حتى إشعار آخر

متوقفة عن التدوين

...........................................................................................

ميرسي بجد على سؤالكوا وفعلا اهتمامكوا اثر فيا جدا جزاكم الله خيرا
اما عن المانع فهو اسباب مش عارفه هل هى اسباب كافية ولا لا

انا ماكنتش ناوية ابطل تدوين للابد بس على الاقل لفترة

علشان تعرفوا بطلت ادون ليه لازم تعرفوا انا ليه عملت المدونة دى من الاول وانا عملتها لانى حسيت انى عليا واجب اءديه وكانت الطريقة الوحيدة اللى قدامى هيا التدوين وانى اخرج افكارى واعمل حاجة ولو كلامى ما فرقش مع حد اكيد هايفرق معايا انا عالاقل يعني هايكون ليه نتيجة واثر حتى لو كان بسيط

الافكار ما خلصتش

بس بقيت مش عارفه هل انا بادى واجبى ده كويس ولا لا هل بفيد حد بأفكارى دى واحاسيسي دى ولا لا ولا بس بضيع وقت الناس هل بقدمها بالطريقة المناسبه ولا اسلوبي الطويل اللى معظم الناس اتكلموا فيه ده ممل وبيخلي القاريء ما يكملش الموضوع للآخر هل بوصل أفكارى بطريقة مناسبة ولا البوست يخلص قراية من هنا وتلاقوا كل واحد خارج بفكرة عن الموضوع غير التانى وغير قصدي اصلا ولا انا بقدر اوصل افكارى صح وبقدر اعبر صح

انا عارفه انى مش أديبه يعني ولا كاتبه متخصصه والتدوين فى الاصل هواية بس بيتحول لمسؤولية بالذات وهو من الاول اصلا بالنسبة لى كان مسؤولية

كمان عوامل كتير منها ان التدوين بالنسبه لى اختلف جايز لان نظرتى للحياة كلها اصلا حاليا اختلفت

قلت قبل كده ان المدونة بتحكى حكاية انسان ومازلت عند راى ان لو حد مسك مدونة واحد وقراها من اول بوست لاخر بوست مرة واحدة هايبقى عارف ادق تفاصيل شخصية وخبرة الانسان ده وبالذات ان معظم المدونات حاليا بقى لها اكتر من سنه وانا قصدي على المدونات اللى انا اعرفها ومتابعاها ماعرفش الجديد ايه

يعني التدوين عصارة خبرة انسان وانا التدوين بجد كان اثر في حياتى لدرجة رهيبة انا كنت بقيت حد انا بعتز بوجوده فى يوم من الايام بس للاسف قابلت فى الدنيا اللى كسر فيا حاجات كتير حلوة و بقيت حاسه انى لازم اخد فترة اجازة من كل حاجة علشان ارمم الكسور دي وعلشان اشوف الحياة دى هاتمشي ازاى

كان جالى فى تاج قبل كده سؤال بيقول هل فكرت فى التوقف عن التدوين ولماذا وانا كنت قلت لا ومش هافكر ومازلت انا مش هابطل تدوين بس دي اجازة مدتها اد ايه مش عارفه بس مش كل الناس زي بعض فى ناس بتقدر تشيل ما ينوء عن حمله الجبال وفى ناس ببساطة ما بتقدرش تشيل للاخر بييجي عليهم وقت وبجد مش عايزة اقول بيقعوا بس بيتعبوا وبيبقوا عايزين يرتاحوا

البوست ده معظمه شخصي بس ده لان التدوين بالنسبة لى اصلا حاجة شخصية جدا كل مدون وكل مدونة بالاسم بالنسبه لى واقع انا لما بتكلم عنهم بتكلم باسمائهم التدوينيه كانهم اشخاص كانوا قاعدين معايا كل واحد/ة فيكوا ليه معايا ذكرى من بوست او جملة او تعليق او فكرة او حوار او نصيحة او اهتمام او صداقه او حب او اخوة فى الله بجد كل واحد/ة فيكوا بالنسبة لى مش مجرد صفحة على النت بدخل اقرا كلامهم واسيب تعليق دليل على انى عديت وامشي انا كنت متابعه مدونات كتير بس كنت دايما اقول بلاش تعلقى غير لما يبقى عندك وقت تعلقى صح وفى الاخر بقيت مش بعلق خالص

ناس كتير لما قروا مدونتى قالوا لى ان اكتر حاجة عجبتهم فيها انى بتكلم من قلبى اوى بصراحة انا مش عارفه ده عيب ولا ميزة فى زماننا ده بس انا مش عارفه اعمل غير كده

انا محتاجة اجازة من التدوين علشان التدوين بالنسبة لى حاجة شخصية بتخرج من قلبى ولما يبقى قلبى مجروح من الدنيا ماظنش انى هاقدر اخليه يقول حاجة مفيدة ولو قال كفاية عليكوا نكد معايا بقى خلينا حلوين كده مع بعض لحد ما ربنا يسهلها ونعرف نقول عصارة الخبرات دى بطريقة مفيدة من غير غلاسة ولا تقل دم ولا عياط ولا انهيارات ولا زلازل ولا اعاصير ولا ..........ايه نشرة الاخبار اللى انا عملتهالكوا دى :)))

بالذمة والنبى مش الجملة دى كانت اريح ليكوا
متوقفه عن التدوين حتى اشعار اخر

(بالذمة والنبى مش حلف بغير الله دى كلمتين معروفين عند المصريين يا جماعة بيتقالوا معظم الوقت فى الهزار )

عارفه ان افكارى جايز تكون غير مرتبه بس حاولوا تفكوا الطلاسم بقى على اد ما تقدروا وربنا يعينكوا على المتاهة دى