المعيد بتاعنا
سألنا سؤال في سيكشن التسويق
وهو بجد من الناس القلائل جدا اللي اقل من إنهم يتعدوا على أصابع اليد الواحدة اللي فعلا احترمتهم في حياتي
بتتوافر فيه كل خصائص المدرس الجيد
من شرح المعلومة كويس جدا
الكاريزما العالية وقدرته على جذب الانتباه ما شاء الله طول الوقت
وتقريبا نص الدفعة بتحضر له في السيكشن ده وكان بيشرح في ال monopoly
الاحتكار
والسؤال كان" وهو كان سؤال من اللي بيتقال عليهم حدث بالفعل"
لو أنت عندك مصنع بيعمل عبايات حريمي سعر العباية الواحدة 40 جنيه وبعدين جالك واحد صيني وقال لك يا تقفل المصنع بمزاجك يا أنا هانزل السوق عبايات نفس الخامات ونفس التصميم وبسعر 25 جنيه مع العلم إنها بتتكلف مع المصنع المصري حوالي 30 جنيه ومع المصنع الصيني 18 جنيه وهاخليك تقفل غصب عنك
هاتعمل إيه ؟؟؟؟؟؟؟؟
هو سألنا السؤال ده مرتين
أول مرة بصراحة أنا اتضايقت جدا وقلت ازاى؟ يعني إيه اقفل المصنع ؟ وقعدت أفكر بس طبعا ماكنش في وقت أفكر كويس
وسأل السؤال تانى
وكان الموضوع من وقتها شاغلني وفكرت فيه
وكانت الإجابة
الوحيدة في السيكشن اللي قالت لا مش هقفل المصنع
ولقيته بيقول
فتاة الجنة
وكان موقف محرج جدا جدا جدا
ركزوا يا جماعة هو ما قالش اسمي الحقيقي هو قال
فتاة الجنة فعلا
الدكتور يعرف المدونة
المهم انه أنا ومن حسن حظي كنت قاعدة بالظبط آخر واحدة في الرووم يعني آخر بنت في آخر بنج وقاعدة لوحدى فماحدش تعب نفسه وبص الحمد لله
المهم انه والله كتر خيره بجد
سألني ليه؟
بس بما انى قاعدة في الآخر ومع انى جاوبت بس الظاهر انه الإجابة ماكانتش واضحة
أقولكوا أنا قلت لا ليه بقي
الإجابة بتاعتي كانت لا مش هقفل المصنع وإنهم زى ما هما بيجيبوا خامات رخيصة فالبتالى سعر التكلفة بيقل معاهم أنا كمان كمديرة مصنع أدور على مكان استورد منه خامات رخيصة واصنع في مصنعي بنفس التكلفة وبالتالي لما أبيع اقدر أبيع بسعر اقل وأكون منافسه ليه في السوق
طبعا الموضوع فيه عوامل اكتر و ممكن انه الراجل الصيني ده " الهي يقع يتكسر يا رب " يبيع بسعر ارخص فترة وبما انى وقتها هابقى مصنع صغير مش هاقدر استحمل الخساير وهاقفل برضه لكن هو مصنع كبير فهاياخد السوق هو" لك" كتير كده مالوش لازمة بس عامة انه في حل تانى عنده بس خلينا في موضوعنا
الاختلاف أو النقطة اللي فقدنا عندها الاتصال والدكتور مافهمش قصدي فيها انه
الدكتور رأيه انه لو انتى كده كده هاتستوردي حاجة فالأفيد لك والأسهل لك انك تاخدى المنتج جاهز وكمان واصل لك هون ديليفري يعني أنتي كده كده بتستوردي
بس الفرق عندي أنا كان في حاجة تانية
لو إن أنا اخدت المنتج جاهز ورخيص من المصنع الصيني يبقى أنا عملت إيه استغليت عماله صينيه وخامات صينيه وبالتالي ساعدت في بناء الاقتصاد الصيني وخلقت في بلدي بطالة وخليت السوق بتاعى سوق مستهلك بس
لكن لو أنا جبت حاجة واحدة بس من بره ألا وهى الخامات الأرخص يبقى أنا شغلت أولاد بلدي وبالتالي استغليت عماله مصرية وخليت السوق بتاعى منتج مش بس مستهلك وساعدت في بناء اقتصاد بلدي
جايز يكون كلامي ده كله بالنسبة لناس كتير هبل ومالوش أي فايدة وانتى واجعه لنا دماغنا ليه؟
بس بجد يا جماعه ليه مش بنتعب نفسنا ودايما بناخد بالحل الأسهل؟
وده في كل حاجة مش في طبق صيني اتكسر بس J
أتمنى أسمع من كل حد فيكوا
هاتعمل إيه ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
ملحوظة : الموضوع ده من فترة بس كنت مأجلاه
13 comments:
برافو عليكي
انت بنت شاطرة وطالبة مجتهدة وبتفكري كويس
لان مثلنا الشعبي بيقول
الايد البطاله نجسة
لو قفلنا المصنع هتبقى الايد بطاله
اما لو استمرينا هنلاقي حل اكيد
ومن يتقي الله يجعل له مخرجا ويرزقه من حيث لا يحتسب
مش مصانعنا اللي اتباعت واتقفلت واتسرحوا عمالها زي مصنع الغزل في بهتيم بقى خرابة
منهم لله اللي في بالي
لحظة
فعلا وهو ده رايي انه مش لازم ناخد بالحل الاسهل دايما
ونعمل اللي علينا برضه
لا فى دى مش في حاجة نقولها غير حسبنا الله ونعم الوكيل
السلام عليكم ورحمة الله وبركاته
حقيقة إجابة السؤال ده صعبة جدا وانا كاتب تدوينة في نفس الموضوع ده في الدرافت من شهر 4 الماضي ومش قادر انزلها
الحقيقة إن الموقف ده المفروض يكون موقف قومي تتبناه الدول التي تستطيع أن تقدم تسهيلات لأن الإجراء الذي قد يأخذه الشخص سوف يكون تضييعا للوقت والمال وسينهار دون أن يحقق أدنى وجع للمنافس
فالحل في هذه الحالة هو إما الدول وإما التكتلات وربما شراء خطوط إنتاج هناك لحين الوصول إلى اختراق فجوة التأخر الذي تسبب فيه أصلا قرار أخذه سابقون بسوء نية أوسوء نية أو سوء نية
للتخلي عن المشروعات القومية في مقابل الرحلات والبدلات ووو
كان هناك رجل فتح سوبر ماركت كبير وكان صديقي مديرا له
وجاء أمير معروف أراد أن يشتريه فعرض مبلغا نفترض 7 مثلا فرفض الرجل وقال أنه لن يبيع أبدا قال له الأمير سأشتري الأرض الخالية التي بجوارك وأبيع بنصف الثمن عاما كاملا ففكر الرجل قليلا ثم قال فبلت بسبعة رد الأمير أنا لم أقل 7 بل قلت 5 وباع الرجل بخمسة
حسبنا الله ونعم الوكيل
انا شخصيا شايف رأى حضرتك صح
انا برضه هحاول اجيب خامات اقل تكلفة
و أصنع فى بلدى
لكن الموضوع مش هيتحل بانى اتصرف كدة
البلد كلها لازم تتصرف
و توفر مواد خام تكون ارخص
دى لازم تكون استراتيجية بلد
مش بس تصرف فردى
جزاكم الله خيرا للموضوع الممتاز فعلا
د.حمــــــاس
المشكلة اننا بقى عندنا عقدة الخواجه في كل حاجه
فيها ايه لما نعمل الحل ده
هو صحيح صعب شوية ومحتاج مغامرة
لكن أعتقد هاينجح في نهاية المطاف
إجابة رائعة وجميلة
دمت بكل الود
احم احم .. ظبطلى المايك يابنى
ايوة ياجميلة .. انا كنت حقوله زى مانتى قلتيله بالظبططط ..مع الفارق طبعا لانه لو قالى إنسانة كان قلبى حيقع فى رجليا واتلبخ واقوله .. حضرتك قصدك عليا؟؟ ... هو حضرتك تعرف المدونة بتاعتى؟؟.. والله صحيح؟؟ .. طب ايه رأي حضرتك فيها بجد من غير مجاملة؟؟
احم احم اه السؤال .. اه حاضر
:$
وابتدى اقول الكلمتين اللى انتى قولتيهوملوا دول
:D
خلصتى امتحانات ولا لسة يا جميلة؟؟
يارب بالنجاح
سؤال لوذعى فعلا ومشكلة حلزونية
بجد مش هزار
الشركات عابرة القارات توقعت الملعوب الصينى من فترة طويييييييلة
طب تصرفوا إزاى
عملو زى عصفور المدوات ربنا يكرمه قال
ناس عملو تكتلات إحتكارية
وناس عملو مصانع لهم فى الصين عشان يستفيدوا من الأيدى العاملة الرخيصة
والحاجة التالتة أنا يتهيألى إن المفتاح الرئيسى لمنافسة الصينى هو اللعب على الجودة بس فى ظل حماية حكومية
يعنى فرض معايير محددة لرقابة جودة المنتج وفق مقاييس علمية تشمل معاملات الامان ومعاملات أخرى يمكن قياسها بشكل موثوق فى دقته
وبالطريقة دى لا يمكن للمنج الصينى أو غيره دخول البلد إلا بعد إستيفاؤه مستوى معين من الجودة
لكن الإشكال أن المعايير دى نفسها لابد أن تطبق على المنتج المحلى لضمان تفادى أى مشكلة أو ذريعة للشكوى أمام المحافل الدولية المعنية
ودول أوروبا وأمريكا تضع مقاييس إجبارية ومواصفات جودة ملزمة ولذلك ستجد فرقا بن المنتج الصينى فى بلادنا ومثيله فى الدول الغربية على حد ما أخبرنى الثقات
صدعتك معلش بس بدل ما أكتب مدونة قلت أعلق هنا أفيد
هذا اتجاة قومى وخطط مستقبلية على مستوى الدولة
وبالتالى تتبع المصانع الفكر القومى
تحياتى
هو انتى حلك إلى حد ما منطقي
لكن برده الدولة ليها دور في حل المشكلة دي
مش فيه حاجة اسمها ضرايب وتأمينات وكهربا وميه وكل الحاجات دي
وده اللي بيرفع سعر المنتج المخلى
لو الدولة ساعدت شوية وخفضت الحاجات دي اكيد المشكلة هتتحل
عصفور المدينة
اد ايه حاجة محزنه بس كان ممكن صديقك يتصرف الى حد ما الراجل ده كان هياخد وقت على ما يشتري ويبنى ايا كان الوقت بس كان هيبقى مش اقل من ست سبع تمن شهور
كان ممكن يستنى لحد ما يصفي السوبر ماركت بتاعه وبعدين يعمل اعلام للزبائن بانه هايغير نشاط السوبر ماركت
ومادام سعره كده ما شاء الله يبقى اكيد كان عنده فرصه انه يغير نشاطه
dr,hamas
بس لو مفيش بلد
::)
قصدي لو مفيش حد يساعد هانستسلم بقى ونقول لا خلينا زي ما احنا وخلاص
يعني لما نلاقى حد بيحطنا قدام قطر نقول له شيلنا من قدامه علشان مانموتش ولا حتى لو مربوطين هانزحف من قدامه ::)
صاحب المضيفة
الاستاذ ابو مالك :)
الحقيقة فى الحكاية دي بتبقى غصب عننا يعني هنا متعقدين من الخواجة :)
وتحكمه فينا
فى بلدنا
إنسانه
ما تظبطلها المايك يابنى
ايه ده مدونة مش لاقيه حد يظبطها صحيح
مش عارفه ايه الناس اللي مش بتشتغل كويس دي الا لما حد يكون مراقبهم
يللا ما علينا
:D
ماعندكيش كامكوز سلف
ماهو انا مردتش اا لما خلصت امتحانات :)
Post a Comment