Friday, June 24, 2011

الصبر جميل

فتحت المدونة بعد فترة طويلة جدا كنت بطلت حتى افكر فيها، ولقيتنى بقرا مواضيع قديمة، و احيانا كنت بتعجب من الكلام اللى فيها، مش هاقول كأنى بقرا كلام حد تانى لا بس كأنى كنت وقتها بكتب الكلام لنفسي اللى هاتيجي بعد سنين تقراه.

اكتشفت ان الحياة دايما صعبة بس احنا بنقرر نعدى المرحلة دى ازاى، باننا نكتئب وننزوى فى ركن الغرفة المظلم ووحدى مع الدموع بقى والكلام ده، ولا انك تقرر وتقول لنفسك لا انا اقوى من المحنة وهاعديها، ومعظم الوقت لما بناخد القرار ده بالذات بنعديها .

بس بنعديها ازاى ....

بنخسر ايه علشان نكسب نفسنا او بنسيب ايه من نفسنا علشان حاجة تانية فى نظرنا حياتنا من غيرها ماينفعش تكون، وتبقى فى الحالة دى هى اغلى من نفسنا، وصدقونى معظم الناس لما بتتحط فى وضع لازم تختار فيه ما بين نفسك وحد تانى او حاجة تانية معظم الناس بتختار نفسها، بالذات لو الحاجة التانية دى ماكانش فيه دليل كافي انها اهم .

اكتشفت كمان ان الصبر جميل. بعد كام سنه لما جيت ابص على المدونة وافتكرت اجزاء من حياتى، او حاجات صبرت عليها اوى، لقيت فعلا فى الاخر الصبر كان جميل لان نهايته جميله، وكمان احيانا لما بنكون مستعجلين على حاجة الاستعجال ده بيضيعها ولو ماضاعتش وفضلت موجودة احيانا طعمها بيضيع و خلق الانسان من عجل للاسف في ناس مش بتعرف تتعلم من اخطائها.

اتعلمت انك لو مابتعرفش تاخد هاييجي يوم وتبطل تدى، علشان المخزون اللى عندك هاينفد وهاتحس بالضياع لانك ساعتها مش هاتعرف تجيب منين .
واتعلمت ان اللى بياخد بس هاييجي يوم وهايتعب لانه هايتخنق من اللى غرق نفسه فيه وهايلاقى ان مش كل الناس بتدى وهايتوه وهايدور على حد يدي له مش هايلاقى.

اتعلمت ان العمل عبادة والعبادة محتاجة صبر والا ماكانش ربنا قال واصطبر عليها.

عرفت ان فيه فرق بين الحياة والعيشة كل الناس عايشة بس مش كلهم احياء.

Friday, March 19, 2010

confession

will my sun rise again?

will i ever forget the pain?

is my heart going to breathe?

is my life gonna be seized?

i hope my heart be reborn

from ashes like a phoenix

like a sun rises after a storm.......

so tired, so dumb, so lost, i feel numb

everything is a new night

no dawn no hope of light

every bump in the road I'm trying to swerve

trying not to fall and get hurt.

trying to keep my eyes open waiting for the sun

to send me a message

telling me

there's still hope on it's way

it's coming along

well, i guess after all

i need to confess

there's just no sun to rise

no hope in disguise

there's just loneliness

i just want to get out

make a door in my chest

let my heart open it

maybe then it would catch its breath

Monday, April 27, 2009

كلمة وداع

كلمة واحدة بتقولها كل الشفايف والعيون
كلمة واحدة تعرفها دمعة بتبوس الجفون
كلمة وداع تحير قلبك المجنون
كلمة يا حبيبي يسمعها القلب الحزين
ويشوفها فى كل نظرة من نظرات العيون
كلمة توصف يوم عمره ماكان
ولا مكتوب عليه يكون
كلمة بتقولها الشفايف والعيون
واحدة تعرفها كل دمعة بتبوس الجفون
كلمة تعرفها كل لحظات الفراق
تناديها كلمات العتاب اللي بتتمنى الوفاء
كلمة سهلة عالقلب اللى خان
عاللي باع الحب واشترى النسيان
صعبة بس عالقلب اللى ساكنه
حبك وما يبيعه مهما سكنته الاحزان
كلمة يا حبيبي قالتها شفايفي والعيون
وقالتها قبل ما اقولها كل ايام الزمان

Saturday, March 14, 2009

علم قلبي ...... أحب ليه ؟!

علم قلبي
***************
علم قلبي ازاي يبيع الغرام
علم قلبى معنى حب الانتقام
معنى اللهفة عالوداع
معنى الغربة فى اللقا
معنى الاحساس بالضياع
علم قلبي يعني ايه تكره حبيب
يعني ايه تكون غريب
مع حد كان اقرب قريب
علم قلبي ازاي بيكون الخداع
ازاي يكون الكدب
وازاي تجري الدموع على حب
في قلب ضاع ......
تاه ......
راح وانتهى ......
===================
أحب ليه ؟
**************
أحب ، طيب وأحب ليه ؟
حب ، حب يعني ايه ؟
بيقولوا عليه غرام
كله شوية كلام
و أحب ؟! أحب ليه ؟
أصلا حب يعني ايه ؟
نظرة عين سهام عاشقين
ونروح شمال ونروح يمين
وآخر الطريق هايكون منين
آه ، دي بقى السكة اللي تودي
سكة اللي يروح وعليه الزمن بيعدي
ويمكن حتى من غير وداع
ويقولوا اهو حب مات وضاع
طيب  ده كلام
وترجعوا تقولوا الغرام
و أحب؟! طيب واحب ليه ؟
حب ، قلنا حب يعني ايه ؟
تنهيدة ودمعتين
يمكن ليلة ولا اتنين
ويقولوا بكا عالجراح
او عالحب اللي راح
او عالقلب الحزين
حب ، حب مين
لاااااا انا قلبى ده مسكين
مش حمل تنهيدة
ولا دمعه ولا دمعتين
ولا حتى صدمة فى مين
واحب ... احب ليه ؟
حب ، اصلا حب يعني ايه ؟
****************
اهداء الى صديقاتى الرائعات
بحبكوا يا بنات

Friday, February 27, 2009

وازيكم ازيكم اني جاية أخدم عندكم... كركركررر

من زمان ماكتبتش اى حاجة من ييجي كده ست شهور
بس عادي بقى
اكيد ماوحشتكوش صح
لالالا شكلي كده بيدي على انى وحشتكوا
ولا اقولكوا ..... مااا علينا بلاش احراج

عن اسباب الغياب وخلافه .... المفروض تكونوا اتعودتوا بقى ولا ايه .. يعني بتجيلي كده حالة من حالاات البيات الشتوي المنبعجه الجوانب غير واضحة المعالم ......

وصباح الخيييييييييير

شوية جد بقى
..........

اه بالمناسبة العنوان مالوش اي علاقة بالموضوع خاااااالص بتاتا بتيتا اطلاقا مطلقا
ده جملة من فيلم لمنى زكى تقريبا كده خالتى فرنسا بس انا اللى بحب افتكرها وهى بتقول الكلمة دى
...........

عارفين الحياة دى زى رحلة طويلة بنستكشف فيها معالم نفسنا
بنستكشف فيها دواخلنا وحقيقتنا
بنعرف فيها احنا كنا مين وعايزين نبقى مين واحنا دلوقتى فعلا مين

بس اكتشفت حاجة غريبة جدا فى معايير الجودة عندنا :)

اكتشفت ان البنت كل ما عقلها كان كبير كل ما كانت اكثر حكمة وكل ما كانت اذكى كل ما توفرت فيها عوامل نجاح اكتر يعني العلم والجمال والحكمة وخفة الظل
اصبحت
اكثر فشلا
غير مرغوبة للزواج
اه بين قوسين زي ما سمعتها من ناس كتير جدا
تتصاحب اه لكن اتجوزها لا لان لازم يكون فى صوت واحد بس في البيت
راى الشخصي في الموضوع ده ان اللى يفكر كده الراجل اللى شخصيته مش قوية اللى شايف انه مش هايقدر يفرض سلطته الا على واحدة ضعيفة الشخصية
انا شايفة ان الجواز ده يعني بتشارك حد فى كل حاجة ......... واعنى كل حاجة يمكن حتى الافكار

..................................

اكتشفت حاجات تانية كمان فى الدنيا
ان مش لازم يكون للمشكله حل يعني ..... ساعات بيكون حل المشكلة الوحيد هو انك تغير نظرتك ليها
يعني تلاقى طريقة مختلفة للتعامل مع المشكلة
وطريقة من طرق التعامل انك ماتتعاملش خالص وتعتبر المشكلة دى امر مسلم بيه واجب عليك التعايش معاه
..........................

اكتشفت ان ساعات بيكون الحل الغائب الحاضر اللي مش بناخد بالنا منه هو الرضا
واللى بيرضى ربنا بيرضيه
...........................

توظيف الطاقات والابداع

ساعات احنا بنعطل طاقاتنا وبنقتل قدرتنا على الابداع بمزاجنا
وساعات بيبقى غصبا عننا
ساعات بيبقى بسبب عدم مثابرتنا وعدم سعينا علشان نحقق احلامنا
وساعات بيبقى من عمال تكسير المقاديف اللى كترانين دايما حوالين اى حد عنده حلم او رؤية مستقبلية نفسه يحققها او يوصل لها
بس في حاجة واحدة لازم ننتبه لها
اننا نصبح من نختار ان نكون
يعني كل واحد يقدر يكون الشخص اللى هو بالظبط نفسه يكونه رغم اى ظروف مهما كانت الدنيا مش مساعداه
وافتكر ان دايما تقدر تحقق معايير الجودة الخاصة بيك فى كل تفصيل من تفاصيل حياتك
.....................
ساعات السعي ورا حاجة بيكون هو اول عامل من عوامل ضياعها
ان ترغب فى الحصول على شيء بشده هو اول مسمار فى نعشه
يعني احيانا الطريقة الوحيدة للحصول على شيء هي انك تسيبه يجي لك

................

الملخص المفيد
الحياة مدرسة
وكل موقف فيها مدرس شاطر جدا
ناقص بس انك تكون طالب نجيب علشان تجتاز الاختبارات
وتحصل الحكمة
........................
اه
لو عايزين تعرفوا انا رجعت اكتب ليه
لان ده المكان الوحيد اللى ممكن اكتب فيه براحتى من غير ما اسمع حد بيقول لى
يا ست الحكيمة ........ او بتتفذلكى .... او انتى بتتكلمى بالعربى كتير ليه ........ او حتى بتتكلمى كتير ليه من غير بالعربي

وبعد اذنكوا بقى اروح نام
وتصبحوا على خييييييييييير

ياللا فولوا باى

باي باي