عواقب ليه يا رب ؟

طبعا انا لو لاحظتوا يعنى:)

ماكنتش موجوده بقى لى فترة من بعد بوست ليه كده يارب ؟

طبعا لما نزلت البوست ماكنتش عارفه انى بطلب البلاء من ربنا :)

هاتستغربوا عارفه بس هاتفهموا لما تعرفوا

بعد البوست بيومين موبايلى اتسرق كان غالى عليا اوى مش لانه موبايل ولا لانه حلو بس لانه موبايلى معايا بقى له سنين من اول ما نوكيا 6630 نزل كان معايا

كان معايا في ثانوية عامة و مشاكلها وامتحاناتها ودروسها وصداقاتها والجامعة وكل اللى حصل فيها وكل موقف عدى عليا وهو معايا والرسايل والارقام وناس ارقامهم عليه مش ممكن اعرف اجيبها تانى يعني بجد كان غالى عليا اوى لدرجة انى ماكنتش راضية اغير فيه اى حاجة حتى الكافار بتاعه كان مجروح كده علامة مميزة ومش ناسية الموقف ده اللى اتجرح فيه ماكنتش راضية اغيره وكنت ببقى متضايقه كل ما افكر انه هاييجي يوم واضطر اغيره

بعد سرقة الموبايل

حياتي توقفت

هاتستغربوا تانى بس بجد توقفت مافيش حاجة بتتم ولا حاجة مفيش تقدم فى الدراسة حاجة وحشه جدا كل حاجة بلا استثناء وقفت

وكانت الطامة الكبرى

خسرت اعز اصدقائي للاسف

بجد كانت فترة صعبة جدا

كل موقف كنت ببقى فيه ابقى بعيط وافتكر البوست اقعد اعيط واقول الحمد لله خايفة اعترض والا هاتحاسب انتى اللى قلتى يبقى اعملى باللى قلتيه بجد فى كل موقف اعيط واحساس بالعجزفظييييييييييييع

بس لازم ما انساش بجد الدعاء عامل مهم جدا فى حياتى اد ايه ربنا بيخفف عننا بالدعاء واد ايه ربنا كريم انه يتقبل دعائنا ويستجيبه على كثرة معاصينا وقلة طاعاتنا

كنت وانا صغيرة دايما بدعى دعاء هو غريب ومش غريب كنت دايما اقول يارب الحمد لله ان انت ربنا :) لان بيتهيالى مفيش رب زى ربنا لا اله الا هو بجد مفيش اكرم منه ولا ارحم منه ولا الطف منه ولا اعلم منه ولا احن علينا منه الحمد لله

طبعا بوست مش مناسب بالمرة للعيد بس بجد اسفه يا جماعة

حذارى بقى و ركزوا فى اللى بتكتبوه

وعلى العموم ربنا بجد لطيف فى قدره الحمد لله

يعني اختى فى الله اللى كل علاقتى بيها كانت التليفون حتى مش عارفه عنوان بيتهم بس كان رقم البيت وماكنتش حافظاه وكان على الموبايل

صحيح كل ده ضاع بس انا رجعت الشريحة وبما ان فرحها قريب فاكيد هاتكلمنى تدعينى وهاعرف كل حاجة تانى

اعز اصدقائي ربنا ابدلنى بصديقة بجد طيبة اوى واظن انها ممكن تبقى اعز اصدقائي

الدراسة انا ان شاء الله هامتحن 3/1 ادعولى بقى لانى من وقت الميد تيرم ما فتحتش ورقة بس كمان الحمد لله انى كنت داخله الميد تيرم كنت مخلصة معظم المواد بالذات المواد المهمه واللى زاد ان شاء الله مش هايكون مشكلة كبيرة

واما عن بقيت حياتى

فزى ما قلت فى اول بوست ليا هنا فى المدونة

الحياة ما بتوقفش عند حد ولا لألم حد

وعسى ان تكرهوا شيئا ويجعل الله فيه خيرا كثيرا ولو علمتم الغيب لاخترتم الواقع

الحمد لله على كل حال

******************************

الخلاصة

* فكر فى كل حاجة بتكتبها جايز تبقى طلب للبلاء :) واهو تخفيف من الذنوب

* لا تنسي ان ترى نصف الكوب الملآن لانه لا يوجد كوب نصفه غير فارغ

*الدعاء مخ العبادة وعماده اليقين ولا يرد القدر الا الدعاء وربنا اتخذ على نفسه عهدا سبحانه وتعالى قال ادعونى استجب لكم

* وخلقنا الانسان فى كبد الدنيا مفيش فيها راحة :)

* ولا تنس الحمد

الحمد لله على كل حال