تاج 2

بسم الله الرحمن الرحيم



ده تاج جه لى من استاذى عصفور المدينة هو بقى له فترة بس ما عرفتش انزله
وفيه بعض اسئلة مضافة من تاج عند لحظات حياتى لشاب نفسه يحقق حلمه

اسم مدونتك ؟

فتاة الجنة
(بتاء التأنيث اصلى بلاحظ ان ناس كتير بتعملها بالهاء )

لماذا اخترته وماهى نيتك من وراء اختياره ؟

كان عمرو خالد دايما يقول حط هدفك فى مكان واضح قدام عينيك طول الوقت علشان ماتنساهوش

وبما ان انا عندى زهايمر :) وامنيتي الجنة فخليت اسم مدونتى فتاة الجنة يعني طالبة الجنة بحيث انى كل ما افتح المدونة افتكر وكمان علشان احترم نفسي واعمل حاجة لآخرتى :) وهو ده سبب الاختيار والهدف

هل فكرت فى إغلاق مدونتك؟ والسبب؟

بصراحة مش فاكرة بس بيتهيألى لا ما فكرتش فى انى اقفلها قبل كده وما اظنش ان ممكن يكون فى سبب كافى يخلينى اقفلها

وكمان لانى احسب ان المدونة دى جزء من ثقافة جيل لما انا اقفل مدونتى وغيري يعمل زيي يبقى كده جزء كبير من ثقافة جيل كامل اختفى

وبعدين جايز ربنا القى على لسانى كلام لحد مش لازم يقراه دلوقتى ممكن بعد عشر سنين زي حلقة عمرو خالد اللى انا شفتها بعدها بست سنين

صورتك فى المدونة ورمزيتها؟

الصورة دى انا اللى مصوراها المفروض انها وقت الغروب بس سبحان الله لما ببص لها بحس انها شروق مش غروب

رمزيتها
مش كل حاجة بنشوفها بتكون اللى قدامنا زى اللؤلؤة جوه محارتها المحارة مش جميلة بس يا سلام على جمال اللؤلؤة

وانا كده ماحدش بيشوف جوايا مع انى عفوية جدا ومفيش في حياتى اسرار بس مع كده ومع ان كل الناس بيتهيالهم انهم حافظيني الا انى اشك ان فى حد يعرف ...... فتاة الجنة الحقيقية :) النقط دى اسمي

القديمة كانت وردة وسبحان الله كنت محتارة اشيلها ولا ما اشيلهاش بس ربنا قدر لها واتشالت لوحدها ما بقتش بتظهر فغيرتها بالصورة دى انا لسه واخداها قريب


لماذا دخلت عالم التدوين من الأساس؟

انا ولا كنت اعرف يعني ايه تدوين ولا يعني ايه مدونات لحد ما صدفة وجزاه الله خيرا اللى كان السبب انى عرفت مدونة نبيل كريم وقريت عنده شوية بوستات او بوستس علشان المراجعين :)

المهم كانت ليلة ما يعلم بيها الا ربنا وصدفة برضه عرفت انه ممكن يبقى لى مدونة

وكان التدوين بالنسبة لى دعوة للتغيير لنفسي اولا لان ماكانش فى حد يعرف مدونتى اصلا وثانيا كان تدوين لافكارى


جملة قيلت لك فى وصف مدونتك ؟

لو جملة مميزة فى وصف مدونتى فكل الناس بتقول حلوة او هادية او العادى اللى هو في الغالب بيكون مجاملة :)

بس في الحقيقة اللى اتقال فى مدونتى كان فى كومينت على بوست ربنا علمنى ايه النهاردة وكان من اختى رفقه عمر قالت لى عارفه انا قدرى امر على مدونتك النهاردة
بجد التعليق ده بجد اسعدنى جدا لانى اصلا لما دونت كانت امنيتى ان ربنا يقدر لى انى اكون اشارة لحد ولما رفقه قالت لى كده كانت بتحقق لى امنية كبيره من غير ما تاخد بالها


التعليقات بالنسبة لك واهميتها؟

فى ناس بفرح بتعليقاتهم لانى بحبهم ولانها مهمه

وفى ناس بفرح بتعليقاتهم لانى بحس انهم مهتمين وبيضيفوا جديد لما بيفتحوا نقاش

وفى ناس بفرح بتعليقاتهم لانهم اول مرة يعلقوا

التعليقات بالنسبة لى دايما مهمة وعلى طول مصدر للتعجب

دايما بقول هما بيعرفوا مدونتى منين :))))))
بالمناسبة بقى كل واحد يقول عرفها منين :)


التعليقات مهمة لانها بتبين الاحساس اللى قدرت انقله وفى تعليقات بتكون من ناس فهموا غلط بحاول اوصلهم الصح وقصدي الحقيقي

وفى تعليقات غرضها فقط الاستفزاز ولا غير ودى بتكون زى طرائف كده بالنسبه لى


أحلى بوست كتبته ضع اللينك ثم اذكر لماذا ؟

حقيقة هما اتنين
اول واحد
آدم
اللينك
http://ftataljanna.blogspot.com/2006/12/blog-post.html

تانى واحد
كل منا أمة
اللينك
http://ftataljanna.blogspot.com/2006/12/blog-post_04.html

دول بحس انهم احسن حاجة كتبتها لانهم بسيطين اوى وخرجوامن قلبى واياميها جايز ابقى كنت قريبه من ربنا كتييييييييير عن دلوقتى

اما بقى اللى قيل لى انه احسن واحد كتبته فهو
ربنا علمنى ايه النهاردة
اللينك
http://ftataljanna.blogspot.com/2007/05/blog-post_23.html


أفضل بوست قرأته وضع لينكه ؟

بصراحة مش عارفه
بس كل حد مضاف عندى فى مدونات صديقة ساهم فى بناء البنت اللى موجودة دلوقتى بجد كل كلمة قريتها كل تعليق قريته ساعد فى انى اتغير بجد هما دول الصحبه الصالحة اللى ربنا من عليا بيها الحمد لله



أفضل مدونة قرأتها ؟

كلهم ما شاء الله ربنا يبارك فيهم ونفس الرد عالسؤال اللى فات



حد قل أدبه فى التعليق ايه رد فعلك؟

قل ادبه ازاى يعني مش عارفه
بس عادى اللى داخل وقصده الاستفزاز فقط لا غير فده قصده بيكون واضح اما اللى داخل وقصده المنفعه فجزاه الله عنى خيرا

اما عن رد فعلى فبرد عادى جدا بكل هدوء ومافييييييييش مشكلة وبالذات انى ببقى عايزة اشوف اللى رد مش الرد يعني الشخصية اصل انا يا جماعة عايزة اشوف هل الناس بتتغير ولا يعني عايزة اتعرف على انواع الناس ومعادنهم


أسوأ مدونة ؟

مش عارفه بس كل مدونة بتجرأ الناس على المعصية



أسوأمدون وأسوأ بوست ؟

انتوا عارفين من غير ما اقول


هايحصل ايه لايميلك لما تموت ؟
طيب ده سؤال وانا هابقى فاضيه له ولا فاضيه للسؤال وحساب القبر وجنة ولا نار


اديت الباسورد لحد قبل كده ؟
ايوه



كانت ايه طبيعة علاقتك بيه؟
كانت صديقتى المقربة كانت زى اختى


اسمك؟
فتاة الجنة
طبعا هاتقولوا البنت دى بتستهبل ما احنا ماكناش هانسال الا لو عايزين الحقيقة هاقولكوا حاجة انا مش عايزة اقول الحقيقي لانى لما بشوف رد عليا ومكتوب فيه منكم يا فتاة الجنة ببقى سعيداااااااااااه اوىىىىىىىىىىى علشان كده عايزة فتاة الجنة هو اللى يفضل موجود ولو لازم الحقيقي قولوا لى وانا هافكر بجدية فى انى اقوله



المشهور بيه وسط اصحابك؟
كل حد فيهم بيناديني باللى عايزه اصل اسمي ليه خمسين دلع


شخصيتك نوعها ايه ؟
شخصية عميقة لا تسبر أغوارها ابدا على فكرة


السفر بالنسبة لك؟
انا مش بسافر كتير وعمرى ماركبت طيارة الا وانا عندى تلات شهور
الاماكن اللى زرتها خارج مدينتى يتعدوا على اصابع الايد


وقت فراغك بتعمل فيه ايه ؟
مش حاجات كتير
النت التدوين بمعنى اصح
التليفزيون بعد ما عرفت التدوين ما بقيتش عارفه فيه ايه
الرياضة
القراية


المود بتاعك ؟
مش عارفه


الأكلة المفضلة ؟
انا بحب انواع كتير من الاكل المهم انه يكون فى البيت مش بحب اكل بره


الصفات اللى اخدتها من بابا؟
الذكاء
قوة الشخصية
الجرأة
العطاء
العند

الصفات اللى اخدتها من ماما؟
الصبر وقوة التحمل
التواضع
خفة الدم
طول البال


اكتر ست حاجات بكرهها؟
النفاق
(الكذب - اخلاف الوعد - خيانة الامانة )

الرياء
المواعيد المش مظبوطة

الظلم
ان حد يحسبنى على شيء انا مش عليه

الاستفزاز فى الحوار وانك ما تسمعش غير نفسك فى اى مناقشه بينك وبين حد


اكتر ست حاجات بحبها ؟
اشياء يعني

بحب مكة والمدينة والمسجد الاقصي ونفسي اروحهم
بحب قلمى الرصاص :)
بحب شارع البحر او بمعنى اصح المشاية السفلية وبحب المشي جدا

الشغل بالنسبة لك؟
لو الحاجة اللى بحبها يبقى قمة المتعة
ولو مضطرة يبقى اكل العيش
ولو لا كده ولا كده يبقى قلة زوق وتربية العيال افيد :)


الانترنت بالنسبة لك ؟
كنت هاكتب كلام كتير فى الاخر لقيته زى الدنيا فيه كل حاجة
واللى عايز الحلو بيلاقى واللى عايز الوحش بيلاقى

وزى ما بيفصل زى ما بنموت الاتنين ممكن يحصلوا فى اى لحظة


ده التاج الاولانى من عند استاذ عصفور
بقية الاسئلة من شاب نفسه يحقق حلمه


عمرك؟
18 عاما

برجك؟
الأسد

دراستك ؟
كلية تجارة شعبة اللغة الانجليزية
تجارة انجليش :) علشان المراجعين برضه


انت سعيد؟
الحمد لله
اول حاجة خلق الانسان فى كبد
تانى حاجة ابن ادم مش بيحس بالراحة الا عند وضع اولى قدميه فى الجنة
فالسعادة فى الدنيا سعادة الرضا بالقضاء والقدر

وبقية الأسئلة فى أول تاج عندى يا شاب نفسه يحقق حلمه