ليه يا رب ؟

السؤال ده فى ناس بتسأله لما يحصل لهم حاجة وحشة او تحصل لهم مصيبه او حتى لو حصلت لهم حاجة هما مش فاهمين هيا حصلت ليه ولا مستوعبين ليه فبيقولوا ليه يا رب ؟

خليني ابتدى كلامى من اول ما كنت بذاكر وكالعادة مشغلة التليفزيون وبعدين لقيت برنامج بيتكلم عن السماء وعن اثبات اينشتاين بدون قصد طبعا للآية الكريمة

بسم الله الرحمن الرحيم
والسماء بنيناها بأيد وإنا لموسعون
صدق الله العظيم

سورة الذاريات الاية 47

فى اليوم ده عرفت ان اينشتاين اكتشف ان فعلا الكون بيتمدد بمعدل معين ثابت لو ان المعدل ده زاد او قل بمقدار من مليار المليار مثلا يعني اللى هو حاجة لا تذكر بالنسبة لنا اصلا الكون هاينفجر

طيب اينشتاين ممكن يكون قعد نص عمره لو ماكانش عمره كله علشان يكتشف الحكاية دي

خلينا احنا بقى نقيس ولله المثل الاعلى هاقول لكوا على طريقة كده انا بفكر بيها لما اجى افكر فى قدرة ربنا

اقول انه مثلا الطفل بيتعلم جدول الضرب يقول الاتنين فى اتنين باربعة والاتنين فى تلاته بسته طيب لو جبت تاجر حياته كلها فى عد الفلوس وحسابها هاتلاقيه ماشاء الله بيحسب فى لمحة طيب لما ربنا بقى وهو العليم يحسب مش هاياخد وقت اصلا لان ربنا هو العليم وهو القدير وهو ذو القوة المتين يعنى ربنا سبحانه وتعالى علشان كده بقى امره بين الكاف والنون كن فيكون لان اللى بياخد مننا احنا وقت طبعا يعني سبحان الله امر ربنا بين الكاف والنون

طيب كده احنا جبنا ايه ترتيب ربنا فى خلقه يعني لما ربنا يبقى جل شأنه حاسب معدل تمدد الكون بالدقة دى تفتكروا مش هايبقى يعني حاسب معدل تمدد حياتك مثلا يعني بالعقل مش ربنا هيبقى هو اختار كل حدث انه يحصل فى الوقت ده لسبب معين

احنا مش لازم نعرف حكمة ربنا من الاشياء والا الايمان يبقى مالوش لازمه ماهو ليه ربنا سبحانه وتعالى بيرسل الرسل وسبحانه وتعالى يعني
استغفر الله العظيم يعني
فى قوم من اقوام بنوا اسرائيل قالوا انهم مش هايؤمنوا حتى يروا الله جهرة

طيب ليه الحكاية ما بقيتش كده اننا نشوف ربنا وخلاص لان هو ده الايمان لاننا لو شفنا ربنا مش هانقدر نعمل حاجة غير اننا نطيعه لاننا وقتها هانبقى عرفنا يعني ايه ذا الجلال والاكرام

فكمان ما ينفعش نشوف حكمة ربنا لاننا لو شفناها وقتها الايمان هايبقى لصيق بيها لكن الايمان بيبقى بالغيب ماهو ما تمسكش كوباية مياه وتقول لى انا مؤمن انى ماسك كوباية مياه يا حلاوتك طيب ما انت ماسكها نحاسبك امتى بقى لما تقول انا مؤمن ان اخويا ده مش كداب وهو قال لى انه داخل يشرب يبقى انا مؤمن انه دلوقتى بيشرب هنا نقول بقى انك مؤمن

يعني ما ينفعش تيجي تقول لى انا والله العظيم مؤمن واول ما تحصل لك حاجة يا فرحتى تقعد تعيط وتقول ليه يا رب حصل كده ليه يارب عملت كده هو انا ذنبى ايه فى كده

ما ينفعش

فى موقف اخويا حكاه لى ومش قادرة انساه
وهو ماشى في الشارع والدنيا بتشتي وطين بقى وكده ولقى واحدة ست بتبيع خضار وهى ماشية اتزحلقت وقعت فالخضار اللى هيا شايلاه كله وقع
الست قعدت تلم فى الخضار وتقول انت بتعمل كده ليه يا رب
استغفر الله العظيم يعني قالت
هو انت كافر يارب

طيب واحدة ست زي دي يتقال لها ايه لا حول ولا قوة الا بالله

وبما ان الشيء بالشيء يذكر
اقول بقى دعاء تفريج الهم

اللهم انى امتك ابنة عبدك وابنة امتك ناصيتى بيدك ماض في حكمك عدل في قضاؤك اللهم انى اسالك بكل اسم هو لك انزلته فى كتابك او علمته احد من خلقك او استاثرت به فى علم الغيب عندك ان تجعل القران ربيع قلبى ونور صدري وجلاء حزنى وذهاب همى

الدعاء ده دايما بتعجب منه يعني تفريج الهم اصلا بيكون بالرضا باللى ربنا قسمه لينا يعني ناصيتى بيدك يعنى مكان ماهتاخدنى اكيد هاروح ماض في حكمك يعني يارب حكمك فيا نافذ مفيش حاجة هاتمنعه عدل فى قضاؤك يعني واللى حكمت عليا بيه عدل وبعد الرضا بيجي التعلق بالله ومناجاته والطلب منه والتذلل اليه وبعد الدعاء والطلب بتيجي العبادة بانك تقول له ويارب اشرح صدري بالقران

اد ايه دعاء عجيب سبحان الله

وربنا يفرج هموم المسلمين ويرزقهم الايمان والاخلاص ويهديهم يارب اللهم امين اجمعين