بيتوتة

نزلت شوية وصفات
للى عاوز يشوفهم
وياريت لو حد عنده اضافه يقولها

اسفه يا جماعة ماحطيتش اللينك
بيتوتة دي مدونة جديدة انا عملاها اللينك اهو
بيتوتة

للصبر حدود ... ؟

دايما اسمع عن الصبر الجميل

وفى دعاء بيقول اللهم انى اسالك فرجا قريبا وصبرا جميلا واسالك الغنى عن الناس

طيب الصبر الجميل ده ليه حدود ولا هو الصبر الى مالا نهاية

ولا الصبر اللى اخرته حلوة

ولا الصبر اللى مالوش اخر

يعني الواحد يصبر ويصبر ويصبر ويستنى ويستنى ويستنى

وعمره بيعدي و تعبه بيزيد وراحته تقل وامله كل شوية يضيع ونرجع نمسك طرفه قبل ما يهرب من ايدينا زي المياه

طيب ايه هو الصبر الجميل ؟؟؟

ولا الصبر الجميل الصبر من غير شكوى

ولا الصبر مع الشكوى لربنا بس

ولا الصبر مع الدعاء بتغيير الحال

ولا ايه

طيب الواحد لما يتعب من كتر الصبر لحد ما يطرشأ يبقى َصبَر صبْر جميل ولا ماصبرش

طيب لو الواحد يكلم اصدقاءه او صديق واحد ويكلمه ويشكي له كده يبقى صبر ولا ماصبرش

يعني اجر صبره وانتظاره يضيع علشان اتكلم واشتكى

ايه هو الصبر الجميل ؟؟؟؟؟؟؟؟؟؟؟؟؟

يااه عالدنيا...... سأحملها و أمضي

يااه عالدنيا

ياه عالدنيا يا ربى

ولا عارفه اتوه

ولا عارفه حتى الاقى دربي

كل ماروح لسكة

يقولوا حاسبي

السكة دى ما تتمشيش

اقول طيب اروح لفين

ردوا عليا

انا عايزة اعيش

ومايردش غير الصدى

يقول لى يا عطشانه

الدنيا مابتديش وما بترويش

ياه عالدنيا يا ربي

ولا عارفه اتوه

ولا عارفه حتى الاقى دربي

طيب اعمل ايه

احترت فى قلبى

واحترت فيه

ولا عارفه اتوه فى البحر

ولا لاقية بر ارسى عليه

كرهت الدنيا

وحاسه ان املى فيها راح

كأن الراحة ممنوعة

ولازم نعيش بالالم والجراح

وجايز كمان ننزف لحد الموت

ما العمر ده ايام زى الهوا بتفوت

*************

سأحملها وأمضي

بكيت حتى سمع بكائي الوجود

وبغير الصمت علي لم يجود

بكيت حتى اصاب عيني الجمود

وغلفت الاحزان قلبي بالبرود

الآن اصبحت ارجو هذا الزمان

عساه يجود علي بالنسيان

يطيب جرحي ويشعرني الامان

او يبعث في الامل قبل فوات الاوان

عجبت من قلبي وعجبت منى القلوب

ساعة ارى فيه الشروق وساعة الغروب

سرت في طريقي وتقاطعت الدروب

والآن احمل اثقالي وامضى

حتى لو من مثلها الجبال تذوب

مجرد فضول

عارفه انه هايبقى بوست شكله ساذج
والى حد ما غريب
يعني اكيد فى حد هايقول

......... ايه البت العبيطة دى ؟؟؟؟؟؟؟!!!!!!!!!!!

:)

انا بس كنت عايزة اسال سؤال

هو الناس اللي بتأذي ناس برضه بس ناس تانيين مابيحسوش ؟
يعني هما مش بنى ادمين زينا كده ولا هما ماعندهمش مشاعر ؟

اه والله بجد بسال السؤال ده كتير اوى لنفسي هي الناس دي مش مخلوقين كده زينا من نفس الطينه زى ما بيقولوا ولا هما اتخلقوا من طينه تانيه

يعني مثلا ليه فى ناس بتنبان قدامكوا على انهم ملايكة وبعدين فى الاخر تلاقيهم بيعملوا عمايل شياطين وفى الاخر تبقى مش عارف تصدق نفسك اصلا مش قادر
هي الناس دي هما نفس الناس دول ولا ناس تانيين ولا انا كان بيتهيالى ولا ايه

ايه ده هو انا صاحي ولا بحلم
يمكن لسه نايم
استنى كده
الم على خدى ... اى . لا صاحي
اممال اييييه ؟؟؟؟؟؟؟؟؟؟؟

طيب لما ناس تفضل تقطع فى فروة ناس تانيين ( يعني يغتابوهم ويبهتوهم ) بالظلم والبهتان
الناس دي بتعمل كده ليه ؟
يعني يا مخلوقات ربنا كل حاجة فى الدنيا دى بتتعمل لان ليها نتيجة وهايجي من وراها فايدة ايا كانت ........ بس دي فايدتها ايه

طيب ما علينا
نروح لحاجة تانيه

لما حد ياكل حق حد لما يجي صاحب الحق يطالب بحقه تلاقى الانسان ده بكل بجاحة بيقول له لا دى بتاعتى
بتاعتك منين جبتها ازاى . ماتفهموش
بجاحة !!!!!!!!!!!!!

زى ما موبايلى اتسرق اتصلت بالرقم لقيت الهانم اللى سرقته بتقول لى بتاعى
قلت لها بتاعك ده جبتيه من انهو مصيبة تاخدك " ماهى بصراحة كانت استفزتنى ييجي كام دقيقه بكلمها وهى مصمصمة انه بتاعها بجاااحة .. "
قالت لى مصيبة تاخدك انتى وايه لا كمان قفلت فى وشي

ما قلتلكوا بجاااااحة ....... لا ومن ده كتير في حاجات كتير

طيب غيره

الناس بتخدع بعضها ليه ؟
يعني الانسان ده اللى بيضحك على حد تانى وخلونا نقول مش بيستغل
طيبته ماااشي بيستغل سذاجته هايستفيد ايه

بجد

يعني اللى بيخدع حد ده هايستفيد ايه لما يخلي الانسان ده يبطل يثق في الناس ويبطل يثق حتى فى صوابع رجليه :) تشبيه غلس عارفه ...... :)

طيب حاجة كمان

الناس مش بترحم بعضها ليه يعني ماحدش بقى عنده شفقه ولا بيحس بحد ليه
ماحدش بقى بيرحم حد :)

لييييييييييه ؟؟؟؟؟؟؟؟؟؟؟؟؟؟

هو فى ايه ؟؟؟؟؟؟؟
انا مالى النهاردة ؟؟؟؟؟
شكلي شاربه حاجة ...... هههههههه ..... اااااااااااه ....... دواء الضغط .....:)
هههههههههههههههههههههه
صباح الخييييييييييييييييييييييييييير

رتب حياتك 3

اتخذ قرارات حاسمة
امسك بزمام حياتك
لا تترك شيء للظروف ولا تدع الحياة تقودك

في هذه المرحلة بالتأكيد بعد أن اتخذت قرار بخصوص مشاعرك تبديها أو تخفيها ما هو الحل الأكثر ملائمة لشخصيتك ودرجة حبك للكتمان أو الشكوى أو اللجوء للغير كصديق أو أحد أفراد العائلة

وأيضا بعد أن تعرفت على نفسك وعرفت ما هي شخصيتك الحقيقية بعيدا عن تأثير الآخرين

جاء الموعد لاتخاذ القرارات ................

يجب أن تتخذ قرار وأنت عازم من داخلك على تنفيذه وحقيقة كل منا يعلم هل سوف ينفذ هذا القرار إذا أخذه أم لا فهو من داخله يكون صادق النية أو عازم على التسويف ......

يجب أن تتخذ القرار وتقول لنفسك

أنا ربان سفينتي
أنا قائد تصرفاتي
أنا مدير نفسي
أنا المتحكم في حياتي

ومن هنا نقطة البداية

ترتب أولوياتك وتضع أهدافك

لا تعود للماضي والأخطاء ولطالما قلت ولم أفعل وأنا هكذا دائما
هناك في اللغة كان ولكن أيضا هناك أمسى و أصبح

يوجد دائما مكان للحزن والندم ولكن يجب أن نخصص لهذا الحزن وهذا الندم والألم الناتج عنهما المجال الذي يستحقونه وليس أكثر من حقهم
علينا أن نفكر في الغد القريب الذي نستطيع التحكم فيه بالاتخاذ بالأسباب وليس علينا القلق على المستقبل البعيد الذي هو بيد الله عز وجل
علينا دائما أن نتعلم كيف نرى نصف الكوب الملآن وندرس كيف يمكننا أن نعوض أنفسنا عن نصفه الفارغ
علينا أن نحب أنفسنا ونتعلم التعامل معها بالطريقة الصحيحة ولا نحملها فوق طاقتها
علينا أن نتعود على أن نجعل لأنفسنا نصيب من رحمتنا للآخرين
علينا ألا نلومها دائما على أخطائها و أخطاء من حولها وحتى نلومها على ما ليس لها يد فيه

علينا أن نتعلم كيف نتعامل مع الحياة وتكون لدينا دائما خطة بديلة و أن نكون دائما سابقين بخطوة حتى إذا ما جرحنا أو تسبب أحدهم في تحطيم شيء بداخلنا أو جرحنا جرحا عميقا يعوقنا عن التقدم نكون في مكان عندما نعود له نكون متأخرين ولكن نكون متماشين مع من حولنا فبدل أن يكون تأخرا يعيق عن التقدم يكون تأخر قابل للإصلاح وحاثا على التقدم والمواصلة وليس تأخرا محطما للآمال ومدعاة للإحباط

علينا أن نتخذ قرار بخصوص الحياة وجراحها هل أنا مستعد لتحمل تلك الجراح أم لا ؟
بناءا على إجابة هذا السؤال يكون القرار حيث تضع كل شخص في مكانه الذي ينتمي إليه من دوائر علاقاتك وهل سوف تسمح لهذا الإنسان بأن يتخطى حدوده أم لا؟ هل سوف تسمح لأحد أن يتخطى حدوده أم لا ؟

هل أنا مستعد لتحمل نتيجة أفعالي وقراراتي بالكامل أم لا ؟
يجب أن نسأل أنفسنا هذا السؤال قبل كل قرار وبناءا على الإجابة يكون التنفيذ من عدمه ..............

ليتني .... في بحر مالوش معالم

قلت اما اغلس عليكوا شوية وانزل لكوا حاجات من اللى انا بكتبها بس بقول لكوا ايه مش عايزة ولا بيض ولا طماطم ولا تكسير إزاز

خلونا حلوين مع بعض :)))))))))))))))))

امماااااااااااااااااال

****************************

ليتني

ليتني ماكنت ولا كان الهوى
ولا كان الشوق ولا حر الجوى
ولا كان الخوف من جرح بلا دوا
ولا كان القلب عطشان وما روى

ليتني ما كنت ولا كان الهوى

اين انت الآن واين انا
بعد علينا القرب بعد أن دنا
وجنيت انا على قلبي وقلبي ما جنى
خطئا ولا ذللا ولكن من جنى انا


ليتني ماكنت ولا كان الهوى
مني دنا


عجبت لمن بكى بعد ان زرع الورود
لما تبكي ولما يسكن عينيك الشرود
قال بكيت ان حصدت الشوك
وظننتني اروي اشجارا تجود

ليتني ماكنت ولا كان الهوى
بالألم علي يعود


يا ليت ليتني تفيد
وقل ان يحدث ما نريد
فلا الذكرى للفقيد تعيد
ولا البكاء حتى لو بكيت غريد

*******************************

مش فاهمه أنا والله ايه الناس دي اللي وقفت فى البلكونة ويجي لها برد وبعدين ترجع تقرفنا احنا وتقول ليتني والهوى والجوى طيب احنا مالنا احنا طيب مالنا ومال وجع القلب ده و غريد وفريد وشريد حد قال لك تقفي في البلكونه ياختى والدنيا برد

مالها دي !!!!!!!!!!!!

*******************************

في بحر مالوش معالم

سفينة ماشية في بحر هايج والموج غدار
وياريته موج من مياه لأ ده موج من نار
والدنيا ضلمة اوى والموج عالي
ومفيش عليك يا بحر الزمان غالي
وياريتها سفينة جامدة كده ومتينة
إلا دي مكسورة وعدمانه وحزينة
والموج بيخبط فيها يمين وشمال
واللي على الدفة ياريته راسي على حال
لا والملامة على السفينة الغلبانه
ليه يا سفينة تايهه وليه تعبانه
ماهي كل ما تسأل الربان
يرد جواب مافيهش بيان
ويقولوا قلبك ليه يا سفينة حيران
أكيد ماهو اتكتب عليكي من الراحة الحرمان
وتقول إيه السفينة وكله شايفها جماد
ياريت الموجة تحرقها وتخلص وتبقى رماد

*************************************

ايوه خلونا نخلص احنا هانقعد نستنى الهانم لحد ما الراديو يشتغل وتقول الحقونى وتدور بقى على مرسى و مرسى علم والمرسى والبحار ومرسى مطروح

خلونا نخلص مش كده احسن برضه

:)))))

**************************************

عارفه عارفه شوية غلاسة معتبرين ومالهومش حل بس احنا متفقين من غير بيييض ولا طمااااااااااطم

ماشي ولا مش ماشي

لالالالا

ماشي ماشي

شوية خبرات ... وادينا بنتعلم

سؤال مهم .... وبجد محتاجة رأيكوا

لما تبقى انسان بطبيعتك متسامح لأقصى درجة ممكنه، ويمكن ساعات بتبقى غير ممكنه ، متسامح جدا لدرجة ان ممكن ييجي عليك وقت تستغرب من نفسك من كتر ما انت متسامح

لما تكون فلسفتك في الحياة انك لما بتسامح حد انت في قلبك بترتاح ، بيكون قلبك ابيض ونضيف لانك مش شايل حاجة من حد

طيب جه وقت ولقيت نفسك مش قادر تسامح

خلاص

ناس أذوك يمكن هما مش حاسين أد إيه ، ويمكن يكونوا هما أصلا مش حاسين انهم غلطوا ، بس بجد أذوك من جوه ، جرحوك ، كسروا من قلبك حته ، ومن حياتك ، وحاسس ان انت مش قادر تسامحهم ، حتى لما بتشوفهم بتحس ان عنيك بتنطق باللي انت مش قادر تقوله ، عنيك بتقولهم انا مش قادرة اسامحكوا ، هما اصلا مش شايفين عنيك دي ، بس انت من كتر ما انت فعلا مش قادر تسامحهم تعبان ومتضايق من نفسك ................. وحاسس ان انت غلطان

..

لما احس ان في ناس جرحونى اوى ، وانا قبل كده كان ممكن اسامح حد بس يبعد عنى يعني اسامح الاسد من غير ما احط ايدي فى القفص تانى ، بس المرة دي فعلا مش قادرة اسامح وحاسه اني هاستنى يوم القيامة علشان اقول يارب هاتلي حقى

...........

كده انا انسانه شريرة ؟؟؟؟؟؟؟؟؟؟؟؟؟؟؟

اللي مخليني اتضايق كده اني بحس اني لو فعلا انسانه جوايا ايمان هاقدر اسامح ، حتى لو كان ذرة بس الايمان بيخلى الانسان يسامح ، بس لو الناس دي انت سمحت لهم يدخلوا حياتك ، وكنت معتبرهم اخوات ، وكنت بتعاملهم على الاساس ده ، وييجوا هما في الاخر يطعنوك في ضهرك ، ويكونوا اول حد يجرح فيك ، برضه غلطانه اني لسه متضايقه منهم ؟؟؟

انا عارفه ان الانسان ياما بيشوف ناس ، وماحدش بيتعلم بالساهل زى ما بيقولوا ، والانسان مش هايعرف الناس على حقيقتهم الا لو عاشرهم ، بس ساعات بيبقى الجرح بجد كبير اوى

.....

يمكن يكون الاحساس اللى جوايا ده مش انى مش قادرة اسامحهم ، يمكن مجرد الجرح اللى جوايا بيألمنى كل ما بشوفهم ، لكن انا جوايا مسامحاهم ؟؟؟؟؟؟ ... بالذات وانا دايما فاكرة قصة سيدنا ابو بكر مع قريبه اللى كان بيتصدق عليه اللى اتكلم على السيدة عائشة رضى الله عنها وبعدين سامحه سيدنا ابو بكر علشان ربنا يسامحه

...

بصراحة انا عايزة ربنا يسامحنى ..... لا جدا نفسي ربنا يسامحنى

..

وكمان فاكرة قصة واحد من الناس اللى تصدق صدقة كانت حلوة اوى ، وهى انه تصدق بكل كلمة قالها واحد من المسلمين فى حقه، وكل غيبة، وكل نميمه

...

تصدقوا الواحد فعلا ياما هايشوف ، واكيد النوع ده من الناس يمكن جرحنى اوى لانها كانت اول مرة ، او يمكن اول مرة انا اخد بالى ان فى ناس كده ... ويمكن صحيح مش اتعلمت الدرس بالساهل بس اكيد اتعلمت ، وكمان ربنا بجد عوضني اوي الحمد لله بصحبة فعلا صالحة ربنا يجمعنى واياهم على خير يارب دايما امين

...

عارفين خلاص انا هاسامحهم واسلم امرى فيهم لله ،، اه والله خلاص هاسيبهم لربنا جايز هما كانوا مجرد ابتلاء او مصيبة قللوا شوية من ذنوبى وبعدين حد طايل شوية حسنات اخدها منهم يوم القيامة ............ ايه ده باين عليا استغلالية

:)

استغلالية استغلالية يللا ماحدش واخد منها حاجة

هيست انا تمام فى البوست ده صح :) )))) لا خلاص كفاية لوك لوك لوك لوك كده الليلة لا حد يروح فى ايدي :))))))))))

تصبحوا على الف خير وهدى يارب

كلام العيون

كلام العيون كلام يتحس

ما بين الرموش والجفون يتمس

كلام يفرح وكلام يجرح

وكلام يزرع فى القلب يأس

كلام العيون كلام ألغاز

ساعة تنطق وساعات بتبقى إزاز

ساعة بترقص فيها الروح لما تشوفك

وساعات تقول ألغاز

كلام العيون كلام أسرار

تجرح لأ و تكوى الجروح بالنار

ساعة تحن وترق

وساعة تشد وساعات تزق

وساعات تطق شرار

كلام العيون كلام قلاب

ساعة تبقى النجوم

وساعات تشوفك تراب

ساعة تقول انت الحبيب

وساعات نكون أغراب

make some money

اتبعت لى لينك لموقع على النت بتعملوا فيه حساب مجانا وبتجاوبوا فيه على سيرفيها يعني بتقولوا رايكوا فى مواقع وبتاخدوا على كده فلوس الكترونيك مونى e- money

جربوا الموضوع ده طبعا اللى عنده وقت

اللينك اهو

http://www.AWSurveys.com/HomeMain.cfm?RefID=tota728

كائنات صغيرة

أذرع و أرجل و عيون صغيرة ، ولكنها تبدو أكثر اتساعا عندما تنظر داخلها ، لا تعرف هل تنظر تلك العيون إلى الدنيا أم أنك ترى فيهما الدنيا .

تنظر ، تتطلع في وجهك ، وكأنها تتفحص الملامح ، أو ………. تنظر إلى الروح …

كائنات صغيرة ……..

تتعجب من خلقهم وشكلهم ، تتعجب كيف يكبرون ويصبحون رجالا و نساء ،،، كيف يصبحون هؤلاء العمالقة بعد أن كانوا تلك الكائنات الصغيرة التي تراها تحبو وتسير في خطوات صغيرة ... لا تعرف عندما يمشون هل يسيرون نحو الدنيا أم يتوجهون إلى هلاكهم ..

عندما تنظر في عيونهم هكذا تتساءل علام سوف يكون حالهم ؟! هل سوف يكونوا عبادا صالحين ؟ هل سوف يكونوا من المؤمنين ؟ هل سوف يكونوا من أهل الجنة ؟ هل سوف يكونوا من المجاهدين ؟ ..... ربما ..... شهداء .....

أم هل ؟.................

لا لا،،، إن شاء الله يكونوا من الصالحين .......... و أجد نفسي أدعو ،،، ربنا يهديك يا حبيبي .......

وبضدها تعرف الأشياء

بصراحة انا مش عارفه اقول ايه
بس كلامكوا اثر فيا وخلانى افكر فى حاجات كتير واحس اكتر
اد ايه انا فرحت بردود ناس كتير هنا حتى اللى زعلان منى بجد كل حد كتب لى كومنت فى الموضوع ده اخد مكان فى قلبى كبير اوى

و كل تعليق كان ليه اثر

و ان شاء الله ناوية احاول الخص كل حاجة خلتنى ابعد عن التدوين فى تدوينات انزلها فى المدونة مش هاتبقى بصورة شخصية اد ماهتبقى الخلاصة يعني العبرة منها والعبرة لمن يعتبر طبعا يعني :)

ننتقل بقى للموضوع

وبضدها تعرف الأشياء
ده تقريبا قول ماثور حكمة يعني حاجة كده من الكلام القديم اللى حد بيقوله وبعدين يكتشفوا انه حاجة ذات قيمة فتتناقلها الاجيال
بدون مط وتطويل مراعاة لمرضى القلب والضغط :) ان الشر مالوش قيمة ومالوش تأثير الشر في حد ذاته حاجة مالهاش معنى وجودها فى الدنيا ليس الا لابراز الخير وتوضيح معناه وتثبيت القيم الجميله جوانا

كانت صديقة بتوصف لى احساس الكره وأؤكد انه كان احساس انا لا اعرف ماهيته هاتقولوا لى يعني كان عمرك ماكرهتى حد لحد مابقى عندك 17 سنه وشوية هاقول اه والله العظيم :) وده من سذاجتى :) ماااااعلينا المهم انها قالت لى تقريبا لانى مش فاكرة الكلام بالظبط

قالت لى شعور وحش ويضايق كأن فى نار جواكى بتاكلك من جوه كل ما تشوفى الانسان ده اللى بتكرهيه كأن حاجة بتاكل فيكي من جوه

مش فاكرة بالظبط بس المضمون يعني ان الاحساس بالكره ده كأن الانسان بيتآكل من جواه

يعني الكره مش بيضر المكروه اد ما بيضر اللى بيكره
فالكره فى حد ذاته شعور مقزز
انا مش بحب المشاعر دى ولا الكره ولا الحقد ولا الغل ولا المشاعر الشريرة اللى بتخلى انسان يأذي انسان زيه حتى لو ماكانش بينهم اى قواسم مشتركه ففيه الانسانية زى مانت تكره ان حد يأذيك انت كمان ما تأذيش حد الانسانية هي انسانية المشاعر والاحاسيس الانسان مهما كان شكله صلب وقوي ففى الاخر جواه قلب بيحس وزي مانت تضن على نفسك بانك تحس احساس الظلم او الأذى أو اى شعور تانى ماتعملش كده مع الناس

يعني من الاخر اللى جواه حاجة مش كويسه هي بتأذيه هو مش بتأذى حد تانى لانها بتستهلكه هو مش بتستهلك حد تانى

وطبعا من ضمن الأذية الغيبة والنميمة والكدب والبهت وحاجات كتييييييييير والخداع والمكر والدناءة و النفاق و هدم الآخرين والأنانية و الغرور والتكبر والنرجسية وانعدام المروءة والشهامة كلها تنتمى لمعجم واحد بس عنوانه الشر يتجسد :)

مبالغة انا اوى صح :))))))

المهم

إن اهم درس لازم نتعلمه فى الدنيا دى ربنا خلاه من الفطرة اتعلمناه قبل الكلام واحنا لسه أطفال رضع قبل ما نتعلم نحبى لما بنقع بنصرخ ونعيط ونستغيث بامهاتنا علشان يشيلونا لاننا ماعندناش القدرة على اننا نخرج نفسنا من المأزق اللى وقعنا فيه سواءا بايدينا او بايد حد تانى بنطلب المساعدة جايز لما كبرنا الجزء ده نسينا بيبقى ازاى بس كل واحد فينا بيلجا لأمه فعلا وقت ما الدنيا تتقفل فى وشه

بنتعلم نحبى لاننا ماعندناش القوة لسه نقف على رجلينا بس بيكون اهم حاجة عندنا واحنا اطفال هو الوصول للهدف حتى ولو هاحبى اديني بحبي لحد ما ربنا يقويني على المشي ونمضي قدما :)))

وبعدين شوية بشوية رجلينا تشيلنا ونمشي ونقع ونتخبط ونتعور ونعيط ونصرخ ونقوم ونلعب ونعيش

هيا دي الحياة

اننا نمشي ونقع ونرجع نقوم و نمشي تانى ولازم نوصل ونوصل للمكان الصح مش مشي وخلاص وجري على حاجة ما تستاهلش او هدف مالوش قيمه ولما نقع نتعلم نقوم حاجة فى فطرتنا اننا لما نقع لازم نقوم ولو مش قادر تكمل مشي احبى لحد مارجليك تشيلك تانى ولو مش قادر كمان اطلب المساعدة اصرخ باعلى صوتك مش عيب انك تقول الحقونى مش عيب تترمي في حضن أمك وتبكي مش عيب تترمي في حضن زوجتك وتبكي مش عيب تقول انا تعبان ومحتاج حد يساعدنى لانى مش قادر اكمل فى الطريق ده لوحدى الأهم من الالم هو القدرة على احتماله ومش عيب تطلب من حد يقف جانبك لو مش قادر تكمل لوحدك الاهم انك تكمل

وفى جملة بقولها لنفسي كل ما أخاف من حاجة جاية لى بالأخص لو عندى تمرين متعب تانى يوم :)))))))))
pain doesn't kill you it only kills your weakness
الألم لا يقتلك ولكنه يقتل ضعفك فقط

حتى إشعار آخر

متوقفة عن التدوين

...........................................................................................

ميرسي بجد على سؤالكوا وفعلا اهتمامكوا اثر فيا جدا جزاكم الله خيرا
اما عن المانع فهو اسباب مش عارفه هل هى اسباب كافية ولا لا

انا ماكنتش ناوية ابطل تدوين للابد بس على الاقل لفترة

علشان تعرفوا بطلت ادون ليه لازم تعرفوا انا ليه عملت المدونة دى من الاول وانا عملتها لانى حسيت انى عليا واجب اءديه وكانت الطريقة الوحيدة اللى قدامى هيا التدوين وانى اخرج افكارى واعمل حاجة ولو كلامى ما فرقش مع حد اكيد هايفرق معايا انا عالاقل يعني هايكون ليه نتيجة واثر حتى لو كان بسيط

الافكار ما خلصتش

بس بقيت مش عارفه هل انا بادى واجبى ده كويس ولا لا هل بفيد حد بأفكارى دى واحاسيسي دى ولا لا ولا بس بضيع وقت الناس هل بقدمها بالطريقة المناسبه ولا اسلوبي الطويل اللى معظم الناس اتكلموا فيه ده ممل وبيخلي القاريء ما يكملش الموضوع للآخر هل بوصل أفكارى بطريقة مناسبة ولا البوست يخلص قراية من هنا وتلاقوا كل واحد خارج بفكرة عن الموضوع غير التانى وغير قصدي اصلا ولا انا بقدر اوصل افكارى صح وبقدر اعبر صح

انا عارفه انى مش أديبه يعني ولا كاتبه متخصصه والتدوين فى الاصل هواية بس بيتحول لمسؤولية بالذات وهو من الاول اصلا بالنسبة لى كان مسؤولية

كمان عوامل كتير منها ان التدوين بالنسبه لى اختلف جايز لان نظرتى للحياة كلها اصلا حاليا اختلفت

قلت قبل كده ان المدونة بتحكى حكاية انسان ومازلت عند راى ان لو حد مسك مدونة واحد وقراها من اول بوست لاخر بوست مرة واحدة هايبقى عارف ادق تفاصيل شخصية وخبرة الانسان ده وبالذات ان معظم المدونات حاليا بقى لها اكتر من سنه وانا قصدي على المدونات اللى انا اعرفها ومتابعاها ماعرفش الجديد ايه

يعني التدوين عصارة خبرة انسان وانا التدوين بجد كان اثر في حياتى لدرجة رهيبة انا كنت بقيت حد انا بعتز بوجوده فى يوم من الايام بس للاسف قابلت فى الدنيا اللى كسر فيا حاجات كتير حلوة و بقيت حاسه انى لازم اخد فترة اجازة من كل حاجة علشان ارمم الكسور دي وعلشان اشوف الحياة دى هاتمشي ازاى

كان جالى فى تاج قبل كده سؤال بيقول هل فكرت فى التوقف عن التدوين ولماذا وانا كنت قلت لا ومش هافكر ومازلت انا مش هابطل تدوين بس دي اجازة مدتها اد ايه مش عارفه بس مش كل الناس زي بعض فى ناس بتقدر تشيل ما ينوء عن حمله الجبال وفى ناس ببساطة ما بتقدرش تشيل للاخر بييجي عليهم وقت وبجد مش عايزة اقول بيقعوا بس بيتعبوا وبيبقوا عايزين يرتاحوا

البوست ده معظمه شخصي بس ده لان التدوين بالنسبة لى اصلا حاجة شخصية جدا كل مدون وكل مدونة بالاسم بالنسبه لى واقع انا لما بتكلم عنهم بتكلم باسمائهم التدوينيه كانهم اشخاص كانوا قاعدين معايا كل واحد/ة فيكوا ليه معايا ذكرى من بوست او جملة او تعليق او فكرة او حوار او نصيحة او اهتمام او صداقه او حب او اخوة فى الله بجد كل واحد/ة فيكوا بالنسبة لى مش مجرد صفحة على النت بدخل اقرا كلامهم واسيب تعليق دليل على انى عديت وامشي انا كنت متابعه مدونات كتير بس كنت دايما اقول بلاش تعلقى غير لما يبقى عندك وقت تعلقى صح وفى الاخر بقيت مش بعلق خالص

ناس كتير لما قروا مدونتى قالوا لى ان اكتر حاجة عجبتهم فيها انى بتكلم من قلبى اوى بصراحة انا مش عارفه ده عيب ولا ميزة فى زماننا ده بس انا مش عارفه اعمل غير كده

انا محتاجة اجازة من التدوين علشان التدوين بالنسبة لى حاجة شخصية بتخرج من قلبى ولما يبقى قلبى مجروح من الدنيا ماظنش انى هاقدر اخليه يقول حاجة مفيدة ولو قال كفاية عليكوا نكد معايا بقى خلينا حلوين كده مع بعض لحد ما ربنا يسهلها ونعرف نقول عصارة الخبرات دى بطريقة مفيدة من غير غلاسة ولا تقل دم ولا عياط ولا انهيارات ولا زلازل ولا اعاصير ولا ..........ايه نشرة الاخبار اللى انا عملتهالكوا دى :)))

بالذمة والنبى مش الجملة دى كانت اريح ليكوا
متوقفه عن التدوين حتى اشعار اخر

(بالذمة والنبى مش حلف بغير الله دى كلمتين معروفين عند المصريين يا جماعة بيتقالوا معظم الوقت فى الهزار )

عارفه ان افكارى جايز تكون غير مرتبه بس حاولوا تفكوا الطلاسم بقى على اد ما تقدروا وربنا يعينكوا على المتاهة دى

رتب حياتك 2

اعرف نفسك

لا تترك الناس يؤثرون عليك حتى تتصرف بطريقة مغايرة لطبيعتك ومن ثم يكون حكمهم عليك نابع من تأثيرهم السيئ ............. ولكنهم بالطبع لا يعلمون !!!!!

أعتقد أن جميعنا جربنا مثل هذا الموقف " وليس دائما فقط الناس ذوى الشخصيات الضعيفة " فجميعنا يأتي علينا وقت نجد أنفسنا واقعين تحت تأثير شخص ما تماما ودون أن ندرى نتصرف بطريقة ليست هي ما نحن عليه ليست دائما طريقة سيئة ولكنها ليست مرضية أيضا

يأتي علينا وقت نقول لماذا افعل هذا أو ذلك ؟ إنني أكره أن أظهر بمظهر ضعيف الشخصية ولكن كلما جاء الأمر لهذا الإنسان لا أحس بنفسي إلا وأنا أتصرف بطريقة معينه وهي لا ترضيني ليست لأن شخصيته أقوى من شخصيتي ولكن .............. الجواب في معظم الأحيان يكون لا أعرف لماذا ،،،،،،، أو لأني أحبه كثيرا و أحاول أن أرضيه حتى ولو على حساب نفسي ،،،،، أو أسباب أخرى مثل أن يكون تأثير تلك المجموعة من الأصدقاء يجعلك تتصرف بطريقة معينه تتماشى معهم ولكنها لا تتماشى مع طبيعتك الخاصة ..... أسباب كثيرة تؤدي جميعا إلى نهاية واحدة ...............

!!!!!!!!!!!!!! من هذه أنا لا أعرفها !!!!!!!!!! يا إلهي هذه ليست أنا !!!!!!!! من تلك الفتاة التي تسكن جسدي وتتحدث بلساني و أنا واقعة تحت تأثيرها !!!!!!!!!

تجد نفسك في حضور هذا الشخص أو هؤلاء الأشخاص لست أنت و أيا كان السبب ولكن في النهاية تجعلهم يصدرون الحكم الخطأ عليك وبالطبع لن يصل تفكيرهم لأنه لا يوجد شخص يحب أن يصل لهذا الاستنتاج وهو أن تأثيره أو تأثيرهم عليك هو السبب في ما وصلت إليه

إلى حد ما لا يجب أن تلقى باللوم على من حولك وبالطبع لا يمكن أن تلقى باللوم كله على نفسك وأيضا لست مضطرا أن تحس أنك ضعيف الشخصية لأن الأسباب ليست دائما ضعف الشخصية

الأهم في هذا الموضوع هو القرار

علي أن أتخذ قرار بالعودة إلى نفسي وعدم ترك الآخرين يتركون في هذا الأثر ولا يجب أن أترك الآخرين يوصلونني إلى تلك المرحلة التي أتوه فيها في ثنياتهم و طياتهم ولا أعرف أين أنا ولا من أكون

يجب أن نتخذ هذا القرار إذا وصلنا إلى تلك المرحلة وربما تفيد الوحدة في تلك الأثناء لأنها تكون أسلم حيث تبتعد عن تأثيرهم لفترة تكفيك حتى تعرف ما هي أخلاقك وطبيعتك ورغباتك التي تكمن داخلك والتي يجب أن تنتج عنها تصرفاتك وليست المبنية على تأثير الآخرين

رتب حياتك 1

إلى حد ما تنفع الوحدة في مثل هذا الوقت عندما يحتاج الإنسان إلى العودة لنفسه لمعرفة حقيقة الأشياء من حوله والأهم الأشياء بداخله

أخطاء نرتكبها دون أن ندرى كأن نترك مشاعرنا تؤثر في تصرفاتنا أو في علاقتنا بالآخرين لست واثقة تماما وأنا أقول ذلك خاصة في هذا الوقت ولكن هذا صحيح في نظري الآن

صحيح أن علاقتنا بالناس هي بداية أو نهاية مسألة إحساس ومشاعر وروابط عاطفية وروحية " بالطبع ما أتحدث عنه هو خارج النطاق العملي " و بالتالي من الطبيعي أن تؤثر مشاعرنا على علاقاتنا بهم

ولكن أيضا هناك رأي آخر وهو أن المشاعر عندما تدخل في العلاقات تفسدها

فمثلا عندما أكون حزينة أو مكتئبة لأي سبب أفضل الابتعاد عن الناس و لا أحب الشكوى حتى لو حاولت التحدث أتحدث في كل أمر لا يخص مشكلتي بقريب أو بعيد
وبالتالي فإن أصدقائي يتضايقون ومعظمهم يحس أنني لا أثق بهم أو أنني لا أعتبرهم أصدقائي أو أو
..............

وحتى أنني أتوقف عن التدوين أيضا لا أعرف لماذا ولكن أفضل الوحدة التامة في مثل هذه الأوقات

هذا مثلا نتيجة لتدخل مشاعري في تصرفاتي ومواقفي مع الآخرين

من زاوية أخرى إذا نظرت للموضوع أجد أنني أكون حقيقية معهم أكثر بتلك الطريقة فلو أنني كنت معهم طبيعية وأتحدث و أضحك ولا أدعهم يحسون بشيء ففي هذا شيء من الزيف مع أنني في معظم الأحيان أفعل هذا حتى لا أجعلهم يتساءلون ماذا بكى أو مما أنت متضايقة وهكذا


هل يجب أن نظهر مشاعرنا أم نخفيها ؟ هل يجب أن يعرف الناس من حولي ماذا بي أم الأفضل أن أتحمل كل شيء في صمت كالعادة حتى أن أمي نفسها لا تحس بي ؟؟؟؟؟؟؟؟؟؟؟؟؟

A wounded wing can fly but a broken

Was like a bird flying up so high looking down
Every thing used to look so small so clear

Used to fly

he knew how to breath how to flap his wings in the air how to swim with the wind and dive in the space

Used to have his ups and downs knowing that flying is dangerous but that is what life is all about

Wasn't afraid to fear
Sadness could never make him sad
And weakness could only make him get stronger every and each time

But

He got hurt , injured so badly
He bled so much
Tasted the pain and new how a broken wing can disable you to fly

This wing was always injured but he knew how to fly again and again he always knew that you can go on even with pain

His white feathers where always so beautiful that nobody ever noticed his wound
They always have seen him as the most pure bird there eyes have ever laid on

He is so beautiful , pure , angelic and happy that's the only way they saw him .

He always helped people whether they are his friends or not although he is so small but so powerful and helpful that he always knew that two loving wings can carry two birds even if one of those two wings was wounded .

But sometimes birds reach the extent to which they are not capable of flying , just too hurt to fly even to try flapping their wings in the air too tired to try to rise their heads and look forward

And right then they just lie down with their broken wings , wavering eyes , and lost hopes .

Sometimes a bird needs another bird to carry him on his wings when his are too tired to try

؟

مش عارفه ابتدي كلامي منين

بس بجد انا وصلت لمرحلة انى عايزة اروح فى غيبوبة :)

بقت دي حاليا امنية حياتى :)

انا عارفه انكوا مشغولين ومش فاضيين وكده وعارفه ان البوست مش هايثير اهتمام ناس كتير بس تقريبا دلوقتى مش في غيركوا اتكلم معاه

عارفين لما تبقوا خلاص بتخافوا من الناس بجد

فعلا مش لانهم شريرين بس لانى بقيت حاسه انه خلاص مكتوب عليا مايبقليش علاقة بحد حاسه انه لازم يحصل حاجة غلط

كنت زمان كده فى اعدادى تقريبا وزى ما كلكوا عارفين ان الانسان بيكون حواليه عدة دوائر ليها مستويات مختلفة يعني فى الخصوصية

خليت كل الناس بره الدايرة الاولى اللى هى حواليه "الخاصة" اللى هى العيلة وكمان التانية اللى هيا الاصدقاء والتالته اللى هيا الاصحاب وخليت كل الناس في الرابعة اللى هيا الزملاء وماكنتش بسمح لحد يتخطى حدوده اللى هى حدود دايرته وماكانش حد يعرف هو فى اى دايرة كل الناس كان بيتهيالهم انهم قريبين منى

بعد فترة ابتديت احس انه كده غلط ومش هاتكتسبي خبرة فى الحياة ولازم تتعاملى مع الناس وكده

ايوه بس الناس بتجرح

ايوه بس انتي لازم تتعلمى

ما انا بتعامل معاهم مش لازم يكونوا كلهم اصدقائي

طيب بس مش بتتعاملى معاهم وهما قريبين منك انتى بعيد

بعد كده ابتديت الخبط الدواير في بعضها بقى والدنيا باظت

وطبعا اتعلمت :)

بس الدرس خلانى عايزة ارجع اعمل الدواير دي كلها تانى بس المرة دى

الدايرة الاولى فيها عيلتي وندى بس

وكل الدواير هاتبقى فاضية لانه للاسف ولا مرة لقيت حد وقفت جانبه فى يوم من الايام وقف جانبى فى مرة احتجت له فيها

يعني صديقة ليا حصل لها موقف وقفت جانبها فيه نفس الموقف بحذافيره حصل لى كانت هى اول واحدة مشيت وسابتنى مقدره ظروفها والله العظيم مش بلومها بس اد ايه اتاثرت

وناس تانيين كنت فاكراهم اصدقائي تليفونى مش بيرن برقمهم ابدا رن" بس" لما احتاجولى وبرضه مش هالومهم هما بيحاولوا ما يحتاجوليش علشان ما يتكلموش بس للاسف احتاجولى فاضطروا يتكلموا :)

ناس تانيين سيبتهم يقربوا منى جايز الاقى فيهم اصدقاء كويسين جملة كان ليها باقى ماسابونيش اكمله وطبعا بقيت الكلام كان هايوضح القصد وكان حاجة غير اللى اتفهمت خاااااااالص بس تقولوا ايه بقى على سوء الظن ويا سلام على المعاملة اللى بقت بعد كده

اللى نفسي افهمه

ليه ؟

يعني ليه الناس مش طيبين ؟

ليه الناس مش بيتعاملوا باللى فى قلبهم؟ ليه دايما اللى جوه غير اللى بره ؟

ليه فى ناس خاينه وكدابه وبيخلوكوا تفقدوا الثقة فى كل اللى حواليكوا؟ ليه بيكدبوا اصلا ؟

ليه فى ناس مش بتهتم بمشاعر اللى حواليها ؟وبيجرحوا الناس بكل ما اوتوا من قوة بدون ادنى الم ولا طرفة عين ؟

ليه في ناس بتستغل طيبتك ؟

ليه فى ناس بمعنى اصح بتخليك توصل لدرجة انك تحس انك فعلا ساذج من كتر ماهما مش صريحين وعنيهم دايما بتقول كلام غير اللى تصرفاتهم بتبينه ؟

ليه الناس دايما بتيجي على الطيب ويعملوا الف حساب للى مش طيب ؟

ليه الناس دايما تجرح اللى بيديهم ويعظموا اللى بيديهم برضوا بس على دماغهم ؟

بجد انا مش فاهمه الدنيا دى مالها والناس مالها ليه مش في حد طيب ليه مش في حد تحس بالامان وانت قريب منه ليه كل الناس غدارين

ليه ؟

علامة استفهام كبيرة اوى مخليانى بقيت بكره الدنيا اوى اوى وبقيت بكره طيبتي اللى برضه مصممه انى مش هتنازل عنها واللى برضه لحد دلوقتى بحاول اقنع نفسي انها مش سذاجة بكره طيبتي ونفسي ابطلها فى نفس الوقت مش عايزة ابطلها

حد عنده إجابة تريحني

سؤال وجواب

المعيد بتاعنا
سألنا سؤال في سيكشن التسويق

وهو بجد من الناس القلائل جدا اللي اقل من إنهم يتعدوا على أصابع اليد الواحدة اللي فعلا احترمتهم في حياتي

بتتوافر فيه كل خصائص المدرس الجيد
من شرح المعلومة كويس جدا
الكاريزما العالية وقدرته على جذب الانتباه ما شاء الله طول الوقت

وتقريبا نص الدفعة بتحضر له في السيكشن ده وكان بيشرح في ال monopoly
الاحتكار

والسؤال كان" وهو كان سؤال من اللي بيتقال عليهم حدث بالفعل"

لو أنت عندك مصنع بيعمل عبايات حريمي سعر العباية الواحدة 40 جنيه وبعدين جالك واحد صيني وقال لك يا تقفل المصنع بمزاجك يا أنا هانزل السوق عبايات نفس الخامات ونفس التصميم وبسعر 25 جنيه مع العلم إنها بتتكلف مع المصنع المصري حوالي 30 جنيه ومع المصنع الصيني 18 جنيه وهاخليك تقفل غصب عنك

هاتعمل إيه ؟؟؟؟؟؟؟؟

هو سألنا السؤال ده مرتين
أول مرة بصراحة أنا اتضايقت جدا وقلت ازاى؟ يعني إيه اقفل المصنع ؟ وقعدت أفكر بس طبعا ماكنش في وقت أفكر كويس

وسأل السؤال تانى

وكان الموضوع من وقتها شاغلني وفكرت فيه
وكانت الإجابة

الوحيدة في السيكشن اللي قالت لا مش هقفل المصنع

ولقيته بيقول
فتاة الجنة
وكان موقف محرج جدا جدا جدا

ركزوا يا جماعة هو ما قالش اسمي الحقيقي هو قال
فتاة الجنة فعلا
الدكتور يعرف المدونة

المهم انه أنا ومن حسن حظي كنت قاعدة بالظبط آخر واحدة في الرووم يعني آخر بنت في آخر بنج وقاعدة لوحدى فماحدش تعب نفسه وبص الحمد لله

المهم انه والله كتر خيره بجد
سألني ليه؟
بس بما انى قاعدة في الآخر ومع انى جاوبت بس الظاهر انه الإجابة ماكانتش واضحة

أقولكوا أنا قلت لا ليه بقي


الإجابة بتاعتي كانت لا مش هقفل المصنع وإنهم زى ما هما بيجيبوا خامات رخيصة فالبتالى سعر التكلفة بيقل معاهم أنا كمان كمديرة مصنع أدور على مكان استورد منه خامات رخيصة واصنع في مصنعي بنفس التكلفة وبالتالي لما أبيع اقدر أبيع بسعر اقل وأكون منافسه ليه في السوق

طبعا الموضوع فيه عوامل اكتر و ممكن انه الراجل الصيني ده " الهي يقع يتكسر يا رب " يبيع بسعر ارخص فترة وبما انى وقتها هابقى مصنع صغير مش هاقدر استحمل الخساير وهاقفل برضه لكن هو مصنع كبير فهاياخد السوق هو" لك" كتير كده مالوش لازمة بس عامة انه في حل تانى عنده بس خلينا في موضوعنا


الاختلاف أو النقطة اللي فقدنا عندها الاتصال والدكتور مافهمش قصدي فيها انه

الدكتور رأيه انه لو انتى كده كده هاتستوردي حاجة فالأفيد لك والأسهل لك انك تاخدى المنتج جاهز وكمان واصل لك هون ديليفري يعني أنتي كده كده بتستوردي

بس الفرق عندي أنا كان في حاجة تانية

لو إن أنا اخدت المنتج جاهز ورخيص من المصنع الصيني يبقى أنا عملت إيه استغليت عماله صينيه وخامات صينيه وبالتالي ساعدت في بناء الاقتصاد الصيني وخلقت في بلدي بطالة وخليت السوق بتاعى سوق مستهلك بس

لكن لو أنا جبت حاجة واحدة بس من بره ألا وهى الخامات الأرخص يبقى أنا شغلت أولاد بلدي وبالتالي استغليت عماله مصرية وخليت السوق بتاعى منتج مش بس مستهلك وساعدت في بناء اقتصاد بلدي

جايز يكون كلامي ده كله بالنسبة لناس كتير هبل ومالوش أي فايدة وانتى واجعه لنا دماغنا ليه؟
بس بجد يا جماعه ليه مش بنتعب نفسنا ودايما بناخد بالحل الأسهل؟
وده في كل حاجة مش في طبق صيني اتكسر بس J

أتمنى أسمع من كل حد فيكوا
هاتعمل إيه ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

ملحوظة : الموضوع ده من فترة بس كنت مأجلاه

مشكلة جديدة

مشكلة جديدة

صديقتي وحبيبتي