Wednesday, November 28, 2007

tom & jerry الحلقة التانية

ونقول السلام عليكم ورحمة الله وبركاته يا معشر البلوجرز

ونبتدى

النهاردة بقى و ايه خير اللهم اجعله خير
اصحى من النوم وانا عندى امتحان محاسبة راجعت قبل ما امشي كالعادة
وكلى اطمئنانن برضه
والنون للتاكيد برضه
انى ان شاء الله هاحل كويس
قولوا لى لييييييييييييه ؟

من غير ما تقولوا ليه لانى عارفه ان ماحدش هايقول ليه لان الحمد لله اتضح ان ليه تعمل على تقليص عدد السكان :)))))))
بما انى هاتكلم يعني ففى ناس هاتفقد اعصابها وهاترمى نفسها من عالرووف اول ما نوصل

المهم علشان ما الكش كتير زى العادة :)

انى رحت امتحن وخير اللهم اجعله خير برضه اذ بسواق التاكسي بيقول لى بوابة البارون يا آنسة
قلت لا علوم ان شاء الل.........................
هيا المفروض كانت علوم ان شاء الله ده طبعا قبل ما البس في ازاز اللى هيا زجاج العربية واذ بالسواق ضغط فرامل لان فى سواق تانى كما اسماه اخونا الكريم ........ كنت كتبتها بس رجعت فى كلامى بلاش غيبه عيب
اخونا وقف من غير ولا اشارات ولا زمامير ولا حتى زغاريد ولا اي حاجة خااااالص المهم طبعا وبما انى بالظبط اد الميدالية اللى بتتعلق فى جيب او شنطة اى حد فاذ بيا طرت كده خير اللهم اجعله خير و لبست فى ازاز العربية وطبعا حصل لي زي ما تقول كده انى اتخشبت فى الوضع العجيب اللى كنت فيه اللى هو ان ايدي اليمين لابسه فى الازاز

بس شوية كده وابتديت اخد بالى وظبطت نفسي كده وقعدت وبعدين قلت الحمد لله انى ماخرجتش من الازاز:)))))))))))

ده طبعا بعد ما قلت لا اله الا الله

طبعا السواق اعتذر واسف يا آنسة وكلام من كده بس عادى بقى قلت حصل خير الحمد لله

ايه قال وقلت له وقال لى وقلت له على فكرة دى الظاهر انها صفة فى الستات كلهم ايه ده دى حاجة تزهق شكلى كده هابطل حكاية قلنا وقالوا دى

المهم

وصلت الجامعة وقولوا ايه

وعدى النهااااااااار والضهرية جايه وجايبه معاها موعد الامتحاااااااان وعشان اتوه فى السكة قلت لاااااااااااازم ادخل اللللللللللجنة

اتوه ايه تؤ الظاهر ان الشريط سف ما علينا ولا نقول السي دي بما يتناسب مع روح العصر

واذ بورقة الامتحان

وخير اللهم اجعله خير تااااااااانى برضه اذ باربع صفحات كل صفحة فيها تلات مسائل كل مسئلة ييجي كده طولها خمسة سنتى وده طبعا بخط نمنم نمنم اللى هو شوية وكان بؤبؤ عيني ناوى يخترق ورق الصفحة وتحت البؤبؤ قصدي تحت المسئلة اذ بقولوا كده ايه تلاته سنتى ولا حاجة نحل فيهم

والهى وانتى جاهى اشوف فيك يوم

قولوا ان شاللللللللله

هههههههههههههه

سوري على وصلة الدعاء السوفاج ال تغاي تغاي تغاي سوفاج اللى هاتسمعوها دى سوري بجد لوكال انا عارفه بس ما تلومونيش يا جماعة هاتعرفوا حالا والمرة دى بقى لما نوصل الروف كل المطلوب منكوا بس تشاوروا لى انط منين وهانط لوحدى مش هاحتاج حد يرمينى ولا حتى يزوأنى

المهم

اختكوا فى الله والله العظيم مذاكرة ومراجعة وحله اسئلة واييييييييييه لا وايييييييييييييييييييييييييييييه باخد درس

ياا لااااااااااااااااااااااااااااااااااااهوى يا خرابى


ماحدش يمسكنى سيبونى عليه بس اشوووووووووووفه هامسك في زمارة رقبته ماحدش يقول لى هيا فين انا هادور عليها بمعرفتى لا بمفكى بسكينتى بمعرفتى ايه

السيد الاستاذ المحترم الموقر الهى يكرمه ربنا من وسع ياااااااااارب جايب لنا امتحان بكل معنى الكلمة ولا يتشاف بجد بجد بؤبؤ عيني حكيت لكوا اهو نط فى الورقة ولا يتقرا

امتحان من عجايب الدنيا السبعة الجداد اه بجد

كل الناس اللى خارج يعيط واللى خارج من كتر الغلب ياعيني هيس وقعد يضحك وانا من دول وشوية كده وما قدرتش امسك نفسي

لو حد منكوا فى جامعة المنصورة وشاف النهاردة بنت بتدعى من كل قلبها على واحد يبقى انا وقاعدة تتحسبن عليه يبقى اكيييييييييييد انا

يا جماعة المراقب ضحك عليا اه والله

اقرا المسألة واقول ايه هو اللى انا بكتبه ده هو الاجابة ولا لا
تؤ هو عايز ايه
طيب ده صح ولا غلط
يااااااااااااالهوى

واروح ماسكه القلم ورافعه ايديا فى السما وخدوا بالكوا من الوصف الدقيق

حسبي الله ونعم الوكيل
واروح مجاوبة

ولما اقف علشان افكر اول ما تيجي في بالى حاجة يمكن تبقى هيا المطلوب اكتب ووانا بكتب
ان شالله تمووووووت

شوية كده

يارب اشوف فيه يوم ياااااارب

شوية كمان

منك لله يا بعيد

هههههههههههههههههههههههههههههههههههههههههههههههههههههههههههههههههههههههههه

وتقدروا تقولوا هم يبكي وهم يضحك

بجد يا جماعة بجد كنت بكلم نفسي

وهذا شيء كما يعلمه المقربين منى شيء عاااااااادى جدا
in such acase
:)))))))))))))))))))))))))

ايه ده ايه ده

الراجل ده كان بينتقم ما تفهموش بيعاقبنا على ذنوب حياتنا كلها ما تفهموش بينتقم من مكتب التنسيق اللى حكم عليه بدخول كلية تجارة فينا برضه ما تفهموش

حد فاهم حاااااااجة

بصوا كفاية عليكوا الامتحان ده ما عليكوا بقى من اى حاجة تانية

انا بصراحة لقيت كده مش ليا نفس اذاكر ولا عارفه اعمل حاجة خالص قلت اجى افضفض ليكوا

استحملونى بقى وعذرا يا جماعة على اللوكلية اللى كنت فيها النهاردة بجد

je suis tres tres tres desole
pardonez moi mesdammes et monseurs

اخوتى واخواتى

استأذن بقى دلوقتى وان شاء الله نتقبل العزاء فى المرحومة المحاسبة وقت ما وقتكوا يسمح

لما ارجع بقى ده لو رجعت

ماهو لما مادة مذاكراها ومراجعاها واييييييييييه واييييييييييييه باخد فيها درس وانتوا مش متصورين حكاية الدرس دي مضايقانى اد ايه واعمل فيها كده

اممال هاعمل فى غيرها اييييييييييييه

يللا بقى اشوفكوا ان شاء الله قريب ده للى وصل الروف اللى ما وصلش برضه هاشوفه لان الظاهر كلكوا هاتدفعوا الغرامات الظاهر ماحدش دعى لى ولا عبرنى وشكلها كده خناقة وزعل

والظاهر فى ناس كتير هاتلبس فى ازازات العربيات
هههههههههههههههههه

على العموم بكرة ان شاء الله نقود وبنوك اللى بنقول عليها اختصارا ايكونوميكس ومذاكراها برضه وبما انى طلعت كل ما اذاكر ما احلش فازف اليكم الخبر السعيد السار جدا انى ان شاء الله وبقدم المشيئة هاحل وكلى ثقة وايمان انى ان شاء الله ربنا مش هايضيع تعبى وربنا معانا كلنا

Friday, November 23, 2007

تهييسات امتحانات

ازيكوا يا حلوييييييييين

بجد مهيسة على الاخر شكلي كده هانضم لجبهة التهييس الشعبية
هى مش دي مدونة برضه

بقول لكوا ايه من اولها كده اللى مش فاضى ووراه حاجة ما يقراش مش هايلاقى حاجة مفيدة ده تهييس وانا معترفة مسبقا قصدي مسبقن تاكيدا بس
:)))))))))))))))))

استغفر الله العظيم معلش معلش استحملى كلها يوم الاحد والامتحانات تبتدي
ايوه يا دودو بس انا قرفانة جدا يعني وضاربة معايا
يا ستى معلش كلها يوم الاحد وبعد كده بتدخلى فى مود الامتحانات وبتلاقى الوقت عدى هوا
ايوه ماشي بس انا نفسي اجيب درجات كويسة و كده هبل خااالث يعني ومث هاينفع كته بالمرة

دى انا وانا برضه بنتكلم سوا جايز يعني نوصل لنتيجة

المهم

اقول لكوا بقى انا عاملة ايه فى المذاكرة اطمنكوا عليا و مش عارفه هل فى حد مهتم يعرف اصلا ولا لا
i guess
ان اصحابى هما اللى هايحبوا يعرفوا اصل كل ما اقولهم انى ضاربه يقولوا لى ايييييييييه بقى ....... ضاربة برضه

يللا ما علينا وانتوا عارفين نظام الناس في الامتحانات بقى بيبقوا عاملين ازاي

تحسوا كده كان الحرب ابتدت وكل الناس شاكة فى بعضها وشوية هاتلاقى حد بيصرخ ويقول
جاسووووس امسكوووووووووووووه :))))))))))))
مش فاهمه ليه يعني
على فكرة دى تقدروا تقولوا عليها حاجة منتشرة فى مصر موضوع ان حد يخبى فى المذاكرة على حد ويقول له مش بذاكر وهو ما شاء الله موس مذاكرة زى ما بنسمى الجماعة الشاطرين

مش فاهمه ليه جايز خايفين من الحسد مثلا او متوقعين ان كل الناس كده

عن نفسي في ثانوى ما كانش كل الناس كده بس كل الناس كانوا مقتنعين انى كده :))))))))))) مش عارفه هو انا شكلي مووووووس ولا ايه بس طبعا طبعا يعني لما ظهرت النتيجة وكل الناس عرفوا انى والحمد لله اتنين وتسعين فى الميه واتنين من مية لو سمحتوا مع سبق الاصرار والترصد بطلوا هما بقى حالة الترصد اللى كانوا عايشين فيها معايا

وعرفوا انى خلااااص جبت اخرى وفشلت :))))))))))))))))

واما عن الجامعة بقى ابتدى اقول لكوا انا عاملة ايه
عندى يا سادة يا محترمين خمس مواد

عارفه عارفه زمان فى ناس دلوقتى بتالس عليا بس استنووووووووا استنو بس

هاقولهم بالترتيب والتفصيل الممل
marketing
المادة اللذيذة العثولة الامورة جدا جدا التسويق
دى بقى ام اللك يا سلاااااااااام كلاام كلام كلام كتييييييييييير بس بجد مادة حلوة
دى بقى معايا كتابها
ذاكرت منه اول محاضرة بس وبعد كده قلت كفاية لانى لو ذاكرت منه اكتر من كده جايز بعد الشر يجيلى
stroke
مش بيقولوا عليها سكته دماغية :)))))))))))))))

المهم انى اشتريت ورقها وبما ان معظم طلبة العلم دلوقتى زهقوا من طلب العلم وبقوا بيطلبوا كابتشينو سكر مظبوط زى حالاتى و فى الاخر تطلع كوفى ميكس عايزين يشربوا العلم بالمعلقة اللى هى ملعقة بالعربى

فبطلوا يذاكروا من الكتب وبيشتروا ورق وانا زيهم
سوري يعني
الظاهر كده طلعت إمعة
نو نو نو يا مون شيغي
احنا مش امعة مش تقولى عننا كده
دى دودو معترضة
اخرسي يا بتاعة انتى دلوقتى مش ناقصينك

سيبوكوا منها خليكوا معايا

المهم اطمئنوا عليا جدا دى مادة يوم الاحد وباقى لى فيها شابتر واحد بس

المادة التانية
اللغة ودى بقى اسمها دراسات تجارية بنقول عليها اللغة لانها بالعربى
المفروض ان دى مادة واحدة وكتاب واحد
بس تقدروا تقولوا ان كليتنا طيبة اوى وبتحبنا جدا وحابة تعملنا منتج ماحصلش كل الاعلانات شامبو وبلسم اتنين في واحد احنا كليتنا بقى تلاته فى واحد
تلات مواد فى كتاب واحد
اقتصاد جزئي
و اقتصاد كلى
وتنمية
فى كتاب واحد
لالالالالالالالالا بصوا انا ظلمت الماركتنج الماركتنج مش ام اللك الكتاب ده بقى ابو اللك وخالة اللك وعم اللك وعيلة لك كلها
اه اللك اللى هو الكلام الكتير ولكاكة اللى بتتكلم كتير زى حالاتى :(((((((((((((

المادة دى بقى مافيش معيد عدل عرف ينزلنا فيا ورق محترم يتذاكر منه قمت انا بقى عملت سبع رجالة فى بعض وعنتر ابن شداد وقلت هالخص الكتاب وابذل مجهود هو يعني لازم تاخدى كل حاجة على الجاهز

سيادتى قعدت الخص يوووووووووووووووووم يا ناس يوووووووووووم فى خمسين صفحة
ماحدش هنا معاه مسدس
اااااااااااااااااااااااااااااااااااااااه

ايه ده مين بيصوت ايه يا توتى بتصوتى ليه
دودوووووووو دودو بقول لك انسحبي من هنا بالبرود اللى انتى فيه ده وسيبينى فى حالى
الله طيب خلاص خلاص خلاص
ياختى عالرقة امشي من هنا بقول لك اهو بدل ما نتخانق واحنا فى امتحانات ومش ناقسين
خلاص اوك بس مش ترجعى تعيطي لى تانى

مش عارفه البنت دى ايه اللى بيجيبها هنا ماااااا علينا

المادة دى يا سادة هاذاكرها فى يومها لانه طبعا خلاص مش باقى لها وقت فى جدول اعمالى :)

باقى بقى ايه
المادة التالتة
ال maths
ولا نقول احسن
ال maths destruction
دى يا اخوتى الرياضيات المالية فاينانشيال ماثيماتيكس
نقدر نقول عليها رياضيات الربا الفااااااااااااااااحش
دى بقى بندرس فيها القروض والفوايد
يعني الربا
لا شفتوا بقى الاسلام جميل ازاى الربا حرام لو ماكانش فيه ربا ماكانش هايبقى فيه رياضيات ماليه وماكنش هايبقى فيه مادة تطلع عيني

المادة دى طبعا الدكتور لما بييجي يشرحها كل اللى بسمعه سمك لبن تمر هندى مين راح فين جه منين ولا اعرف

اما بقى لما حد تانى يشرحها لى الاقيني يا سلام شغالة لواحدى واثبت قوانين من غير شرح واحل المسألة من غير مجهود تلاقى اللى بيشرح لى يقول لى اممال عايزانى اشرح لك ايه

الله يرحمك يا مستر ممدوح بجد كان مستر محترم امانة يا جماعة اقروا له الفاتحة هو وكل اموات المسلمين
ده كان مستر الرياضة بتاعى بجد كان شرحه تحفة

مش عارفه المادة دى مع انى متاكده ان مستوايا فيها مش حلو مش قلقانه منها
يمكن لانى حاسه انى ماستر في الرياضة او يمكن لان المستر الله يرحمه كان يقول اللى داخل امتحان رياضة وخايف ما يحلش يبقى مش هايحل والعكس صحيح طبعا

المادة الرابعة بقى قبل ما يغمى عليكوا
ال accounting
محاسبة او محاسبة الشركات علشان ابقى
more specific

دى بقى الدكتور بتاعها مش عارفه بجد مين اللى درس له المحاسبة ومين اللى جنى عليه وقال له يتخصص محاسبة وكمان يبقى دكتور فيها

مش عايزة اظلم الراجل برضه يمكن انا اللى كنت ببقى مهيسة فى المحاضرات بس ما اظنش مااااعلينا انا ما حضرتلوش كتير اصلا كام محاضرة وابتديت اتاوب وشوية وكان هايجي لى اكتئاب وحبة كمان ويغمي عليا فقلت اخدها من قصيرها وابطل احضر

وانا بقى استاذة فى المذاكرة من الكتاب بالذات فى المحاسبة اسال لكوا بقى ايه المعيد احنا هناخد من كتاب ايه قال لك الدكتور صور لكوا شباتر مش عارفه ايه ونزلها لكوا مش عارفه فين وكلام كده قلت له طيب احنا معانا كتاب لارسون هناخد منه المحاسبة ولا هانحتاج كتاب تانى علشان اجيبه
قالى لا مش من لارسون قلت له طيب من كيسو قال لى هو انتى بقى لك كام سنه هنا فى الكلية بالظبط
انا بقى المرة دى كنت هاموت فى ايده
بصوت جهورى كده ولا اراديا لقيتني بقول له
لا اله الا الله
تقولش كنت بطلع فى الروح
انا فى سنة تانية كنت عايزة اقول له فريش مييت والله :))))))))))
fresh meat
يعني مش بايته ولا حمضانه خااااالص
قال لى اممال تعرفى كيسو منين كان الثقافة فى بلدنا وانك تعرف اسم كتاب بقت حاجة عيب لا وايه كمان شامة على جباه المعيدين اللى بيعيدوا السنة مش اللي بيعيدوا الشرح :)

ومن ساعتها وبقى فى حاجة كده بتخنقني منه

المشكلة بقى انى باخد عنده درس وده اللى بجد خنقني منه اكتر ان شرحه فى الدرس غير شرحه فى الجامعة خاااااالص مع ان هنا ساعة وهنا ساعة وعمره ما زود دقيقة مرة بس زود لنا حصة ومن ساعتها ما عادهاش :)
ودى حاجة بتخنقني من اى حد لما احس انه مش امين فى مهنته
غير فى الدرس

بس الراجل برضة معذور هايصرف على البيت منين واصلا ما بقاش فيه فى مصر مرتب من الحكومي يصرف على بيت

اه وحاجة كمان مضايقانى منه
انى عمرى ما قلت له ممكن اسال سؤال الا ويقول لى لا
ما تفتكروش انه بيجاوب بعدها
لا ما بيجاوبش ماجاوبش غير مرة واحدة بس اللى لما قال لى لا قلت له ليه
اه برضه ما تفتكروش ان الكلام ده فى السيكشن لا ده فى الدرس يعني اللى بدفع فلوس فيه اصلا علشان اسال والاقى حد يعبرنى ويرد عليا

يااااااااااااااااااااااااااااااااااه
يا جماعة مين روحه طلعت ومين بيطلع فى الروح ومين نفسه اتقطع
معلش معلش انا عارفه ان السلم طويل
واكاد اجزم ان ماحدش وصل هنا اصلا
يللا معلش اديني قدمت وقلت اللى ماعندوش وقت ما يقراش
عالعموم لسه دور واحد وهانلاقى الرووف واللى زهق منى يرميني من عليه انا ماعنديش اي مانع :))))))))))))

اخر مادة بقى علشان اللى لسه .......... اتاكد انه خلاص اخرج النفس الاخير :)))))))))))))

النقود والبنوك

دى برضه مادة لذيذة الى حد ما
الدكتور بتاعها كنت متعقدة منه السنه اللى فاتت بس السنة دى شرحه حلو ومحتاج تبقى مركز وانت قاعد وانا من النوع اللى ممكن اسافر بلاد الواق الواق وارجع وانا قاعدة وماحدش ياخد باله :))))))
بس بجد شرحه كويس وبكتب وراه حلو كمان ما يغركوش الواق الواق بتظبط فى محاضرته ما تقلقوش
المادة دى برضه لسه لي فيها شابتر هيا خمسة برضه

وعلى راى توم وجيري
that's it folks

وهكذا كانت موادى وترتيبها تبعا لجدول الامتحانات اليهيب قصدي الرهيب الفظيع المريع الشنيع

تقدروا تقولوا انى مطمئنة مبدئيا ماعدا من المادة ام خمسين صفحة فى يوم دى
ادعولى

ومازال عداد الغرامات مستمر
واشوفكوا الحلقة الجاية ماهم توم وجيري بقى

Sunday, November 18, 2007

لا بجد صدفة غرييييييبة


معلش انا عارفه انى مقصرة فى حق كل الناس وماردتش على الكومينتس بتاعت اخر بوست ومش بكتب من زمان

واكيد معظمكوا زهق من مدونتى اصلا وزهقتوا منى وبتقولوا يا رب ...................

:))))))))))))))))))))


مااااااااا علينا


بس بجد سنة تانية مش سهلة ابدا او جايز انا اللى خايبة حبتين :))))))))))))


المهم


ان امتحاناتى ان شاء الله الاسبوع الجاى يوم الاحد

اول ما الظهر ياذن ابتدوا ادعوا لى :))))))))))))))))

والكلام ده يمتد لمدة اسبوع :)))))))))))) حتى يوم الخميس

يا ريت يعني :)


الصدفة بقى طبعا معظمكوا او يمكن يعني شوية من الناس الزوق اللى بيزورونى هنا بيروحوا الاستراحة استراحة الكاشفة واكيد كلكوا قريتوا بوست اللى ربنا يكرموا يااااااااااااااااااااا رب اخونا ابن حجر ويا سلام بقى يا سلام على اللى كتبه بشره الله بالخير


يا سلاااااام ايه ده ومين ذاكر وتعب وسهر الليالي وعيونه اتمأمأت قصدي اتمأأت ولا نجحش ومين عمل ايه وبرضه سقط ويا سلام على لائحة الشرف بتاعة الأخوة الاعداء قصدي الاخوة الناجحين يادي النيلة قصدي اخواننا اللى اخرهم ابو ماده واولهم اللى ربنا معاه ويعدى السنة الجاية

بصراحة كان بوست مشجع جدن جدن كاتباها بالنون تاكيدا


ومين كان مستواه فى الحضيض ولما ذاكر كان بيحسد الحضيض على حاله :))))))))))


المهم ان اختكم فى الله قاعدة بقى تقول ايه ومن سهر الليالي نال العلى ومن نام وارتاح اخره جراح واللى يذاكر يروح البعثات والمنح واللى ما يذاكرش اخره قضايا وجنح


وفجأة اذ بالبشرى السارة بان مهما ذاكرت ان شاء الله مش هاتفلح وسلم لى عاللغة العربية

ومااا علينا

وبما ان انا ولله الحمد بحس ان كل حاجة بتحصل حتى لو انى لقيت ورقة مكتوب فيها كلمتين وقريتها بحس ان دى اكيد ليها سبب وان كل حاجة قدر وما ينفعش اى حاجة تحصل من غير سبب لقيتني بقول يا ترى انا قريت البوست ده لييييييييييه يا ترى اشمعنا فتحت المدونة دى النهاردة يا دى النيلة هو كان لازم يعني اااااااااااخ يعني لازم قبل الامتحان


وشوشو بقى وانتوا عارفينه( ده دلع الشيطان)شوشو تؤ شوشو يا راااجل


ومن يومها ويا سلام حاجة اخر لذاذة ما قعدتش عالجهاز من اساسه ههههههههههههههههه


وقلت ادخل النهاردة اقول لكوا انى مش هاعرف اكون معاكوا لحد ما اخلص امتحانات


تنويه هام جدن جدن جدن


كل الكلام اللى فات ده مش مقصود بيه اي اسائة ولا للبوست ولا للمدونة ولا للكاتب ولا لاصحاب المدونة ولا اعتراض على الموضوع ولا على ميعاد نشرة ولا حتى على ولا جملة فيه ده كله كان مجرد تهييس وفضفضة من الأمة الفقيرة لله مع اخواتها المدونين المحترمين والمحترمات وفقط لا غير


وكفاية كلام قوموا ناموا بقى ولا شوفوا وراكوا ايه

انتوا مطولين هنا ولا حاجة

يللا من هنا هانرش ميه كل واحد يلعب قدام مدونته عندنا امتحانات وبنذاكر


ان شاء الله اشوفكوا البوست الجاى وبجد هاتوحشونى

واللى مش هايدعي لي هادفعوا غرامه وبجد المرة دى هه بس

Wednesday, November 7, 2007

رسالة من معذبة


تسير في الطريق ترتدي ملابسها في بداية الأمر كانت تستحي منها فقد تعود جسدها على أن يلفه الغموض وان يكون مستورا عن عيون المحيطين بها تعودت عل الملابس المتسعة وعلى الحركة دون أن يكون كل من حولها رائين لحركة جسدها عند حركتها أو انثنائها أو وقوفها أو جلوسها

كانت في بداية الأمر تستحي وتلك كانت أمارة جيدة فهي تدل على أن مازال في قلبها حياءا من الله

بعد ذلك تعلمت كيف تسكت صوت روحها وكيف تخمد قلبها وكيف تعوده على أن يتحمل الم المعصية وعلى أن ينام مغمض العين في نار البعد عن الله

وهكذا مرت بها الأيام والأسابيع والشهور

تبكي وحقا ولا تعجبون تبكى لبعدها عن الله تخاف مما قد تؤول إليه تقول يا ترى هل تلك سوء الخاتمة ؟يا ترى هل سبق على الكتاب فها أنا اعمل بعمل أهل النار ؟يا ترى اقبض على ما أنا عليه فأكون من أهل جهنم ؟

وتبكى

كانت تقوم الليل وتقرأ القران وتواظب على الصلاة والنوافل حتى أنها في يوم من الأيام عرفت معنى حب الله والشوق إلى معيته وخشيته حق خشيته ورهبته وخافت يوم لقاءه

كيف آلت إلى ما هي عليه ؟ هي لا تعرف

الإيمان واقر في القلب اجل ولكنه يزيد وينقص بالمعصية كانت تلك السنة ولو كان معها كتاب عملها لتحسبه لتكون أكثر السنين في المعاصي على الإطلاق بعد أن مرت أعوامها التي يكون مرفوع فيها عنها القلم ,اجل كان فيها كثيرا من الطاعات ولكن ارتكبت فيها من الذنوب ما تندم عليه حق الندم

تتحدث إلى نفسها وتقول والله يهدي من يشاء لو أنك أردتي الهداية حقا لاهتديت اجل أنت لم تريدي الهداية تعلق قلبك بالدنيا فدنوتى

تقول أيضا أنها تؤمن بان كل شيء قدر وانه ربما تكون ما هي فيه الآن مرحلة في حياتها أراد الله سبحانه وتعالى أن يعلمها بها أشياء كأن تعرف أنها لا يمكن أن تحكم على إنسان من مظهره فربما يكون مظهر الإنسان خادعا وربما يكون هناك إنسان تحتقرينه في قرارة نفسك لظنك به انه بعيدا عن الله وهو في قلبه شوق إلى معية الله و إلى أن يزيد إيمانه اكبر مما في قلبك وان هذا الإنسان ربما يكون يتأوه بالليل شوقا إلى الخشوع في الصلاة بينما أنت تتكبرين بطاعتك

ربما كان ما هي فيه رسالة لها أن تتعلم أن الحياة الدنيا ما هي إلا الم فقط حزن وألم لا يعرف الإنسان طعم الراحة إلا عندما يعرف طريقه في الحياة ومواضع خطاه إلى أين يذهب ؟ولما أتى ؟وماذا عليه أن يفعل ؟

بعد كل هذا الوقت عرفت أشياء كثيرة وظنت أشياء كثيرة

في بعض الأحيان تظن أنها ربما تكون تعاقب نفسها على المعصية بحرمانها من القرب من الله وحرمانها من كثير من النعم كذكر الله والرضا بالقضاء والقدر بحرمانها من الطاعة
تعاقب نفسها بالمعصية مع أنها تكرهها وتكره أن تأتيها ولا تعرف لماذا تسمع تلك الأغاني أو لماذا ترتدي تلك الملابس أو لماذا تضع الماكياج أو لماذا تفعل أي من ذلك فقط تفعله وعجبا من أمرها حقا عجبا تفعل أمرا تكرهه وتمقته ولا تستمتع به و لا تعرف لماذا تفعله فقط تفعله وكأنها تعاقب نفسها بما تكره

إذا رضيت عن لباسها صاحبتها التي لا تدين بدينها قالت في نفسها حسنا الآن اعلم أن في رضاك غضب الله إذن فالله ليس راض عنى وتدعو الله في نفسها حقا "يا رب اهديني يا رب وأنا متنازلة عن الدنيا واللي فيها " ثم تراجع كل ما تحب في الدنيا كل ما تحب بلا استثناء حتى لربما يكون ما تبكي لو غاب عن دنياها ثم ترضى بالهداية وتقول "بجد" وكأنها تؤكد على تنازلها عن ملذات الدنيا في سبيل الهداية ثم تستحضر في نفسها كرم الله وانظروا طمع ابن ادم وتقول لعل الله يهديني ويعطيني بعض ما أحب مما لا تتصور حياتها بدونه

الآن وبعد أن تقلبت على جمار منخفضات منحناها الإيماني فكرت وتحدثت مع نفسها وقالت

ورثنا الإسلام، حسنا ومن لم يتعب في شيء أضاعه إذن

أتعلم

أتعرف على ربى من يكون الم يسأل كل من لم يسلم قبل اسلامه من تعبدون نعبد الله حسنا ولكن على ان اتعرف على ربى حتى اعبده حق عبادته وأتعرف على رسولي من يكون وأتعرف على رسالة ربى لي وما تكون وأتعرف على ديني وما يكون وأتعرف على نفسي بعدها

فمن يا ترى تكون ؟

Friday, November 2, 2007

البقاء لله

توفيت اختنا بهلولة

الاستاذ بهلول بيقول انه نشر البوست بعد وفاتها بتلات ايام وانا قريت البوست بعد نشره بتلات ايام يعني هيا توفيت من ست ايام

انا مش لاقيه كلام يوصف احساسي ولا عارفه اقول ايه ولا اعمل ايه

انا كنت بحبها اوى

ادعوا لها بالرحمة