اصدقاء ولكن

غريبه اوى الصداقة دى, اصلا يعنى ايه صديق؟ ويعنى ايه صداقة ؟ انا اعرف ان الصديق هو من صَدَقك
وليس من صدّقك يعنى ايه برضه مش فاهمين. ماشى افهمكوا يعنى اللى تقول عليه صديقك مش اللى كل ماتقول له حاجة يصدقك لان ده مش صديق ده واحد انت بتعرف تضحك عليه , صديقك هو اللى ما يكدبش عليك هو اللى ما يخدعكش هو اللى لما تيجى تتكلم معاه تبقى حاسس بالامان لانك عارف ان سرك فى بير(بئر يعنى) صديقك هو اللى ما يلفش من وراك ويقول عليك كلام كدب او اللى ما يروحش يوصفك باوصاف مش فيك صديقك هو اللى مهما مر عليكم وقت يفضل وفى وعلى العهد وفى اى وقت تقابله تحس كانه لسه سايبك امبارح صديق يعنى حبيب واخ وبالنسبة للبنات صديقتى يعنى اختى يعنى حبيبتى يعنى اللى تتخانقى معاها النهاردة ولما تشوفيها بكرة تضحك فى وشك .
طبعا كلكم اكيد بتفكروا ايه الاخت دى اللى عايشة فى مثاليه وفى حلم الصداقة اللى اختفت من الناس انا بقى لسه عندى امل ان لسه فى فى الدنيا ناس ممكن نقول عليهم اصدقاء .
اصعب حاجة فى الدنيا بقى دى جرح الصديق لصديقه لما تعامل حد كانه اخ وتلاقيه اول واحد يبيعك ساعة الجد ويقول لك الجرى فى الحاجات دى كل الجدعنه ها وطبعا كل الولاد فاهمنى واما البنات بقى فدقات النقص عندهم بتبقى مختلفه شويه ,بيبقى لهم حتت كده مالهاش حل .