ربنا علمنى ايه النهاردة؟

دى كلمه قالها الداعيه مصطفى حسنى فى واحد من برامجه "ربنا علمنى ايه النهاردة"
كان بيقول لو كل واحد لما يصحى الصبح من النوم يفكر ويقول يا ترى ربنا هايعلمنى ايه النهاردة
فعلا ده صح ربنا بيعلمنا حاجات جديدة كل يوم فكروا كده
ما خرجتيش فى مرة من البيت وانتى معجبه بنفسك كده وواخدة فى نفسك مقلب قال يعنى البت قمر ماشي علي رجلين و" دن " تلاقيكي رحتى واقعه على وشك بقى على ضهرك حسب التساهيل
اتعلمتى بقى ايه يا قمر انك ما تكونيش مغرورة تتواضعى وما تسيبيش الشيطان يلعب بيكي كورة
و انت مثلا خارج من البيت مرة والواد بقى ايه يا سلام واخد اوسكار شعر ودقن ولابس الحته اللى عالحبل ومش شايف حد غير نفسه عالطريق و "دن " واحدة ربنا يسترها من الجيران بتمسح البلكونه والمياه نزلت على دماغ الاخ
ولا واحدة من البناويت الامامير معجبه بنفسها اوى وماشيه فى الشارع و لقت حد بيعاكسها وبيقولها يا اخواتى سعاد حسنى بالظبط و "زو" لبس في وشها كيس سندوتشات مش نضيف طاير في الهواء
ايه دي مش دي كلها اشارات
لما تبقى خايف من الامتحانات وميت فى جلدك من الرعب ومش شايف قدامك وانت ماشى وخلاص شويه وقلبك ها يقف وعلى غير العادة تلاقى الحكاية كده ربنا مسهلها والمواصلات عسل تركب وتنزل ولا تستنى تاكسي يرضى يوديك الجامعه تلاقيه كده يقول لك اركب ولا تستنى مواصلة ولا غيره كله ماشي وربنا مسهلها فتعرف ان ربنا بيطمنك وبيريح قلبك
لما اصحابك يظلموك ويتعبوك ويطلعوا عينك وتتحسبن مش عليهم بس بتقول حسبي الله ونعم الوكيل يعنى يكفيني الله وهو نعم الوكيل وتلاقى كل واحد فيهم اللى جاى يعتذر لك واللى جاى يسالك هو انت دعيت عليا ليه يا عمنا اصل انا حصل لى مصايب امبارح كذا وكذا وكذا
لما تلاقيك قاعد قدام التليفزيون قاعد تقلب شمال ويمين وهاتموت وتلاقى حاجة عدله تشغلها وبعدين بالصدفه مع انك كنت جايبها من شوية تلاقى قناة اقرا ولا الرساله عليهم برنامج وفى نص البرنامج كده انت بتقلب وتسمع لك كلمتين يريحوا قلبك
زى مثلا اجى اقلب قى مرة الاقى عمرو خالد على قناة النجاح بيقول ربنا بيحبك وعايزك تتوب مادام سمعت الكلام ده دلوقتى ناس كتير بتتفرج عالتليفزيون بس ربنا قدر لك انك تسمع الكلام ده انك تقلب بالصدفه وتلاقيني بقول الكلام ده وهو صادق فعلا الحكاية جايه صدفه اشمعنى ما سمعتش الكلام ده قبل كده اشمعنا مع ان الحلقه دى قديمه من خمس سنين يعنى كان ممكن اسمعها اى وقت اشمعنا لما عصيت ربنا سمعتها دلوقتى يبقى فعلا ربنا عايزنى اتوب
لما جيت اقلب مرة صدفه ولقيت مصطفى حسني بيتكلم عن نعيم القبر ويقول مادام انت قاعد تسمعنا دلوقتى يبقى ربنا عايز يرحمك يبقى ربنا عايز يهديك يبقى ربنا عايز يغفر لك عايزك تتوب مادام ربنا خلاك تسمع الكلام ده دلوقتى يبقى ربنا لسه ما طردكش من رحمته عايزك ترجع له
ربنا علمنى ايه النهاردة؟
سؤال جميل لو كل واحد وهو ماشى في الشارع ساله لنفسه هيلاقى ربنا رحيم بيوريك مظاهر رحمته هايلاقى ربنا صبور اوى وصابر عليك
لما بيكون لك صديق هو اقرب الناس ليك ويؤذيك او يخونك او او ما كلنا شفنا صداقات من النوع ده وتلاقى ربنا واقف جانبك بيساعدك وبيخفف عنك وبيصبرك و تلاقى عنيك بتفتح على حاجات ما كنتش شايفها سواءا صحبه تانيه صالحه او علاقتك اللى كانت بايظه باخوك تتصلح او او او تلاقيك اتعلمت تبكى بين ايدين ربنا واتعلمت تدعى من قلبك وابتديت تقوم الليل
لما بتكون معدى من الشارع وخايف تموت علشان فوت صلاة الظهر ولا العصر بسبب المحاضرات ولا الكلية و تلاقى ربنا عطاك العمر لحد ماتتوب عن ترك الصلاة خلاك تعدى من عالكبرى من غير ما يقع خلاك تعدى من على شريط القطر من غير ما يدوسك خلاك تعدى من عالطريق من غير ما عربية تطيرك ولا تلزق فى كاوتشات عربيه نقل
لما بتلاقى ان اكتر حد ممكن تحبه هو ربنا , هانقول ليه ؟
هو لما حد بيحب بيحب ليه ؟علشان يلاقى الامان مع اللى بيحبه علشان يحس بالاطمئنان علشان يحس بالاحتواء علشان يحس انه لما يقع فى مشكله هايلاقى اللى ينصحه ويقف جانبه علشان يبقى عارف ان فى حد بيحبه اوى فلو غلط هايسامحه وهايعدي له
ما كل الحاجات دى مع ربنا
عالاقل الانسان بيخون وبيجرح ولو فى يوم من الايام وقعت فى مصيبه اكتر حاجه هايقدر يعملها ايه انه يواسيك لكن يحلها لك ممكن يحاول بس هل هو قادر على ان يحل اى مشكله ايا كانت
عالاقل لما بتبقى مع ربنا بتبقى عارف انك لو مت اى وقت هاتروح مكان احسن مش هاتبقى خربت دنيتك واخرتك هاتبقى حاسس بالامان وانت بتعدى من عالطريق ومن عالكبرى وانت رايح الامتحان وانت بتعدى من على شريط القطر و انت نايم كل الاوقات هاتحس بالامان وقت ماتقع فى مشكله ضامن انه يجيب الداع اذا دعاه يعني جانبك جانبك
ربنا علمنى ايه النهاردة ؟
علمنى ان معصيتى ممكن يكون لها نهايتين
اما
اتوب فيعطينى اللى احسن منها او يعطيها لى بس بطريقه حلال او حتى فى الجنه وانما الاعمال الخواتيم ويكون ختامى خير
او
انى ما اتوبش وبرضه المعصيه هاتنتهى بس هاتنتهى وانا خسرانه حاجات كتير اوى اصغرها راحة البال واعظمها اخرتى
اسالوا نفسكوا ربنا علمكوا ايه النهاردة ؟