكتساب ليس فقط صفات المنافقين ولكن اسوا من ذلك فاحذروا وتخيروا اخلائكم

وايضا تمسكوا بالصحبة الخيره وخاصة المتقين فمن هؤلاء تتعلم التقوى وترى اسوا ما فيك وتخرج احسن ما فيك ولكن احذروا ان تكونوا وبالا عليهم فان لم تنفعوا هؤلاء فلا تضروهم واحذروا ان تكونوا شياطين الانس التى تكون سببا فى ضلال من تحبون او حتى بعدهم عن طريق الحق ولو ليس الضلال وليس البعد فلا تكونوا سببا فى انحرافهم حتى ولو انحرافا بسيطا احذروا ان تكونوا شياطين

كتب الدكتور المحارب تدوينات كثيرة رائعة واخرها عن السياسة في الاسلام واصدقكم القول كنت اتمنى ان اعرف اى شيء عن هذا الامر خاصة الخلافة

اطلت عليكم ولربما مللتم ولا اعرف لماذا كتبت كل هذا الكلام ولكن احببت فقط ان اتحدث عن تلك المدونات وعن عالم التدوين واذا ما احببتم التدوين فاعلموا انكم لم تخطئوا فحقا نعم الكلام العظة والتذكير بالدين

وارجو ان تعذروننى فى اطالتى