أول تاج

ده أول تاج يجي لي عالمدونة وهو جالى من مدونة العائشة فى الأحلام من رفقه عمر بصراحة يا رفقه أسئلة التاجين دول غريبه جدا بس ربنا يسهل وأعرف أجاوب جايز اجاباتى تكون طويلة فاللي هايزهأ ياخد الحكاية من قصيرها وما يقراش هههههههه

انت مين

انا بصراحة مش عارفه الاجابة تكون بالاسم ولا بالشخصية بس عالعموم انا هجاوب بالشخصية
انا بكل بساطة واحدة من الناس الكتير اللى بيمشوا جنبكوا فى الشارع مشغولة بحاجات كتير اوى زيكوا بالظبط مشغولة بنفسي ومشاكلى وحياتى بما فيها مشاكل بسيطة جدا زى القدس والعراق وكده يعنى مع شوية حاجات كده زى الدراسة والمستقبل يعنى خليط من كل حاجة والانسان عبارة عن مجموعة خبرات من مجموعة مشاكل

مين اكتر ست اشخاص بتحبهم

ياااااه ست اشخاص بس عالعموم هما عيلتي دول احب ناس ليا وكمان اصحابى بس انا عيلتي اكتر من سته ماشاء الله

لو اجتمعت انا وحسني مبارك فى غرفه واحدة

ما اظنش ان دى حاجة قابله للحدوث مع انى فكرت فيها وبصراحة كان نفسي اوي اقول له انه يتق الله ويعرف انه هايتسال عن كل حرامى سرق من الجوع وكل واحد ظلم علشان مالقاش رادع وكل واحد بيتقتل فى اى دولة مسلمة كان فى ايده يساعده وما ساعدوش كان نفسي اوي اقول له انا بجد خايفه عليك لان انت مش واخد بالك من اللى جاى مش واخد بالك انت هاتقف قدام مين ويسالك انت عملت ايه لرعيتك وكل راع لابد مسؤول

لو معاك مليون ونص جنيه تعمل بيهم ايه

اهو السؤال ده بقى هو كمان فكرت فيه من زمان وكنت دايما افكر هاعمل ايه عالعموم الطبيعى انك هاتساعد كل الناس اللي حواليك على اد ما تقدر وعالعموم مليون ونص فى زمانا ده بقوا قليلين هههههه

بتحب مصر؟

اوى اوى بس ليه مش علشان هيا بلدى اللى اتولدت فيها لانى ما اتولدتش فيها اصلا انا بحب مصر اوى لان رسول الله صلى الله عليه وسلم قال ان فيها خير اجناد الارض فانا فرحانه اوى بالحكاية دى ومبسوطة علشان انا ان شاء الله هابقى ام خير اجناد الارض وعلشان كده مش ناوية اتجوز ان شاء الله غير مصري ابن مصري

بتحب البنات؟
اه انا بحب البنات ومستمتعه جدا بكونى بنت بس بصراحه انا عايزة اخلف اولاد وبنت واحده بس هههههههههه

انت مسلم؟
الحمد لله انا مسلمه بس ما اعرفش هل استحق الاسم ده ولا لا

ليه؟
انا زى بقيت الناس مسلمة بالوراثة بس من صغرى حابه اوى كون ان دايما ليا حد الجأ له وقت ما احتاجه وعمره ما هايزهق منى وعمره ما هايتخلى عنى مهما عملت حد واحد بس هو اللى يعرف اسرارى وذنوبى وبيغفرهالى وبيسامحنى عليها وقت ما اطلب السماح احساس حلو اوى ان يكون ليك رب واحد بس هو اللى بتسجد له وهو اللى بتعبده وهو الوحيد اللى بتتذل ليه وبتبقى سعيد لان قمة العزة فى ذلك ليه هو بس لما بتدعى ما بتدعيش غيره ولما بتتقرب له مش محتاج واسطه ولما تعوز تقابله مع انه ملك الملوك بس هو اسهل حد ممكن تقابله تتوضا وتصلى وبصراحة ربنا هو الوحيد اللى ما اتخلاش عنى ولا مرة احتجت له
الحمد لله
والله الاسلام ده نعمة

التاج التانى

شخصية ماتقدرش تستغنى عنها فى حياتك؟
ا نى ما اقدرش استغنى عن حد لانى محتاجه له دى مش موجودة بالمرة لكن انى استغنى عن حد انه يغيب من حياتى فى برضه هاقول عيلتى

دى إجابتى بس أنا حبيت أغيرها لأن فعلا فى ناس لما بتغيب من حياتنا غير اهلنا طبعا وبالذات الأصدقاء بجد بنتالم أوى لدرجة انك بتحتفظ بيهم جواك علشان مش يغيبوا عنك وبجد الفراق وحش أوى بس خلى دايما عندك أمل إن ربنا هايجمعك باللى فارقتهم يوم من الأيام وانتظر عسي يكون لك أجر عظيم واصبر والحمد لله على كل حال

وليه؟
لانى فعلا بحبهم اوى وهما الوحيدين اللى هايخافوا عليا زي ما بخاف على نفسي واكتر وهما دول اللى وقت ما احتاج لحد وأاتمنه على نفسي مش هايكون حد غيرهم

إيه أكتر موقف محرج اتعرضت له ؟
بالنسبه لشخصية عفوية زيي فمواقفى المحرجة كتير بس هل فيها اللى ساب فيا الأثر انى ما انساهوش لا مافيهاش

واتصرفت ازاى ؟
انا لما بتحرج بكتفى بانى ابتسم ابتسامة كده ما بتكملش يعنى بتتقطع فى النص ههههههههه ماهو احراج يعنى هاتعمل ايه بس بحاول انى اكون عادى واتجاهل اللى حصل تماما علشان توترى ما يزيدش

ايه الأمنية اللى بتدعى دايما ربنا انه يحققها لك ؟
هو انا عندى امنية انى لما اتجوز اخلف اربع اولاد واربيهم على الاسلام والتقوى واعلمهم الدين واتبع منهج عمر بن الخطاب علموا اولادكم السباحة والرماية وركوب الخيل وكل ما يوازيها طبعا من الرياضات الحديثة وازرع جواهم حب الشهادة علشان لو هما ما استشهدوش اولادهم يستشهدوا ودعائي دايما وياريت تقولوا امين اللهم اجعلنى ام الشهداء اللهم امين

اتحققت ولا لسه ؟
لسه ومش عارفه هل انا اهل اصلا انها تتحقق او لا


انا بمرر التاج لاوشن ايز وام القاسم والبوسطجى و
make awish
و كل المضافين عندى